مەنىڭ دە كۇيەۋىم «تەڭىز» كەنىشىندە ۆاحتالىق ادىسپەن جۇمىس ىستەۋشى ەدى. قازىر بۇل كەن ورنىنان جۇمىسشىلار تۇرعىلىقتى مەكەنجايىنا جىبەرىلىپ جاتىر. ۋاقىتشا جۇمىسسىز قالعانداردىڭ اراسىندا كۇيەۋىم دە بار. بۇل ارينە, وتباسىلىق كىرىستىڭ ازايۋىنا ىقپال ەتەرى داۋسىز. ونىڭ ۇستىنە ءوزىم جۇمىس ىستەمەيمىن. وتباسىمىزدا مەكتەپ جاسىنداعى ءتورت بالامىز بار. باستاپقىدا الاڭداعانىمىزدى جاسىرا المايمىن. وسىنداي قيىن كەزدە ارقا سۇيەيتىن مەملەكەتىڭ بولعانى قانداي جاقسى!
ەل پرەزيدەنتى قاسىم-جومارت توقاەۆتىڭ ۋاقىتشا جۇمىسسىز قالعان جانداردى قولداۋ ءۇشىن 42 500 تەڭگەدەن الەۋمەتتىك تولەم بەرۋگە ۇيعارىم جاساعانى قۋانتتى. بۇل كومەكتى جۇمىسسىزدار دا الۋىنا بولادى ەكەن. ارنايى جەلى ارقىلى مەن دە وسى تولەمدى الۋعا ءوتىنىش بەردىم. ارادا ءۇش-ءتورت كۇن وتكەندە جەكە ەسەپشوتىما الەۋمەتتىك تولەم قارجىسى ءتۇستى. شىنىمدى ايتسام, كۇيەۋىم جۇمىس ىستەپ, تابىس تاۋىپ جۇرگەندە الەۋمەتتىك تولەم الۋعا جۇگىنۋدى ويلاماعان ەدىم.
تەگىندە مۇنداي قولداۋ ءبىز سەكىلدى جۇمىسسىز وتىرعان جانداردىڭ ەل كەلەشەگىنە دەگەن سەنىمىن ورنىقتىرا تۇسەدى. ال جۇمىسىنان ۋاقىتشا شەتتەپ قالعاندار جالاقىسى ساقتالاتىنىنا قۋانىپ وتىر. ءبىز مۇنى ەلدىڭ كەلەشەگىن ويلاعان باسشىلاردىڭ تاراپىنان جاسالعان قامقورلىق رەتىندە قابىلداپ وتىرمىز.
اينۇر قالاۋوۆا,
كوپ بالالى انا
اتىراۋ وبلىسى,
جىلىوي اۋدانى
