ەپيدەمياعا قارسى ءىس-شارالارعا قاتىساتىن مەديتسينا قىزمەتكەرلەرىنە قارجىلىق قولداۋ كورسەتۋ ماقساتىندا دەنساۋلىق ساقتاۋ قىزمەتكەرلەرىنىڭ جالاقىسىنا ۇستەمەاقى بەلگىلەۋ ەرەجەسى ازىرلەنگەنى بەلگىلى, وندا تاۋەكەل توپتارى, الۋشىلاردىڭ ءتىزىمىن قالىپتاستىرۋ ءتارتىبى جانە تولەم مولشەرى انىقتالعان بولاتىن.
ا.جۇماعۇلوۆتىڭ اقپاراتى بويىنشا, دەنساۋلىق ساقتاۋ ءمينيسترىنىڭ 4 ساۋىردەگى بۇيرىعىنا سايكەس 3 تاۋەكەل توبى انىقتالىپ, مەديتسينالىق قىزمەتكەرلەردىڭ ءتىزىمىن قالىپتاستىرۋ ءتارتىبى جانە تولەم مولشەرى بەكىتىلگەن.
«مىسالى, ءبىرىنشى توپقا كوروناۆيرۋسى بار پاتسيەنتتەرگە مەديتسينالىق كومەك كورسەتۋ ءۇشىن انىقتالعان رەانيماتسيا بولىمشەلەرى مەن باسقا دا ستاتسيونارلاردى قوسا العاندا, ينفەكتسيالىق ستاتسيونارلاردىڭ دارىگەرلەرى, ورتا جانە كىشى مەديتسينالىق قىزمەتكەرلەرى كىرەدى. ۇستەمە جۇمىس ىستەگەن كەزەڭگە تەپە-تەڭ ايىنا 20 ەسە ەڭ تومەنگى جالاقى مولشەرىنەن (850 مىڭ تەڭگە) اسپايدى, ەكىنشى توپقا پروۆيزورلىق ستاتسيونارلاردىڭ دارىگەرلەرى, ورتا جانە كىشى مەديتسينالىق قىزمەتكەرلەرى, سونداي-اق جەدەل مەديتسينالىق جاردەمنىڭ دارىگەرلەرى مەن فەلدشەرلەرى, ونىڭ ىشىندە امبۋلاتوريالىق-ەمحانالىق ۇيىمدار جانىنداعى (شۇعىل شاقىرۋدىڭ 4 ساناتى تۋرالى ءسوز بولىپ وتىر), سونداي-اق ولار تارتىلعان جاعدايدا سانيتارلىق اۆياتسيانىڭ دارىگەرلەرى مەن ورتا مەديتسينالىق قىزمەتكەرلەرى, ولارعا ۇستەمە ايىنا 10 ەسە ەڭ تومەنگى جالاقى مولشەرىنەن اسپايدى (425 مىڭ تەڭگە), ال ءۇشىنشى توپقا دارىگەرلەر, كارانتيندىك ستاتسيونارلاردىڭ ورتا جانە كىشى مەديتسينالىق قىزمەتكەرلەرى, جەدەل مەديتسينالىق كومەك بريگادالارىنىڭ جۇرگىزۋشىلەرى, سونداي-اق ەپيدەمياعا قارسى ءىس-شارالاردى جۇرگىزۋگە تىكەلەي قاتىساتىن زەرتحانالاردىڭ ماماندارى, سەس قىزمەتكەرلەرى, ەپيدەمياعا قارسى ءىس-شارالارعا بايلانىستى بيولوگيالىق ماتەريالدى الۋ ءۇشىن جرۆي, پنەۆمونياسى بار پاتسيەنتتەردى قابىلداۋعا بەلگىلەنگەن شۇعىل ستاتسيونارلاردىڭ جانە جەدەل-جاردەم مەديتسينالىق ەمحانالارى ۇيىمدارىنىڭ قابىلداۋ بولىمشەلەرىنىڭ قىزمەتكەرلەرى, جەدەل شتابتاردىڭ مۇشەلەرى, بلوك-بەكەتتەردە كارانتيندىك رەجىمدى قامتاماسىز ەتەتىن دەنساۋلىق ساقتاۋ قىزمەتكەرلەرى كىرەدى, ۇستەمەاقى ايىنا 5 ەسە ەڭ تومەنگى جالاقى مولشەرىنەن اسپايدى (212 مىڭ تەڭگە). ۇستەمەاقى الۋشىلاردىڭ تىزىمدەرىن وڭىرلىك كوميسسيالاردىڭ جەدەل شتابتارى قالىپتاستىرادى, ولاردىڭ توراعالارى بولىپ وڭىرلەر اكىمدەرىنىڭ ورىنباسارلارى تاعايىندالادى. كوميسسيالاردىڭ قۇرامىنا دەنساۋلىق ساقتاۋ باسقارمالارىنىڭ, وڭىرلىك, باس مەملەكەتتىك سانيتارلىق دارىگەر, ۇكىمەتتىك ەمەس ۇيىمداردىڭ وكىلدەرى كىرەدى. ۇستەمەاقى رەسپۋبليكالىق بيۋدجەت قاراجاتى ەسەبىنەن جۇرگىزىلەدى. قور تولەمدەردى كوميسسيالار بەرەتىن تىزىمدەر بويىنشا جۇرگىزەدى», دەدى ول.
سونىمەن قاتار ا.جۇماعۇلوۆ ءوز سوزىندە اتاپ وتكەندەي, جالپى ەپيدەمياعا قارسى ءىس-شارالارعا تارتىلعان مەديتسينالىق قىزمەتكەرلەردى قارجىلاي قولداۋعا 35,7 ملرد تەڭگە بولىنگەن. ناۋرىز ايىندا 17,4 مىڭنان استام مەديتسينا قىزمەتكەرلەرىنە 3,3 ملرد تەڭگەدەن استام قارجى اۋدارىلعان. ەڭ ۇلكەن سوما الماتى مەن نۇر-سۇلتان قالاسىنىڭ مەديتسينا قىزمەتكەرلەرىنە (شامامەن 1,9 ملرد تەڭگە) تولەنگەن.
«ەڭ كوپ ۇستەمەاقى ءۇشىنشى سانات بويىنشا تولەندى – شامامەن 9 مىڭ قىزمەتكەرگە 846 ملن تەڭگە. ەكىنشى تاۋەكەل توبى بويىنشا 1,8 ملرد تەڭگەنى 7 مىڭ مەديتسينا قىزمەتكەرى الدى. ءبىرىنشى ساناتتاعى 1 400 مەديتسينا قىزمەتكەرى 717 ملن تەڭگە الدى. ونىڭ ىشىندە 2,5 مىڭ ەمحانا قىزمەتكەرلەرى جالپى سوماسى 185 ملن تەڭگەگە, سونداي-اق «جەدەل جاردەم» بريگادالارىنىڭ 4 مىڭ قىزمەتكەرى جالپى سوماسى 1,2 ملرد تەڭگەگە ىنتالاندىرىلدى», دەدى ا.جۇماعۇلوۆ.
