ء«بىز, سىنىبىمىزدى, مەكتەبىمىزدى, سىنىپ جەتەكشىمىز سابينا اپايىمىزدى ساعىندىق», دەيدى №178 مەكتەپتىڭ 11 «ج» سىنىبىنىڭ وقۋشى ماحاببات ابدىجالەل. قىزىنىڭ ءسوزىن قۇپتاي كەتكەن اناسى ساۋلە تابالدينوۆا فيزيكا-ماتەماتيكا باعدارىندا ءبىلىم بەرەتىن بۇل مەكتەپتە وقۋ ءاربىر وقۋشىعا ۇلكەن مارتەبە. مەكتەپتەگى ءبىلىم بەرۋ ءۇردىسى كوپتەگەن ءبىلىم وشاقتارىنا ۇلگى بولارلىقتاي, دەيدى. سونىمەن قاتار س.تابالدينوۆا ۇستاز جايىنداعى جۇرەكجاردى پىكىرىمەن ءبولىسىپ, وقۋشىلارى راسىمەن دە ساعىنىپ جۇرگەن سابينا حاناسيلوۆانى بالاعا ۇيرەتەرى مول ۇستاز دەپ اتاپ ءوتتى. «حالقىمىز «ۇستازى مىقتىنىڭ ۇستامى مىقتى», دەپ تەگىن ايتپاسا كەرەك. بالالاردىڭ بويىنا ۇلگى-ونەگە دارىتا بىلەتىن سابينا ۇستاز بالالاردىڭ بولاشاعىنا جول سالا بىلەدى. ءار بالانىڭ بىلىمىنە عانا ەمەس, ونىڭ ۇقىپتى كيىنىپ جۇرۋىنە, كوڭىل-كۇيىنە بايىپپەن قارايدى. كوڭىلىنە كىربىڭ تۇسكەن وقۋشىسىن نازاردان تىس قالدىرعان ەمەس. ءوزى دە ءاردايىم جادىراپ جۇرەتىن ۇستاز بالالاردان دا وسىنداي كوركەم مىنەز كورگىسى كەلەدى. بالانىڭ ىشكى الەمىنە تەرەڭنەن ۇڭىلە بىلەتىن ءوز ءىسىنىڭ كاسىپقويى. ء اربىر وقۋشىسىنا جىگەر بەرىپ, العا ۇمتىلۋعا يتەرمەلەيدى. مەيىرىمدى ۇستازدىڭ مەرەيلى ىستەرىنە اتا-انالاردىڭ دا العىستان باسقا ايتارى جوق», دەپ اتاپ ءوتتى.
ءيا, ۇستاز بولۋ ەكىنىڭ ءبىرىنىڭ قولىنان كەلمەيتىن كيەلى كاسىپ. «ۇستازدىق – ۇلىق ەمەس, ۇلى قىزمەت» دەپ, باتىر بابامىز باۋىرجان مومىش ۇلى ايتقانداي, ول ادام بالاسىنىڭ جانىن نۇرلاندىراتىن, شاكىرتىنىڭ بويىنا ءبىلىم ءنارىن سەبەتىن, جاۋاپكەرشىلىگى جوعارى مىندەت. ۇستازدىقتىڭ تاعىلىمى تەرەڭدە دەيتىن بولساق, شىن ۇستاز بولۋ ءۇشىن تابيعي دارىن, ىزدەنىس پەن قاجىماس قايرات كەرەك. ال ول ءۇشىن مۇعالىمنىڭ مارتەبەسى بيىك بولعانى ابزال. وسى تۇستا مۇحتار اۋەزوۆتىڭ «ۇستاز بولۋ ءوز ۋاقىتىڭدى اياماي, وزگەنىڭ باقىتىن ايالاۋ» دەگەنى ەسكە ورالادى. ەندەشە كارانتين رەجىمى تەز اياقتالىپ, مەكتەبى مەن ۇستازىن ساعىنعان بالالار سىنىبىنا تەزىرەك ورالسىن دەيمىز.
الماتى
