«Universal Energy (Qazaqstan)» كومپانياسى باستاعان گۋمانيتارلىق كومەك اكتسياسىنا اسقار الشىنباەۆ, ەۆگەني فەلد, نۇرجان بەكشەنوۆ, ەسەنعالي بايمەنوۆ جانە رايىمبەك باتالوۆ سياقتى بەلگىلى مەتساناتتار ۇلەس قوسقان ەكەن. بۇگىن Covid-19 ينفەكتسياسىمەن كۇرەستىڭ الدىڭعى ساپىندا جۇرگەن الماتى وبلىسىنىڭ مەديتسينالىق جانە باسقا دا ۇيىمدارىنا گۋمانيتارلىق كومەك جۇگى جەتكىزىلدى .
جالپى قۇنى 100 ميلليون تەڭگەدەن اساتىن جۇك قۇرامىندا كوپ رەت پايدالاناتىن Dupont كوستيۋمدەرى, ينفراقىزىل تەرمومەترلەر, ماسكالار, رەسپيراتورلار, قورعانىس كوزىلدىرىكتەرى بار. قىتايدان ساتىپ الىنعان زاتتار قازاقستانعا ارنايى رەيسپەن اكەلىنگەن. بۇل قورعانىس قۇرالدارى ىندەتپەن كۇرەس شارالارىنا تارتىلعان مەديتسينالىق جانە باسقا دا ۇيىمدارعا ءبولىپ بەرۋ ءۇشىن وبلىس اكىمدىگىنە تاپسىرىلدى. بارلىق مەديتسينالىق بۇيىمدار مەن امۋنيتسيا قىتايلىق جانە ەۋروپالىق كاسىپورىنداردا وندىرىلگەن, ەۋروپالىق ساپا سەرتيفيكاتتارىنا يە.
- ءبىز قىسىلتاياڭ شاقتا لوگيستيكالىق قيىندىقتى ەڭسەرۋگە كومەك بەرگەن ەلىمىزدىڭ سىرتقى ىستەر مينيسترلىگىنە, قىتايداعى قازاقستاننىڭ ەلشىلىگىنە العىس ايتامىز. بۇل زاماناۋي جەكە قورعانۋ قۇرالدارى ءبىزدىڭ مەديتسينا ماماندارىنا كوروناۆيرۋسپەن كۇرەستە ۇلكەن كومەك بولادى دەپ سەنەمىز, - دەيدى «Universal Energy» (Qazaqstan) كومپانياسى قۇرىلتايشىلارى ءبىرى, بەلگىلى كاسىپكەر بولات ءابىلوۆ.
ال گۋمانيتارلىق كومەكتى قابىلداپ العان وبلىس اكىمىنىڭ ورىنباسارى سەرىك تۇرداليەۆ كاسىپكەرلەرگە ريزاشىلىعىن جەتكىزدى.
