بايقاساڭىزدار, سوڭعى كەزدەرى ەلىمىز ۇلتتىق سپورتقا ەرەكشە كوڭىل ءبولىپ, دەن قويىپ كەلەدى. ۇلتتىق ويىندارىمىز ءوڭىرىمىزدىڭ بارلىق سالاسىندا كورىنىس تاۋىپ وتىر دەسەك, قاتەلەسپەيتىنىمىز انىق.
بايقاساڭىزدار, سوڭعى كەزدەرى ەلىمىز ۇلتتىق سپورتقا ەرەكشە كوڭىل ءبولىپ, دەن قويىپ كەلەدى. ۇلتتىق ويىندارىمىز ءوڭىرىمىزدىڭ بارلىق سالاسىندا كورىنىس تاۋىپ وتىر دەسەك, قاتەلەسپەيتىنىمىز انىق.
بۇقارالىق اقپارات قۇرالدارىن اقتارىپ وتىرساڭىز دا, تەلەارنانى قوسساڭىز دا ۇلتتىق ويىندارىمىزدىڭ ناسيحاتتالىپ جاتقانىن وقيسىڭ, كورەسىڭ, ەستيسىڭ. ماسەلەن, «قازاقستان» ۇلتتىق تەلەارناسىنان ءجيى كورسەتىلەتىن كوكپاردىڭ ءوزى دەلەبەڭدى قوزدىرىپ, ايىزىڭدى قاندىرادى. سونداي-اق, وسى تەلەارنادان كورسەتىلگەن «قازاقستاندى تانىتۋ» تەلەۆيزيالىق جوباسى دا ۇلتتىق ويىندارىمىزدىڭ ءبىرى – اسىقتى دا جاقسى تانىتا الدى. بۇدان وزگە جۋرناليستەر, ءتۇرلى سالا قىزمەتكەرلەرى اراسىندا ۇلتتىق ويىنداردان ءوتىپ تۇراتىن سايىستار دا ەلىمىزدە ۇلتتىق ويىندارىمىزدىڭ كەڭىنەن تانىلىپ كەلە جاتقانىن ايعاقتايدى.
الايدا, بۇل ءۇردىس مەكتەپ وقۋشىلارى اراسىندا كەڭىنەن جايىلماي كەلەدى. سوندىقتان دا, ءبىز ۇلتتىق ويىندى مەكتەپتە تاجىريبە جۇزىندە جاساپ كورۋدى ءجون دەپ بىلدىك. قاراعاندى قالاسىنىڭ №101 مەكتەپ-ليتسەيىنىڭ ءبىرىنشى سىنىپ وقۋشىلارى اراسىندا «كوڭىلدى مارە» جارىسىن تازا ۇلتتىق ويىندار نەگىزىندە وتكىزدىك. جالپى, «كوڭىلدى مارە» – ءار مەتكەپتىڭ وتكىزەتىن ويىنى. الايدا, كوبىسىندە ۇلتتىق نىشان بايقالمايدى. ءبىز وسى قاعيدانى بۇزىپ, بۇل ويىندى ۇلتتىق ارناعا بۇردىق.
مەكتەبىمىزدە وتكەن «كوڭىلدى مارەگە» بىرنەشە ۇلتتىق ويىنداردى قوستىق. اتاپ ايتساق, «بايگە», «تەڭگە ءىلۋ», «قول كۇرەسى», «ارقان تارتىس», «اسىق اتۋ» سەكىلدى ۇلتتىق ويىندار سايىسىمىزدا كورىنىس تاپتى. ويىن بارىسىندا قاتىسۋشىلاردىڭ بويىنان ەرەكشە سەزىم بايقادىق. مۇنىڭ ءبارى ۇلتتىق ويىننىڭ قازاق جانىنا ەتەنە جاقىن بولعانىنان دەپ بىلدىك.
ۇلتتىق ويىندار – سالاماتتى ءومىر سالتىن مۇرات تۇتقان ارمانشىل, ەلى مەن جەرىنىڭ قامىن ويلايتىن, ۇلتقا ءتان بارلىق قاسيەتتى قادىر تۇتاتىن, دارا تۇلعا – جاڭا ادامدى تاربيەلەپ شىعارۋدىڭ ماڭىزدى قۇرالى. ساباق بارىسىندا نەمەسە ساباقتان تىس كەزدە بالانى ۇلتتىق ويىن ارقىلى ومىرگە تاربيەلەۋ ۇزدىكسىز ۇدەرىستىڭ جالعاسى بولۋى ءتيىس. مەكتەپ وقۋشىلارىنا دەنە كۇشىن, قوزعالىس داعدىلارىن دامىتۋعا بايلانىستى ۇلتتىق ويىن تۇرلەرى فيزيولوگيالىق, پسيحولوگيالىق تۇرعىدان قازىرگى زامان تالابىنا ساي ارى قاراي دامىتۋدى قاجەت ەتەدى. مەكتەپتە وقۋشىلارعا ۇلتتىق ويىنداردىڭ قۇندىلىعىن ناسيحاتتاۋمەن قاتار, ولاردى قولدانۋدىڭ وزىق تاجىريبەلەرىن جيناقتاۋ جانە دامىتۋ كەرەك.
جالپى, ۇلتتىق ويىندار – اتا-بابامىزدان بىزگە جەتكەن مۇرا سياقتى وتكەن كۇن مەن بۇگىنگىنى بايلانىستىراتىن باعا جەتپەس بايلىعىمىز, اسىل قازىنامىز, ونەرىمىز. سوندىقتان ونى ءۇيرەنۋدىڭ, كۇندەلىكتى ومىردە پايدالانۋدىڭ پايداسى وراسان زور. ويىن بالانىڭ الدىنان ءومىردىڭ ەسىگىن اشىپ, ونىڭ شىعارماشىلىق قابىلەتىن وياتىپ, بۇكىل ومىرىمەن جالعاسا بەرەدى. ويىن سان عاسىرلار وتسە دە ادامزات بالاسىنا اقىل-وي جەتەكشىسى, دەنساۋلىق كەپىلى, ءومىر تىنىسى بولىپ قالا بەرەدى.
باياعىدا اۋىلدا وقىعاندا ءۇزىلىس سايىن ۇلدار مەكتەپتىڭ كوزدەن تاسا جەرىنە شىعىپ الىپ, مۇعالىمدەردىڭ كوزىنە تۇسپەي جەردىڭ اپاي-توپايىن شىعارىپ اسىق ويناپ جاتاتىن. مۇعالىمدەر بايقاپ قالاتىن بولسا, «اسىق ويناعان ازار»دەپ شىرىلداتىپ تۇرىپ اسىعىن تارتىپ الۋشى ەدى. قازىر ءوزىم مۇعالىم بولعاندىقتان, سول كەزدەگى ۇستازداردىڭ بۇل ارەكەتى دۇرىس بولماپتى-اۋ دەپ ويلايمىن. قازىرگىنىڭ بالاسى قوڭىراۋعا شىعا سالا اسىق ەمەس, ۇيالى تەلەفونىمەن ويناپ وتىراتىن بولدى. ەندەشە, بۇگىندە مەكتەپ وقۋشىلارىنىڭ اراسىندا دا ۇلتتىق ويىندارىمىزدى كەڭىنەن ناسيحاتتايتىن باعدارلاما كەرەك دەپ ەسەپتەيمىن.
دينارا ساكەنوۆا,
قاراعاندى قالاسىنداعى
№101 مەكتەپ-ليتسەيىنىڭ مۇعالىمى.
