وسى تۇستا ەسكەرە كەتەتىن جايت, ۋنيۆەرسيتەتتىڭ ءباسپاسوز قىزمەتىنىڭ دەرەكتەرىنە سۇيەنسەك, الەۋمەتتىك جەلىلەردەگى ءال-فارابي اتىنداعى قازۇۋ-عا ەشقانداي قاتىسى جوق «KazNU» دەگەن قىسقارتىلعان اتاۋمەن تىركەلگەن اككاۋنتتا الداعى قاشىقتان وتكىزۋ فورماتى بويىنشا جوسپارلانعان ەمتيحان سەسسياسىن بولدىرماۋدى تالاپ ەتكەن ۇندەۋ پايدا بولدى. وسى ماسەلەگە وراي ۋنيۆەرسيتەت قازۇۋ-دىڭ اتاۋىن زاڭسىز پايدالانعان تۇلعالارعا شارا قولدانۋ جونىندە قۇقىق قورعاۋ ورگاندارىنا ءوتىنىش جاسادى.
توتەنشە جاعداي كەزىندە ءبىلىم جانە عىلىم مينيسترلىگى بەرەتىن رەسمي, ونىڭ ىشىندە ەمتيحاندى قاشىقتان وتكىزۋ ءتارتىبى تۋرالى اقپاراتتى عانا قولدانۋ قاجەتتىگىنە نازار اۋدارامىز. ءبىلىم بەرۋ ۇدەرىسىنە بايلانىستى بارلىق ماسەلەلەر سىندارلى تۇردە جانە جوو-لاردىڭ اكادەميالىق ساياساتى اياسىندا شەشىلۋى ءتيىس. مەملەكەتتىك جالپى مىندەتتى ءبىلىم بەرۋ ستاندارتىنىڭ تالاپتارىنا سايكەس كەلەسى كۋرسقا ءوتۋ, سونداي-اق ديپلوم الۋ ءۇشىن قورىتىندى اتتەستاتسيادان ءوتۋ كەرەك, ياعني ەمتيحاندى تاپسىرۋ جانە ديپلوم (ديسسەرتاتسيا) جۇمىسىن قورعاۋ قاجەت. مۇنى ۋاقىتىندا ىسكە اسىرۋ ءۇشىن كارانتين جاعدايىندا اعىمداعى ەمتيحان سەسسياسى قاشىقتان وتكىزىلەدى. ستۋدەنتتەر ەمتيحاندى جازباشا, اۋىزشا, تەست نەمەسە جوبا تۇرىندە تاپسىرا الادى. سەسسيانىڭ مەرزىمى جانە ەمتيحانداردى تاپسىرۋ ۋاقىتى ەلەۋلى تۇردە ۇزارتىلعان, بۇل بارىنشا تولىققاندى دايىندالۋعا مۇمكىندىك بەرەدى. سونداي-اق جاقسى وقۋ ۇلگەرىمى ءۇشىن ستۋدەنتتەرگە قوسىمشا بالل قويۋ جاعى دا قاراستىرىلعان. سونىمەن بىرگە, كەيبىر بەيىندى ەمەس جەكە پاندەردەن ارالىق باقىلاۋلاردىڭ اريفمەتيكالىق ورتاق بالىن قويۋ مۇمكىندىگى دە قاراستىرىلعان. قازۇۋ قابىلداعان شارالار كەشەنى ستۋدەنتتەرگە كەيىنگە قالدىرماي بارلىق ەمتيحاندى ۋاقىتىندا تاپسىرۋعا, كەلەسى كۋرسقا تابىستى وتۋگە, ديپلوم الىپ, جۇمىسقا ورنالاسۋعا, ماگيستراتۋرا مەن دوكتورانتۋرادا وقۋلارىن جالعاستىرۋعا مۇمكىندىك بەرەدى.
سونىمەن قاتار, كەيبىر ستۋدەنتتەردە قاشىقتان وقىتۋ تەحنولوگيالارىنا قولجەتكىزۋ قيىندىقتارى تۋىنداۋدا ەكەندىگىن تۇسىنە وتىرىپ, ولاردىڭ بەرگەن ءوتىنىشى بويىنشا ەمتيحان كەيىنگە قالدىرىلادى. كارانتين رەجيمى توقتاتىلعاننان كەيىن ولار ۋنيۆەرسيتەتكە كەلىپ, ەمتيحاندى اۋديتوريادا تاپسىرا الادى.
قازۇۋ ستۋدەنتتەرى ەمتيحان سەسسياسىن وتكىزۋ تۋرالى تولىق اقپاراتتى اعىمداعى جىلدىڭ 24 ساۋىرىندە ساعات 15.00-دە ۋنيۆەرسيتەتتىڭ Instagram-داعى رەسمي اككاۋنتىندا (https://www.instagram.com/KAZNU_FARABI/) وقۋ ءىسى جونىندەگى پرورەكتوردىڭ ونلاين-ءتۇسىندىرۋى بارىسىندا الا الادى.
ۋنيۆەرسيتەت باسششىلىعى كارانتيننىڭ كۇردەلى كەزەڭىندە بۇكىل ەل قاشىقتىقتان جۇمىس ىستەۋگە كوشكەن كەزدە, قازىرگى زاماناۋي تەحنولوگيالاردى پايدالانۋدىڭ جاڭا وڭ تاجىريبەسىن پايدالانىپ, جاعدايعا سانالى تۇردە قاراپ, جاۋاپكەرشىلىك تانىتۋ قاجەتتىگىن ايتادى. ولاردى بەلسەندى قولدانۋ بولاشاقتا ءبىلىم بەرۋدىڭ ساپالى جوعارى دەڭگەيىنە شىعۋعا مۇمكىندىك بەرەدى.
