قالا اكىمى بۇعان دەيىن ءوزىنىڭ Instagram پاراقشاسىنا قوعامدىق كەڭىستىكتى اباتتاندىرۋ جانە كوگالداندىرۋ بويىنشا جوبالاردى ىسكە اسىرۋ كەزىندە «جاڭا الماتى» شاعىناۋدانى باستى نازاردا بولاتىنىن مالىمدەگەن ەدى.
ء«بىر عانا الاتاۋ اۋدانىندا بىردەن 20 جوبا جوسپارلانعان. ونىڭ ىشىندە «قاراسۋ» شاعىناۋدانىندا رەكرەاتسيالىق ايماق قۇرىلىسى, «شاپاعات» جانە «زەردەلى» شاعىناۋداندارىنداعى سكۆەرلەردى جوندەۋ جۇمىستارى بار. مۇنداي جۇمىستار باسقا اۋدانداردا دا جۇرگىزىلەتىن بولادى», - دەپ جازدى ب. ساعىنتاەۆ.
شاھار باسشىسىنىڭ ايتۋىنشا, قالا تۇرعىندارىنىڭ ومىرىنە قولايلى جاعداي تۋعىزۋ ءۇشىن جاياۋ جۇرگىنشىلەر ايماعىن جانە كوپپاتەرلى تۇرعىن ۇيلەرگە ىرگەلەس اۋماقتاردى اباتتاندىرۋ, بالالار الاڭدارى مەن اۋلاداعى سپورت الاڭدارىن سالۋ, ارىق جۇيەسى مەن جارىقتاندىرۋدى جوندەۋ جۇمىستارى قاراستىرىلعان.
«ورىندىقتار, جارىق كوزدەرى سەكىلدى بەزەندىرۋ ەلەمەنتتەرى ىڭعايلى ءارى قالا تۇرعىندارىنا ۇزاق ۋاقىت قىزمەت ەتۋى ءۇشىن جوعارى ساپالى ماتەريالداردى پايدالانۋدى قامتاماسىز ەتۋ كەرەك. سونداي-اق بۇل جابدىقتار قازىرگى جانە جاڭادان قۇرىلعان قالالىق كەڭىستىكتەردىڭ ساۋلەتتىك كەلبەتىنە سايكەس بولۋى ءتيىس», – دەپ اتاپ ءوتتى ب. ساعىنتاەۆ.
«ەلدى-مەكەندەردى اباتتاندىرۋ» باعىتى بويىنشا 12,5 مىڭ جۇمىس ورنىن قامتيتىن 125 جوبا ىسكە اسىرىلاتىن بولادى. جالپى, اعىمداعى جىلى جقجك اياسىندا 214 جوبا بويىنشا 26 مىڭ ادام جۇمىسقا ورنالاسادى.
