رەسەي پرەزيدەنتى ۆلاديمير پۋتين امەريكانىڭ «نيۋ-يورك تايمس» گازەتىنە بەرگەن سۇحباتىندا اقش-تىڭ سيرياعا سوققى بەرۋى ۇلكەن قاتەرلەرگە الىپ كەلۋى ىقتيمال ەكەنىن ەسكەرتتى.
سوققىنىڭ سالدارى تۋرالى ەسكەرتتى
رەسەي پرەزيدەنتى ۆلاديمير پۋتين امەريكانىڭ «نيۋ-يورك تايمس» گازەتىنە بەرگەن سۇحباتىندا اقش-تىڭ سيرياعا سوققى بەرۋى ۇلكەن قاتەرلەرگە الىپ كەلۋى ىقتيمال ەكەنىن ەسكەرتتى.
اقش-تىڭ سيرياعا ىقتيمال سوققىسى قازىرگىدەن دە كوپ كىناسىز قۇرباندىقتارعا الىپ كەلەدى. ال بۇل جايت سيريانىڭ شەكاراسىنان دا شىعىپ كەتۋى ىقتيمال, دەدى ۆ.پۋتين. ونىڭ ايتۋىنشا, سيريادا ۋلاندىرۋشى گاز قولدانىلعانىنا ەش كۇمان جوق. بىراق گازدى باتىس ەلدەرىنىڭ اسكەري ينتەرۆەنتسياسىن ارانداتۋ ءۇشىن ب ۇلىكشىلەر قولدانعان دەپ تە وي تۇيۋگە بولادى. رەسەي باسشىسى سونداي-اق, اقش پرەزيدەنتى باراك وبامانىڭ سيرياداعى احۋالدى بەيبىت تاسىلمەن شەشۋ جولىن قاراستىرۋعا ۇمتىلىسىن قۋاتتايتىنىن ءبىلدىردى.
تۇركياداعى قارسىلىق جالعاسۋدا
تۇركيادا ادامدار ۇكىمەتكە قارسى ۇرانداتىپ تاعى دا كوشەگە شىقتى. بۇعان انتاكەدەگى وپپوزيتسيا شەرۋىنە قاتىسۋشىلاردىڭ ءبىرى احمەت اتاكانىڭ قازاسى سەبەپ بولدى.
نارازىلىق بىلدىرۋشىلەر ونىڭ ولىمىنە قۇقىق قورعاۋ ورگاندارىن ايىپتاپ وتىر. ال پوليتسيا بولسا, ا.اتاكا ءۇيدىڭ توبەسىنەن ءوزى قۇلاپ كەتتى دەگەندى كولدەنەڭ تارتادى. كەيبىر اكتسيالار پوليتسيامەن قاقتىعىسپەن اياقتالعان. يزميردە, انتاكەدە جانە حاتاەدە ءتارتىپ ساقشىلارى دەمونسترانتتارعا قارسى كوزدەن جاس اعىزاتىن گاز بەن سۋاتقىش قولدانعان.
يمميگرانتتار سانى الاڭداتادى
بۇۇ جاريالاعان دەرەكتەرگە سايكەس, الەمدە يمميگرانتتار سانى وسە تۇسكەن. وسى جىلدىڭ ستاتيستيكاسىنا سۇيەنسەك, ءوز ەلدەرىنەن شەتكەرى جەرلەردە 232 ملن. ادام (پلانەتاداعى ءاربىر 30-شى ادام دەگەن ءسوز) ءومىر ءسۇرىپ جاتىر ەكەن.
بۇل كورسەتكىش ءححى عاسىردىڭ باسىنداعى مالىمەتتەردىڭ ۇشتەن بىرىندەي كوپ. كوپتەگەن يمميگرانتتاردى ەڭبەككە قابىلەتتى جاستاعىلار قۇرايدى. ال ءوز ەلدەرىن تاستاپ كەتكەندەردىڭ باسىم بولىگى پايىزعا شاققاندا سولتۇستىك ازيادان شىققانداردىڭ ۇلەسىندە. ال يمميگرانتتاردىڭ باسىم ۇمتىلاتىن جەرلەرى ەۋروپا, سودان كەيىن دامىعان ازيا ەلدەرى كورىنەدى.
كاتالونيا دەربەستىكتى قالايدى
ۇيىمداستىرۋشىلاردىڭ دەرەكتەرىنە قاراعاندا, كەشە 400-دەن استام ادام يسپانيانىڭ سولتۇستىك-شىعىسىنداعى كاتالونيا اۆتونوميالىق وبلىسىنىڭ 86 ەلدى مەكەنىندە سولتۇستىكتەن وڭتۇستىككە قاراي قول ۇستاسا سوزىلىپ تۇرعان.
بۇل اكتسيانى كاتالونيا كۇنى مەرەكەسىنە وراي وسى اۆتونوميانىڭ ەگەمەندىگىن جاقتايتىندار ۇيىمداستىرعان. ونى وتكىزۋ ءۇشىن بىرنەشە ساعات بويى فرانتسياعا اپاراتىن ماگيسترالدى شوسسە مەن كاتالونيانىڭ ورتالىعى بارسەلونا قالاسى مەن باسقا دا قالالاردىڭ كوپتەگەن داڭعىلدارى جابىلعان. شارا جەرگىلىكتى ۇكىمەت تاراپىنان قولداۋ تاپقان.
ۇستازدار جاڭا رەفورماعا نارازى
مىڭداعان مۇعالىم مەحيكوداعى كولىك قوزعالىسىن توقتاتىپ تاستاعان. ولار بۇرناعى كۇنى مەكسيكا پرەزيدەنتى ەنريكە پەنيا نەتو ماقۇلداعان جاڭا ءبىلىم بەرۋ رەفورماسىنا نارازىلىقتارىن وسىلايشا بىلدىرگەن.
نارازىلىق اكتسياسىنا قاتىسۋشىلار مەحيكو اۋەجايىنا اپاراتىن جولدى جاپپاق بولعان كەزدە ماسەلەگە پوليتسيا ارالاسىپ, وسىنىڭ سالدارىنان دەمونسترانتتار مەن قۇقىق قورعاۋ ورگاندارى وكىلدەرى اراسىندا قاقتىعىس ورىن العان. مەكسيكاداعى مۇعالىمدەر كاسىپوداعى جۇمىس ۆاكانسيالارىن ءبولۋدى باقىلاۋدا ۇستايتىن جەمقورلىققا بەلشەسىنەن باتقان ۇيىم بولىپ سانالادى. جاڭا زاڭدا ولارعا قاتىستى ناقتى ەشتەڭە قاراستىرىلماپتى.
توپان سۋدىڭ قاتەرى كۇشتى
توپان سۋ امۋرداعى كومسومولسكىنىڭ ستراتەگيالىق ماڭىزدى كاسىپورىندارىنا قاتەر ءتوندىرىپ وتىر. قالادان 3 مىڭعا جۋىق ادام قاۋىپسىز جەرلەرگە كوشىرىلگەن. ءبىر تاۋلىك ىشىندە امۋر وزەنىندەگى سۋ دەڭگەيى تاعى 8 سانتيمەترگە كوتەرىلىپ, 910 سانتيمەترلىك بەلگىگە جەتكەن.
وسىنداعى كەمە جاساۋ زاۋىتىندا اسكەري كورابلدەر مەن سۇڭگۋىر قايىقتار جاسالادى جانە جوندەلەدى. «توپان سۋ زاۋىتقا تىم جاقىنداپ كەتپەۋى ءۇشىن دامبا بيىكتىگى كۇن سايىن ۇلعايتىلا ءتۇسىپ كەلەدى. سۋدى كەرى سورىپ الۋ ۇدەرىسى تاۋلىك بويى جۇرگىزىلۋدە. ەگەر ەش شارا قابىلدانباسا, زاۋىت الدەقاشان سۋ استىندا قالار ەدى», دەيدى امۋر كەمە قۇرىلىسى زاۋىتىنىڭ تەحنيكالىق ديرەكتورى سەرگەي بولشەدۆورسكي.
قىسقا قايىرىپ ايتقاندا:
اقش ەكونوميكاسى 2007-2009 جىلدارداعى قارجى داعدارىسى سالدارىنان 14 ترلن. دوللار جوعالتقان. مۇنى داللاستاعى فەدەرالدى رەزەرۆ بانكىنىڭ ساراپشىلارى جاريا ەتتى.
نيگەريا ارمياسى اۋە رەيدى ناتيجەسىندە راديكالدى «بوكو حارام» يسلام توبى ورنالاسقان ەكى بازانى جويسا, 10 سودىر قازا تاپقان. تامىز ايىندا عانا يسلامشىلار تاراپىنان جاسالعان شابۋىلداردان 160-تان استام ادام كوز جۇمسا كەرەك.
يراك استاناسى باعداد قالاسىنداعى شيت مەشىتى جانىندا جاسالعان جارىلىس سالدارىنان 15 ادام وپات بولعان. جىل باسىنان بەرى يراكتا لاڭكەستىكتەردەن شامامەن 5 مىڭ ادام كوز جۇمىپتى.
قۇراما شتاتتار سيريا وپپوزيتسياسىنا قارۋ-جاراقتىڭ كەيبىر ءتۇرلەرىن بەرۋدى باستاعان. بۇل تۋرالى سيريانىڭ وپپوزيتسيالىق جانە رەۆوليۋتسيالىق كۇشتەرى ۇلتتىق كواليتسياسىنىڭ وكىلى حاليد سالەح جاريا ەتتى.
مەكسيكانىڭ شىعىسىندا سەل تاسقىنىنان كەم دەگەندە سەگىز ادام قازاعا ۇشىراعان. ۆەراكرۋس شتاتىنداعى كوسكوماتەپەك مۋنيتسيپالدى اۋماعىنا قاراستى تەكوا دەرەۆنياسىندا سەلدەن قۇتقارۋ جۇمىستارى جالعاسۋدا.
جاپونيانىڭ Toyota Motor كومپانياسى اقش پەن كانادادان 850,5 مىڭنان استام Toyota RAV4 جانە Lexus HS 250h ماركالى كولىكتەردى قايتارىپ الۋدا. وعان كولىكتەردەگى اقاۋ سەبەپ بولعان كورىنەدى. بۇگىنگە دەيىن كولىك يەلەرىنەن 130-دان استام شاعىم ءتۇسىپتى.
ينتەرنەت ماتەريالدارى نەگىزىندە ازىرلەندى.
