تىكەلەي ەفيردە بۇگىنگى كوكتەمگى اۋىلشارۋاشىلىق سالاسىنداعى ماۋسىمدىق جۇمىستارعا بايلانىستى ەگىنشىلىك, وسىمدىك قورعاۋ, مال شارۋاشىلىعى, ۆەتەريناريا, جەر, سۋ, ورمان رەسۋرستارى, اگروبيزنەس ت.ب. سۇراقتار بويىنشا وزەكتى ماسەلەلەر قارالدى.
ۋنيۆەرسيەتتىڭ ءباسپاسوز قىزمەتىنىڭ دەرەگى بويىنشا, تۋىنداعان سۇراقتارعا جاۋاپ بەرۋ ءۇشىن ونلاين كونفەرەنتسياعا مەنىمەن بىرگە ۋنيۆەرسيتەتتىڭ 25 ەكسپەرتى قاتىسىپ, تىكەلەي ەفيردەگى كونفەرەنتسيا جۇمىسىن ۋنيۆەرسيتەتتىڭ عىلىمي جۇمىستار جانە يننوۆاتسيالار جونىندەگى پرورەكتورى قايسار تابىنوۆ جۇرگىزدى.
ونلاين كونفەرەنتسيا بارىسىندا نەگىزىنەن بەينەسۇراقتار بەرىلدى. الماتى وبلىسىنىڭ فەرمەرى تىلەكتەس احمەتوۆ جولداعان قۋاڭشىلىق كەزىندە بيداي مەن ارپانىڭ ونىمدىلىگىن ارتتىراتىن تەحنولوگيالار تۋرالى سۇراققا اۋىلشارۋاشىلىعى عىلىمدارىنىڭ دوكتورى, پروفەسسور, قر ۇعا كوررەسپوندەنت-مۇشەسى, اگرونوميا كافەدراسىنىڭ مەڭگەرۋشىسى سەرىك كەنەنباەۆ جاۋاپ بەردى. سەرىك بارمەنبەك ۇلى سونداي-اق, جامبىل وبلىسىنىڭ «شىمىرباي» شارۋا قوجالىعىنىڭ جەتەكشىسى شىمىرباي ابدىبەكتەن كەلگەن جوڭىشقانىڭ قۇرتى تۋرالى بەينەسۇراققا تۇشىمدى جاۋاپ بەردى.
الماتى وبلىسىنىڭ «بايانباي» شارۋا قوجالىعىنىڭ جەتەكشىسى مەرەكە مالدىعۇلوۆ قويعان ماي بۇرشاق ونىمدىلىگىن ارتتىرۋ تۋرالى بەينەسۇراققا اۋىلشارۋاشىلىعى عىلىمدارىنىڭ دوكتورى, اگرونوميا كافەدراسىنىڭ پروفەسسورى تاستانبەك اتاقۇلوۆ جاۋاپ بەردى.
سولتۇستىك قازاقستان وبلىسىنىڭ ۆەتەريناريا باسقارماسىنىڭ باسشىسى بەرىك ءالجانوۆتىڭ ءىرى قارا مالدا كەزدەسەتىن برۋتسەللەز اۋرۋىنىڭ الدىن الۋ مەن ەمدەۋ شارالارىنا عىلىمي, تاجىريبەلىك قولداۋ كورستەتۋ ماسەلەسى بويىنشا سۇراعىنا جانە شىعىس قازاقستان وبلىسى ۆەتەريناريالىق دارىگەرلەرى قوعامدىق بىرلەستىگىنىڭ توراعاسى ەسەنگەلدى باكيمباەۆتىڭ برۋتسەللەز ۆاكتسيناسىنا قاتىستى جولداعان سۇراعىنا ۆەتەريناريا عىلىمدارىنىڭ دوكتورى, بيولوگيالىق قاۋىپسىزدىك كافەدراسىنىڭ پروفەسسورى نۇرلان احمەدسادىقوۆ جاۋاپ بەردى.
نۇرلان احمەدسادىقوۆ سونىمەن قاتار, الماتى وبلىسىنىڭ «سارعالداقوۆ» شارۋا قوجالىعىنىڭ جەتەكشىسى سانجار سادۋاقاسوۆ جولداعان ءتورت ت ۇلىك مال تولدەرىنىڭ اس قورىتۋ اۋرۋلارىن الدىن الۋ جانە ەمدەۋ ءىس-شارالارى تۋرالى, وسى اۋرۋلارعا قارسى ۋنيۆەرسيتەت عالىمدارىنىڭ جاساعان پرەپاراتتارى تۋرالى ەكى بىردەي بەينەسۇراققا جاۋاپ بەردى.
بيولوگيا عىلىمدارىنىڭ دوكتورى, تاعام ونىمدەرىنىڭ تەحنولوگياسى جانە قاۋىپسىزدىگى كافەدراسىنىڭ پروفەسسورى ءاسيا سەرىكباەۆا بۇل سۇراقتى قوسىمشا قامتىپ, تەحنولوگيالىق ماسەلەلەرى بويىنشا تولىقتىرا ءتۇستى.
سونىمەن قاتار, تىكەلەي ەفيردە ماڭعىستاۋ وبلىسىنداعى «كاسپي» اۋىلشارۋاشىلىق وندىرىستىك كووپەراتيۆىنىڭ توراعاسى تۇرار ءجۇنىسوۆتىڭ قۇس شارۋاشىلىعىن سۋبسيديالاۋ جانە دامىتۋ تۋرالى سۇراعىنا جانە الماتى وبلىسىنداعى «تۇرگەنەكوپرودۋكت» سەرىكتەستىگىنىڭ ديرەكتورى سەرگەي ستەپانەنكونىڭ باقشا جانە ارا شارۋاشىلىعىن سۋبسيديالاۋعا قاتىستى سۇراعىنا ەكونوميكا عىلىمدارىنىڭ دوكتورى, قازۇاۋ باس عالىم حاتشىسى ۇكىلاي كەرىموۆا جاۋاپ بەردى.
وسى سۇراقتىڭ ەكىنشى بولىگىنە جانە ماڭعىستاۋ وبلىسىنىڭ اۋىل كاسىپكەرى ابىلسەيىت جامالبەكوۆتىڭ برويلەر قۇس زاۋىتىنا ۆەتەرينار كەڭەسشى تارتۋ تۋرالى سۇراقتارعا اۋىلشارۋاشىلىعى عىلىمدارىنىڭ دوكتورى, پروفەسسور, ارا, قۇس جانە بالىق شارۋاشىلىعى كافەدراسىنىڭ مەڭگەرۋشىسى شوحان الپەيىسوۆ جاۋاپ بەردى.
قىزىلوردا وبلىسىنىڭ «راحمان» شارۋا قوجالىعىنىڭ وكىلى ايجان ساپاروۆانىڭ ۋنيۆەرسيتەت عالىمدارى جاساعان دەزينفەكتسيالىق پرەپارات تۋرالى ساۋالىنا ۆەتەريناريا عىلىمدارىنىڭ كانديداتى, ۆەتەريناريالىق سانيتارلىق ساراپتاما جانە گيگيەنا كافەدراسىنىڭ قاۋىمداستىرىلعان پروفەسسورى باقىت باراحوۆ جاۋاپ بەردى.
جامبىل وبلىسىنىڭ اۋىل كاسىپكەرى ورىكباي شوجەباەۆ جولداعان بەينەسۇراق مال ونىمدەرىنىڭ ساپاسىن انىقتايتىن زەرتحانا جانە مال سويۋ ورنىن اشۋ ماسەلەسىنە قاتىستى بولدى. بۇل سۇراققا ۆەتەريناريا عىلىمدارىنىڭ كانديداتى, ۆەتەريناريالىق سانيتارلىق ساراپتاما جانە گيگيەنا كافەدراسىنىڭ قاۋىمداستىرىلعان پروفەسسورى اقىلبەك جۇماگەلديەۆ جاۋاپ بەردى.
ونلاين كونفەرەنتسيا بارىسىندا قازۇاۋ قازاقستان-بەلارۋس اگروينجەنەرلىك يننوۆاتسيالىق ورتالىعى مەن ۋنيۆەرسيتەتىمىزدىڭ وقۋ-تاجىريبەلىك شارۋاشىلىعىندا ىسكە اسىرىلىپ وتىرعان كوكتەمگى ەگىس جۇمىستارى تۋرالى ارنايى بەينەتۇسىرىلىم كورسەتىلدى. بيىلعى جىلى بۇل ورتالىققا ينۆەستيتسيالىق جوبا ارقىلى 75 بىرلىك جاڭا ۇلگىدەگى اۋىل شارۋاشىلىق تەحنيكالارى مەن قوندىرعىلارى اكەلىندى. سونىڭ 22-ءسى قازىرگى كەزدە كوكتەمگى ەگىس جۇمىستارىندا پايدالانۋدا.
قازىرگى كەزدە ۋنيۆەرسيتەت ستۋدەنتتەرى قاشىقتىقتان ءبىلىم الۋمەن قاتار ءوز اۋىلدارىنداعى كوكتەمگى ەگىس جانە مال شارۋاشىلىقتارىندا وندىرىستىك تاجىريبەدەن وتۋدە.
ءار اپتانىڭ سەيسەنبى, جۇما كۇندەرى ساعات 17:00-دە ءبىزدىڭ تىكەلەي ەفير مىنا سىلتەمە بويىنشا جۇرگىزىلەدى:
الماتى
