پارلامەنت • 22 ءساۋىر, 2020

سەناتور سەرىك بەكتۇرعانوۆ وڭىرلەردەگى دارىگەرلەردىڭ شاعىمىنا نازار اۋداردى

330 رەت
كورسەتىلدى
3 مين
وقۋ ءۇشىن

توتەنشە جاعداي كەزىندە, اسىرەسە, العى شەپتە جۇمىس ىستەپ جۇرگەن ازاماتتارعا قولداۋ ءبىلدىرۋ اۋاداي قاجەت. دەگەنمەن, وسىنداي قاربالاس جاعدايىندا مەديتسينا سالاسىنىڭ قىزمەتكەرلەرى ءتيىستى دارىگەرلىك قۇرالدار مەن تولەماقىنىڭ بولماي وتىرعانى تۋرالى شاعىم ايتقان تەكەتىرەستەر ءجيى ورىن الۋدا. سەنات دەپۋتاتتارى اتالعان وقيعانى باقىلاۋدا ۇستاپ, ونىڭ شەشىلۋ جولدارىن قاراستىرىپ وتىر. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.

سەناتور سەرىك بەكتۇرعانوۆ وڭىرلەردەگى دارىگەرلەردىڭ شاعىمىنا نازار اۋداردى

سەناتور سەرىك بەكتۇرعانوۆ دەپۋتاتتار وڭىرلەردەگى مەديتسينالىق مەكەمەلەردە ورىن العان جايتتاردى نازاردا ۇستاپ وتىرعانىن اتاپ ءوتتى.

«مەديتسينا قىزمەتكەرلەرى مەن اۋرۋحانا ۇجىمدارىنىڭ اتىنان ءتۇسىپ جاتقان شاعىمدار سانىنىڭ ازايماۋى ءبىزدى الاڭداتىپ وتىر. شيەلەنىستى جاعدايلاردىڭ ءالى كۇنگە دەيىن شەشىلمەۋى سالادا بۇرىس ءجايتتاردىڭ دا بار ەكەنىن كورسەتەدى. دارىگەرلەردىڭ وسى ساتتە تەكتەن تەك شاعىمدانبايتىنى بەلگىلى, ويتكەنى ولاردىڭ قازىرگى كەزدە جۇمىستارى باستان اسادى», - دەدى ول.

سەناتور سونداي-اق توتەنشە جاعداي كەزىندە مەملەكەتتىك ورگانداردىڭ دا قاۋىرت ىستەرىن ايتا كەلىپ, جۇمىس بارىسىندا اسىعىس ءارى جۇيەسىز شەشىم قابىلداناتىنىنا توقتالدى. ونىڭ ۇستىنە كەيبىر شەنەۋنىكتەر ءالى دە بولسا قارادۇرسىن ءىس-قيمىلدان اسا الماي وتىر.

«جاقىندا عانا ءبىر ءوڭىردىڭ مەديتسينالىق قىزمەتكەرلەرى وزدەرىنە تيەسىلى ۇستەماقىنى الا الماۋى مۇمكىن ەكەندىگىن ايتىپ شاعىمداندى. سەبەبى ولار كارانتيندە وتىر. ال وبلىستىق دەڭگەيدەگى جوعارى لاۋازىمدى ادام دەنساۋلىق ساقتاۋ باسقارماسىنا ماسەلەنى قاراپ, ۇستەماقىنىڭ تالاپقا ساي تولەۋ تۋرالى تاپسىرما بەرىلگەنىن ايتادى. بۇل دەگەنىمىز ءفورماليزمنىڭ العاشقى دارەجەسى. سوندىقتان, مەنىڭ ويىمشا, بۇل جەردە مەديتسينا ماماندارىنىڭ باستارىن قاتەرگە تىگىپ ەڭبەك ەتىپ جاتقانىن ەسەپكە الا وتىرىپ, ماسەلەنى سول جەردە قاراپ, ناقتى شەشىم قابىلداۋ قاجەت», - دەدى س.بەكتۇرعانوۆ. 

دەپۋتات سونداي-اق مەديتسينا ماماندارىنىڭ پاندەميامەن كۇرەستە الدىڭعى شەپتە, تاۋلىك بويى جۇمىس ىستەپ جۇرگەنىن ايتا كەلىپ, ولاردا ەموتسيالىق-پسيحولوگيالىق كۇيزەلىس بولۋى ىقتيمالدىعىنا دا نازار اۋدارۋ قاجەتتىگىن اتاپ ءوتتى.

«ولاردىڭ قانداي جاعدايدا جۇرگەنىن ءتۇسىنۋىمىز كەرەك, شاعىمدارىنا قاراي تيىسىنشە ارەكەت ەتۋ قاجەت. سونىمەن قاتار, مەديتسينالىق مەكەمەلەردە اتقارىلۋعا ءتيىستى بارلىق العىشارتتار جاسالدى ما, سونى ناقتى تۇسىنە ءبىلۋ كەرەك», - دەدى ول.

س.بەكتۇرعانوۆتىڭ ايتۋىنشا, ەمدەۋ مەكەمەلەرىندە كوروناۆيرۋس ىندەتىنىڭ جوعارى دەڭگەيدە سىرقاتتانۋدىڭ وزىندىك سەبەپتەرى بار.

«ارينە, ورىن العان ءاربىر جاعدايعا قاتىستى كىنالىلەر بار. بىرەۋلەر ۇيرەتپەدى, بىرەۋلەر ىستەي المادى. دارىگەرلەر كوروناۆيرۋس ىندەتىنىڭ قاتەرىن بىلە تۇرا, كارانتينگە جابىلۋدى نەمەسە جۇقتىرۋ قاۋپىن ادەيى جاسادى دەۋگە بولمايدى. قاي كەزدە دە سەبەپ-سالدارى بولادى. ءبىر ۇلى ساياساتكەر ء«اربىر قاتەلىكتىڭ اتى-ءجونى بار» دەگەن ەكەن. سوندىقتان بۇل جايتقا كىنالىلەردى كەيىنىرەك, ايقاي-شۋ مەن ابىر-سابىر باسىلىپ, ەلدەگى جاعداي تىنىشتالعان سوڭ قاراستىرۋ قاجەت. ال قازىرگى ۋاقىتتا وسىنداي وقيعالاردى بولدىرماۋ شارالارىن قولعا الۋ كەرەك. قاتەلىك قايتالانسا, دەمەك, ءبىز ءبىر نارسەنى دۇرىس ىستەمەي وتىرمىز دەگەن ءسوز. ال مەديتسينا قىزمەتكەرلەرىنىڭ شاعىمى جالعاسۋدا», - دەدى سەناتور.

سەناتور ءوز كەزەگىندە دەنساۋلىق ساقتاۋ مينيسترلىگىنە, جەرگىلىكتى جەردەگى جەدەل شتاب پەن جەرگىلىكتى اتقارۋ ورگاندارىنا تەك قانا شاعىم تۇسكەن ەمدەۋ مەكەمەلەرى ەمەس, بارلىق مەديتسينالىق ۇيىمدارعا قاتىستى ناقتى شۇعىل شەشىمدەر قابىلداۋ قاجەتتىگىن ۇسىندى.

سوڭعى جاڭالىقتار

«سپارتاك» تاعى دا جەڭىلدى

سپورت • بۇگىن, 11:55

بۇگىن اۋا رايى قانداي بولادى؟

اۋا رايى • بۇگىن, 10:42

جاڭا جوبا – قوعام تالقىسىندا

رەفورما • بۇگىن, 09:20