«Stop-coronavirus!» بايقاۋىن پاندەميانىڭ الدىن الۋ جانە ونىڭ سالدارىن جويۋ بويىنشا ءتيىمدى شەشىمدەردى ىزدەۋ ماقساتىندا «عىلىم قورى» اق ۇيىمداستىردى. كوروناۆيرۋسپەن كۇرەس تۋرالى ۇسىنىستارىن ءال-فارابي اتىنداعى قازۇۋ عالىمدارى دا جولدادى.
بايقاۋ اعىمداعى جىلدىڭ 13-15 ءساۋىر ارالىعىندا فەيسبۋك الەۋمەتتىك جەلىسى جانە BILIM PLUS ءبىلىم بەرۋ پلاتفورماسىندا ونلاين-رەجيمدە ءوتتى.
فينالعا ىرىكتەلگەن 39 جوبانىڭ ىشىندە, قازىلار القاسىنىڭ شەشىمى جانە حالىقتىق ونلاين-داۋىس بەرۋ ناتيجەلەرى بويىنشا, سونداي-اق, كوروناۆيرۋستىق ينفەكتسيانىڭ تارالۋىنىڭ الدىن الۋ جانە بولدىرماۋ بويىنشا قازۇۋ عالىمدارى ۇسىنعان ازىرلەمەلەر جوعارى باعالارمەن اتاپ ءوتىلدى. www.kaznu.kz دەرەكتەرىنە سۇيەنسەك, قازىلار القاسىنىڭ نازارىنا ۇسىنىلعان قازۇۋ-دىڭ بيولوگيالىق ىدىرايتىن ماتەريالدان قولدى قورعاۋ قۇرالدارىن جاساۋ, ۆيرۋسقا قارسى پرەپارات جاساۋ, دەزينفەكتسيالىق جۋ قۇرالدارىن شىعارۋ, جاڭا يممۋنوستيمۋلياتورلاردى الۋ, تۇيمەداق سىعىندىسى بار تەرى انتيسەپتيگىن ءوندىرۋ بويىنشا جوبالارى جوعارى دارەجەدە تيىمدىلىككە يە. ءارى جۇزەگە اسىرۋعا دايىن جوبالار رەتىندە ۇكىمەتتىڭ قاراۋىنا, سونىمەن بىرگە قىزىعۋشىلىق تانىتقان ينۆەستورلارعا ۇسىنىلاتىن بولادى.
پروفەسسور ب.ك.زاياداننىڭ باسشىلىعىمەن, «Spirulina platensis تسيانوباكتەريالارىنىڭ بيوماسساسى جانە ونىڭ پايدالى وسىمدىكتەرمەن ءار ءتۇرلى كومبيناتسيالارى نەگىزىندەگى كوروناۆيرۋستان قورعانۋ ماقساتىندا جاڭا يممۋنوستيمۋلياتورلاردى الۋ» جوباسى, قازىلار القاسىنىڭ باعالاۋ ناتيجەلەرى بويىنشا بايقاۋ جەڭىمپازدارى قاتارىنا كىردى جانە ەڭ كوپ 653 – داۋىس جيناي وتىرىپ, «حالىقتىق» توپ-جوبالار ءتىزىمىن باسقاردى. جوبانىڭ ءمانى تسيانوباكتەريالاردىڭ بيوماسساسى جانە ونىڭ پايدالى وسىمدىكتەرمەن ءارتۇرلى كومبيناتسيالارى نەگىزىندە, كوروناۆيرۋستان قورعانۋ ماقساتىندا, انتيباكتەريالدى, انتيۆيرۋستىق, پروبيوتيكالىق جانە انتيوكسيدانتتىق قاسيەتتەرى بار جاڭا يممۋنوستيمۋلياتورلاردى الۋ تەحنولوگياسىن ازىرلەۋ بولىپ تابىلادى.
بايقاۋ قورىتىندىسى بويىنشا «عىلىم قورى» اق مۇددەلى تاراپتارمەن بىرلەسىپ, كەلىپ تۇسكەن ۇسىنىستاردى جىلجىتۋ جانە ىسكە اسىرۋ بويىنشا جۇمىس جۇرگىزەدى.
الماتى
