اتالعان زاڭ جوباسى پرەزيدەنتتىڭ ۇلتتىق قوعامدىق سەنىم كەڭەسىنىڭ ەكىنشى وتىرىسىندا بەرگەن تاپسىرماسىن ىسكە اسىرۋ ماقساتىندا ازىرلەندى.
بۇل قۇجاتتى دەپۋتاتتاردىڭ نازارىنا ادىلەت ءمينيسترى مارات بەكەتاەۆ ۇسىندى. ونىڭ ايتۋىنشا, زاڭ جوباسىندا پارتيالىق سايلاۋ تىزىمدەرىندە ايەلدەر مەن جاستار ءۇشىن 30% كۆوتانى قاراستىرۋ ۇسىنىلادى. وسى ماقساتتا سايلاۋ تۋرالى كونستيتۋتسيالىق زاڭدا ايەلدەر مەن جاستارعا ارنالعان كۆوتالاردى پارتيالىق تىزىمگە ەنگىزۋ تۋرالى تالاپ قويىلادى.
– جالپى, بۇگىنگى تاڭدا الەمدەگى مەملەكەتتەردىڭ باسىم بولىگى ايەلدەر مەن جاستاردىڭ سايلاۋ پروتسەسىنە تەڭ قولجەتىمدىلىگىنە كەپىلدىك بەرۋ ءۇشىن قاجەتتى شارالار قابىلداۋدا. پارتيالىق گەندەرلىك كۆوتالار ەۋروپا ەلدەرىندە قولدانىلادى جانە وسىنداي ەرەجەلەر گەرمانيا, نورۆەگيا, فرانتسيا جانە بەلگيادا كەڭىنەن تارالىپ, سايلاۋ تۋرالى زاڭ دەڭگەيىندە بەكىتىلگەن. وسىعان وراي حالىقارالىق تاجىريبە اياسىندا ۇسىنىلىپ وتىرعان جاڭا نورمالار ايەلدەردى ەلدىڭ قوعامدىق-ساياسي پروتسەستەرىنە بەلسەندى تارتۋعا مۇمكىندىك بەرەدى. سونىمەن قاتار مەملەكەت باسشىسى اتاپ وتكەندەي, ءبىز جاستاردىڭ پارلامەنتكە جانە جەرگىلىكتى وكىلەتتى ورگاندارىنا كەلۋىنە ىقپال ەتۋگە ءتيىسپىز. وسى بولىكتەگى زاڭنامالىق تۇزەتۋلەر, قوعامدىق-الەۋمەتتىك پروبلەمالاردى شەشۋ ءۇشىن قابىلەتتى جاستاردى دا ساياساتقا بەلسەندى تارتۋعا مۇمكىندىك بەرەدى, – دەدى م.بەكەتاەۆ.
