پسيحولوگ ماماندار زارارسىزداندىرۋ جۇمىستارىنا, بلوك-بەكەتتەرگە جانە قالا كوشەلەرىن پاترۋلدەۋگە تارتىلعان اسكەري قىزمەتشىلەرگە شۇعىل-پسيحولوگيالىق كومەك كورسەتۋدە. توتەنشە جاعدايدا ءار اسكەري قىزمەتشىنىڭ پسيحولوگيالىق جاي-كۇيى پسيحولوگتار تاراپىنان تۇراقتى قاداعالاۋدى جانە زەردەلەۋدى قاجەت ەتەدى.
«سول سەبەپتى ترەنينگتەر مەن تەرەڭ تىنىس الۋ جاتتىعۋلارى, جەكە اڭگىمەلەسۋ ادامنىڭ قالىپتى ومىرگە قايتا كەلۋىنە ىقپال ەتەدى. سونداي-اق, اتالعان ترەنينگتەر ءتىپتى پسيحولوگ مامانى جوق كەزدە دە اسكەري قىزمەتشىلەردىڭ ءوزارا ءبىر-بىرىنە پسيحولوگيالىق كومەك, مورالدىق قولداۋ كورسەتۋىنە سەپتىگى زور», - دەپ اتاپ ءوتتى راديوەلەكترونيكا جانە بايلانىس اسكەري-ينجەنەرلىك ينستيتۋتى پسيحولوگيالىق قىزمەت كورسەتۋ قىزمەتىنىڭ باستىعى پودپولكوۆنيك ساندۋعاش داۋرەنبەكوۆا.
ينستيتۋتتىڭ ءباسپاسوز قىزمەتىنىڭ مالىمەتى بويىنشا, ماماندار زارارسىزداندىرۋ جۇمىستارىنا شىعار الدىندا مورالدىق-پسيحولوگيالىق تۇراقتىلىعىن انىقتاپ, ولاردى ىرىكتەۋ ماقساتىندا ەكسپرەسس-تەستىلەۋ ارقىلى پسيحودياگنوستيكالىق جۇمىس جۇرگىزىلەدى. ودان كەيىن ارت-تەراپيا ءادىسى ارقىلى (سۋرەت سالۋ, پلاستيليننەن بەينە سالۋ ارقىلى) جەكە قۇرامنىڭ ىشكى سەزىمى مەن كوڭىل-كۇيى انىقتالادى. وعان قوسىمشا پسيحولوگيالىق اڭگىمەلەسۋ, ادامنىڭ فيزيكالىق جانە فيزيولوگيالىق جاي-كۇيىن رەتتەۋگە باعىتتالعان تىنىس الۋ جاتتىعۋلارى جاسالادى. زارارسىزداندىرۋ جۇمىستارىنان قايتىپ كەلگەننەن كەيىن دە پسيحولوگيالىق اڭگىمەلەسۋ جۇرگىزىلىپ, رەلاكساتسيالىق ترەنينگتەر وتكىزىلەدى.
الماتى
