سانجار جامبىل وبلىسى, شۋ اۋدانى, جاڭا جول اۋىلىندا تۋىپ, باۋىرجان مومىش ۇلى اتىنداعى ورتا مەكتەپتە ءبىلىم العان. وسى مەكتەپتە اناسى مەن اپكەسى مۇعالىم بولىپ قىزمەت ەتەدى. كارانتين ەنگىزىلىپ, قاشىقتىقتان وقىتۋ رەجيمىنە اۋىسقاننان كەيىن مۇعالىمدەر مەن وقۋشىلار قيىندىقتارعا تاپ بولا باستادى. مۇعالىمدەر ءۇشىن قاشىقتىقتان وقىتۋ جاڭا, ۇيرەنشىكسىز جاعداي ەدى. ويتكەنى ينتەرنەت جۇيەلەرىن قالاي پايدالانۋ كەرەكتىگىن, وقۋ ماتەريالدارىن قايدا ورنالاستىرىپ, كۋرستاردى قالاي قۇرۋدى ولاردىڭ كوپشىلىگى بىلە بەرمەيدى.
مەكتەپكە كومەكتەسۋ ءۇشىن سانجار دومەن ساتىپ الىپ, حوستينگ اقىسىن تولەپ, ءىپ وقۋشىلارعا ارنالعان http://do-school.kz/ ءبىلىم بەرۋ پورتالىن ىسكە قوستى. سايتتى ازىرلەۋ ءۇشىن ول Moodle پلاتفورماسىن قولدانىپ, مۇعالىمدەرگە ارناپ سايتپەن جۇمىس ىستەۋ تۋرالى بەينەجازبا جاسادى.
IT قۇرالدارىمەن جۇمىس ىستەۋگە مەكتەپ مۇعالىمدەرىنىڭ ءبارى بىردەي دايىن ەمەس, سوندىقتان ولار WhatsApp پەن الەۋمەتتىك جەلىلەردى قولدانۋدى جالعاستىرۋدا. قازىرگى ۋاقىتتا do-school.kz سايتىندا 672 قولدانۋشى تىركەلگەن. ولاردىڭ ىشىندە 150 ادام سايتتى پايدالانادى, ال پايدالانۋشىلار سانى بىرتىندەپ وسۋدە.
سايتتى ازىرلەۋ ءۇشىن سانجاردىڭ ءبىر اپتا ۋاقىتى كەتتى. بۇل قادامىنا وعان ساتباەۆ ۋنيۆەرسيتەتىندە «اقپاراتتىق جۇيەلەر» ماماندىعى بويىنشا 3-كۋرستا العان ءبىلىمىنىڭ كوپ كومەگى ءتيدى.
«مەن ۆەب-سايتتاردى ازىرلەۋمەن كوپتەن بەرى اينالىسىپ كەلەمىن, ۆەب-سايت قۇرۋ ماعان قيىن بولعان جوق. ماماندىق تاڭدايتىن ۋاقىت كەلگەندە, كوپ ويلانباستان وزىمە ۇنايتىن ىسپەن اينالىسسام دەپ شەشتىم دە, باعدارلامالاۋ ماماندىعىن تاڭدادىم. ال ساتباەۆ ۋنيۆەرسيتەتى – قازاقستانداعى ەڭ دامىعان الدىڭعى قاتارلى تەحنيكالىق ۋنيۆەرسيتەت بولعاندىقتان, مەنىڭ تاڭداۋىم وسىعان توقتادى. وقۋدىڭ العاشقى كۇندەرىنەن باستاپ-اق مەن وقىتۋشىلاردىڭ كاسىپقوي مامان ەكەندىگىنە نازار اۋداردىم. مەنىمەن بىرگە وقيتىن ستۋدەنتتەر دە دارىندى, ءارى وتە ءبىلىمدى بولىپ شىقتى. وقۋ وتە قيىن, سوندىقتان ءوزىم كوپ دايىندالامىن, ويتكەنى مەن جاقسى باعدارلاماشى, ءوز ءىسىمنىڭ مامانى بولعىم كەلەدى. قاشىقتىقتان وقىتۋ رەجيمىنە اۋىسۋ ۋنيۆەرسيتەت ءۇشىن ەش قيىندىق تۋدىرعان جوق. ءبىز ءتىپتى ايىرماشىلىقتى سەزبەدىك تە. ۇنەمى توپپەن, وقىتۋشىلارمەن, ەدۆايزەرمەن بايلانىستا بولامىز. ولار ءبىزدىڭ وقۋىمىزدى باقىلاپ, قولداۋ كورسەتەدى. ساباقتار كەستە بويىنشا ناقتى ۋاقىت ىشىندە وتەدى, الدىمەن وقىتۋشىنىڭ ءدارىسى, سودان كەيىن پىكىرتالاس تۇرىندە وتكىزىلەدى. Polytech online.kz پورتالىنداعى توپتا سۇراقتار قويىپ, ءبىر-بىرىمىزبەن پىكىر الماسامىز, كەيدە ازىلدەسەمىز. سونىمەن قاتار ءبىز GitLab, Telegram, Discord پورتالدارىن دا قولدانامىز» دەيدى سانجار.
سانجاردىڭ ءوزى دە قاشىقتان ءبىلىم الىپ ءجۇر. ۋنيۆەرسيتەتتە وقۋمەن قاتار, ول وسى جوعارى وقۋ ورنىندا وپەراتور بولىپ جۇمىس ىستەيدى. ساتباەۆ ۋنيۆەرسيتەتىنىڭ ونلاين كۋرستارىنا ارنالعان بەينەجازبالاردى جاسايدى. سوندىقتان ول ۋنيۆەرسيتەتتىڭ قاشىقتىقتان ءبىلىم بەرۋ فورماتىن اۆتور رەتىندە دە, قولدانۋشى رەتىندە دە باعالاي الادى. كارانتين كەزەڭىندە رەسپۋبليكانىڭ بارلىق ۋنيۆەرسيتەتتەرى مەن مەكتەپتەرى قاشىقتىقتان وقىتۋ رەجيمىنە اۋىستى. سانجاردىڭ تاپقىرلىعىنىڭ ارقاسىندا اۋىل بالالارى جاڭا توقساننىڭ ءبىرىنشى كۇنىنەن باستاپ ساباققا كىرىسىپ كەتتى. ۋنيۆەرسيتەت قابىرعاسىندا العان بىلىمدەرى مەن تاجىريبەسىن ومىردە قولدانىپ, دارىندىلىق تانىتقانى ءۇشىن ساتباەۆ ۋنيۆەرسيتەتىنىڭ وقىتۋشىلارى ءوز ستۋدەنتىن ماقتان تۇتادى.
الماتى
