بيۋرو وتىرىسىندا زاڭ جوبالارى بويىنشا نەگىزگى كوميتەتتەر بەلگىلەنىپ, سەناتتىڭ 30 ساۋىرگە جوسپارلانعان كەزەكتى وتىرىسىنىڭ كۇن ءتارتىبى بەكىتىلدى.
داريعا نازارباەۆا ءسوزىنىڭ باسىندا پالاتا وتىرىسىنىڭ كۇن تارتىبىنە ەنگىزىلگەن زاڭ جوبالارى مەملەكەت پەن قوعام ءۇشىن اسا ماڭىزدى ەكەنىن, سوڭعى جىلدارى ازاماتتارىمىز كوتەرىپ جۇرگەن كوپتەگەن ماسەلە وسى جاڭا زاڭنامالىق اكتىلەردە كورىنىس تاپقانىن اتاپ ءوتتى.
– «ارداگەرلەر تۋرالى» جانە «كەيبىر زاڭنامالىق اكتىلەرگە الەۋمەتتىك قامسىزداندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارى وتانىمىزدىڭ الدىندا اسكەري جانە ازاماتتىق بورىشىن وتەگەن ارداگەرلەر مەن ازاماتتاردىڭ قۇقىقتارى مەن الەۋمەتتىك مۇددەلەرىن قورعاۋ ماسەلەلەرىن رەتتەۋگە باعىتتالعان. سونىمەن قاتار وسى قۇجاتپەن باسقا مەملەكەتتەردىڭ اۋماعىندا ۇرىس قيمىلدارىنا قاتىسقان ارداگەرلەردىڭ جاڭا ساناتى ەنگىزىلەدى. سونىمەن كاتار ءبىز بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭ جوباسىن دا قارايمىز. بۇل زاڭ جوباسى ەلىمىزدە جينالىستار مەن ميتينگىلەر ۇيىمداستىرۋ, وتكىزۋدىڭ قازىرگى پراكتيكاسىن تۇبەگەيلى تۇردە وزگەرتەدى. جوبا ازاماتتاردىڭ قۇقىقتارىن, ميتينگىلەر وتكىزۋ كەزىندەگى جاۋاپتىلىقتى وڭتايلى ۇشتاستىرۋعا باعىتتالعان جانە تۇتاستاي العاندا حالىقارالىق ستاندارتتارعا سايكەس كەلەدى, – دەدى د.نازارباەۆا.
سەنات توراعاسى جيىن سوڭىنا قاراي ەلىمىزدە كوروناۆيرۋس جۇقتىرعاندار سانى ارتىپ, ۇدەمەلى كەزەڭگە جەتۋىنە بايلانىستى توتەنشە جاعداي ءتارتىبىنىڭ 1 مامىرعا دەيىن ۇزارتىلۋى قاجەتتى شارا بولعانىن اتاپ ءوتتى. بۇگىننەن باستاپ نۇر-سۇلتان جانە الماتى قالالارىنداعى كەيبىر كاسىپكەرلىك سۋبەكتىلەرى سانيتارلىق-ەپيدەميولوگيالىق شارالاردى ساقتاي وتىرىپ, جۇمىستارىن باستايدى. وسىعان بايلانىستى داريعا نازارباەۆا كاسىپورىندار قىزمەتكەرلەرىن جۇمىسقا شىعارۋعا دايىن با جانە ۇجىمدارىنا قاۋىپسىزدىك پەن گيگيەنا ساقتاۋعا قاجەتتى بارلىق جاعدايدى جاساي الا ما دەگەن سۇراققا ءمان بەرىپ قارادى.
سەنات توراعاسى ەلىمىزدىڭ توتەنشە جاعداي كەزىندەگى قولدانىستاعى اكىمشىلەندىرۋ, مەملەكەتتىك ورگانداردى ۇيلەستىرۋ, زاڭناما مەن زاڭنان كەيىنگى اكتىلەر جۇيەسىن تالداۋ قاجەتتىگىن ايتا كەلىپ, توتەنشە جاعداي مەن توتەنشە وقيعا تارتىبىنە ەلدى جۇمىلدىرۋ دايىندىعى تاقىرىبىنا ارنالعان پارلامەنتتىك تىڭداۋلاردى سەناتتىڭ قازان ايىنداعى جۇمىس جوسپارىنا ەنگىزۋدى ۇسىندى.
– اكىمدىكتەر بەرگەن اقپاراتتارعا سايكەس, ورتالىق پەن جەرگىلىكتى جەرلەردەگى جۇمىستى ۇيلەستىرۋ ناشار, كەلىسۋ مەن ماسەلەنى شەشۋگە كوپ ۋاقىت كەتەدى. جۇمىلدىرۋ رەزەرۆى تۋرالى ماسەلە اۋقىمدى بولىپ وتىر. قازىر بىزدە جۇمىلدىرۋ دايىندىعى بويىنشا زاڭ جوباسى بار. ول زاماناۋي تالاپتارعا جۇيەلى ءارى كەشەندى تۇردە جاۋاپ بەرە المايدى. جاقسى بولسا دا, جامان بولسا دا بىزدە قازىر ءىس جۇزىندە تاجىريبە بار جانە ونى قىزمەتىمىزدە پايدالانۋ كەرەك, – دەدى ول.
سونىمەن قاتار داريعا نازارباەۆا بۇقارالىق اقپارات قۇرالدارىندا جاريالانعان جۋرناليستەر, دارىگەرلەر, پوليتسيا مەن اسكەري قىزمەتكەرلەردىڭ, ەرىكتىلەردىڭ قاتىسۋىمەن ورىن العان كەلەڭسىز كورىنىستەرگە دە توقتالدى.
– بۇگىنگى تاڭدا دارىگەرلەر دە, جۋرناليستەر دە العى شەپتە قىزۋ ەڭبەك ەتىپ جاتقانىن ەسكە سالعىم كەلەدى. ولار ىقتيمال قاۋىپ-قاتەرمەن كۇندە بەتپە-بەت كەلسە دە وزدەرىنىڭ كاسىبي بورىشىن ادال اتقارىپ ءجۇر. سوندىقتان ولارعا قۇقىقتىق قورعاۋ مەن ادامي قولداۋ اسا قاجەت. قازىر – كىنالىنى ىزدەمەي, تۇسىنبەۋشىلىكتەردى ورشىتپەي, وزەكتى ماسەلەلەردى بىرىگىپ شەشىپ, ىنتىماقپەن جۇمىس ىستەيتىن, ءبىر-بىرىنە كومەكتەسەتىن ۋاقىت. بۇل رەتتە قۇقىق قورعاۋ ورگاندارىنىڭ قىزمەتكەرلەرىنە باعىنباۋ, اسىرەسە پوليتسياعا شابۋىل جاساۋ نەمەسە قارسىلىق كورسەتۋدىڭ جولىن كەسۋ كەرەك. قۇقىق قورعاۋ ورگاندارىنىڭ قىزمەتكەرلەرى ءوز وكىلەتتىلىكتەرىنىڭ اياسىندا عانا ارەكەت ەتۋى, سىپايى, ادەپتى بولۋى ءتيىس. بارىنە دە قيىن, بىراق ءبىر-بىرىمىزگە جاردەمدەسىپ قانا وسى جاعدايدان تەزىرەك شىعا الامىز, – دەدى سەنات توراعاسى.
