بۇگىن سىبايلاس جەمقورلىققا قارسى ءىس-قيمىل اگەنتتىگىنىڭ اكىمشىلىك-قۇقىقتىق دەپارتامەنتىنىڭ ديرەكتورى ايگۇل بازارباەۆا ونلاين رەجيمدە وتكەن ءباسپاسوز ءماسليحاتىندا ەلباسى مەن مەملەكەت باسشىسىنىڭ تاپسىرمالارىنا سايكەس اگەنتتىك جاڭا باستامالاردى قولعا الىپ وتىرعانىن مالىمدەدى. سونىڭ ءبىرى – جەمقورلاردىڭ جاۋاپكەرشىلىگىن قاتاڭداتۋ ماسەلەسى. بۇل رەتتە اۋىر جانە اسا اۋىر سىبايلاس جەمقورلىق قىلمىسىمەن سوتتالعان ادامداردىڭ جازاسىن وتەۋ مەرزىمىن ۇلعايتۋ ۇسىنىلىپ وتىر.
مۇنداي شەشىمگە كەلەردە باق بەتتەرىندە جاريالانعان ماتەريالدارعا مونيتورينگ جاسالعان ەكەن. ناتيجەسىندە سوتتالعان جەمقورلاردىڭ شارتتى تۇردە بوستاندىققا شىعۋى قوعامنىڭ ىزاسىن تۋدىراتىنى بايقالعان. كوپشىلىك بيۋدجەت قاراجاتىن ميلليونداپ جىمقىرعان جانە لاۋازىمىن اسىرا پايدالانعان تۇلعالاردىڭ جازانى جەڭىلدەتۋگە بولمايدى, ولار مەرزىمىن تولىق وتەۋى ءتيىس دەگەن پىكىردە.
بۇعان قوسا اگەنتتىك وكىلى ارنايى ساۋالداما جۇرگىزگەندەرىن, وعان 58 مىڭ ادام قاتىسقانىن اتاپ ءوتتى. رەسپوندەنتتەردىڭ 63%-ى جەمقورلاردىڭ ءادىل جازالانبايتىنىن جانە ولار ءۇشىن جازانى جۇمسارتۋدىڭ قۇقىقتىق امال-شارعىلارى بار ەكەنىن العا تارتقان.
سوندىقتان اگەنتتىك سىبايلاس جەمقورلىقتىڭ جازاسىن بارىنشا كۇشەيتۋدى قاراستىرىپ جاتىر. ۇسىنىستاردىڭ ىشىندە جەمقورلارعا سالىناتىن ايىپپۇلداردى الىپ تاستاۋ ماسەلەسى دە قوزعالعان. بۇل ولاردىڭ جازاسىن جەڭىلدەتۋگە, سۋديالاردىڭ بۇرا تارتۋىنا سەپ بولادى دەگەن كوزقاراس بار.
