سىبايلاس جەمقورلىققا قارسى ءىس-قيمىل اگەنتتىگىنىڭ وڭىرلەردەگى دەپارتامەنتتەرى بيۋدجەت قاراجاتىنا قول سۇققاندار مەن قىزمەتىن بۇلداپ پارا دامەتكەندەردىڭ جىمىسقى ارەكەتتەرىن انىقتادى.
قوستاناي وبلىسىنداعى دەپارتامەنت ءتۇرلى ايلا-شارعىمەن مەملەكەتتىك سۋبسيديادان 37 ملن تەڭگەنى جىمقىردى دەگەن كۇدىكپەن بىرقاتار ازاماتتى سوتقا دەيىن تەرگەي باستادى. كۇدىككە ىلىنگەندەر – وبلىستىق اۋىل شارۋاشىلىعى جانە جەر قاتىناستارى باسقارماسىنىڭ لاۋازىمدى تۇلعالارى, سونداي-اق جىتىقارا جانە جانگەلدين اۋداندارى اكىمدىكتەرىنىڭ اۋىل شارۋاشىلىعى ءبولىمىنىڭ باس ماماندارى. ولار جايىلىم جانە مال ءوسىرۋ شارۋاشىلىعىن سۋمەن قامتاماسىز ەتۋ بويىنشا شارۋا قوجالىقتارىنىڭ ءىس جۇزىندە ورىنداماعان جۇمىستارىن راستاۋ ارقىلى قوماقتى قارجىنى قالتاعا باسپاق بولعان.
اگەنتتىكتىڭ الماتى وبلىسى بويىنشا دەپارتامەنتى قىزمەتىن اسىرا پايدالانىپ پارا الۋدىڭ ەكى فاكتىسىن نازارعا الدى. ونىڭ ءبىرى مال ۇرلاعان ازاماتتى جاۋاپكەرشىلىككە تارتپاۋ ءۇشىن 300 مىڭ تەڭگە العان ىلە اۋداندىق پوليتسيا باسقارماسىنىڭ جەدەل ۋاكىلى بولدى.
بۇعان قوسا جشس قىزمەتى تۋرالى تەكسەرۋ اكتىسىنە سايكەس وڭ شەشىم شىعارعانى ءۇشىن 665 مىڭ تەڭگە الدى دەگەن كۇدىكپەن توتەنشە جاعدايلار دەپارتامەنتىنىڭ قاراساي اۋدانىنىڭ توتەنشە جاعدايلار جونىندەگى ءبولىمى باستىعى مەن اعا ينجەنەرى سوتقا دەيىن تەرگەلەدى.
اقتوبە وبلىسىندا كا-168/1 مەكەمەسى كۇزەتىنىڭ ينجەنەرلىك-تەحنيكالىق قۇرالدارىنىڭ كۇردەلى جوندەۋىنە بولىنگەن 5 ملن تەڭگە سوماسىنداعى بيۋدجەت قاراجاتىن جىمقىرعان ءىىم قاجك «ەڭبەك-اقتوبە» رمك وبلىستىق فيليالىنىڭ ديرەكتورىنا قاتىستى قىلمىستىق ءىس تەرگەلىپ جاتىر. ىزدەۋدە بولعان كۇدىكتى ۇستالىپ, اقتوبە قالاسىندا ىشكى ىستەر دەپارتامەنتىنىڭ ۋاقىتشا ۇستاۋ يزولياتورىنا قامالدى.
شىعىس قازاقستاندا ستانسانىڭ كەزەكشىسىنەن جالپى قامقورلىعى ءۇشىن 200 مىڭ تەڭگە العان «قتج-جۇك تاسىمالى» اق سەمەي فيليالى «جاڭعىز-توبە» ستانساسىنىڭ باستىعىنا قاتىستى قىلمىستىق ءىستى تەرگەۋدى باستادى.
بۇعان قوسا نۇر-سۇلتان قالاسى بويىنشا دەپارتامەنت جەكە كاسىپكەرلەردەن مەملەكەتتىك ساتىپ الۋلار تۋرالى كەلىسىمشارت جاساعانى جانە سول بويىنشا تولەم جۇرگىزگەنى ءۇشىن جالپى سوماسى 623 مىڭ تەڭگە كولەمىندە پارا الدى دەگەن كۇدىكپەن استانالىق مەكتەپ ديرەكتورىن سوتقا دەيىن تەرگەي باستادى.
جوعارىدا اتالعان كۇدىكتى تۇلعالاردىڭ كىناسىنىڭ دارەجەسىن انىقتاپ, تۇپكىلىكتى شەشىمدى سوت شىعارادى. وتكەن اپتادا وسىنداي قىلمىسى دالەلدەنگەندەرگە قاتىستى بىرقاتار ۇكىم شىعارىلدى.
وسىعان دەيىن پاۆلودار وبلىسىنىڭ سىبايلاس جەمقورلىققا قارسى قىزمەتى 2018 جىلى تاۋارلىق-ماتەريالدىق قۇندىلىقتاردى ساتىپ الۋ تۋرالى جالعان مامىلە جاساسۋ ارقىلى 6,3 ملن تەڭگە كولەمىندەگى بيۋدجەت قاراجاتىن جىمقىرعان «قازاقستان سۋ جولدارى» رمقك پاۆلودار فيليالىنىڭ باسشىسىن سوتقا دەيىن تەرگەگەن. بيىل 7 ساۋىردە پاۆلودار قالاسىنىڭ №2 سوتىنىڭ ۇكىمىمەن اتالعان باسشى 2 جىل مەرزىمگە باس بوستاندىعىنان جانە ءومىر بويىنا مەملەكەتتىك قىزمەتتە لاۋازىم اتقارۋ قۇقىعىنان ايىرىلدى.
سولتۇستىك قازاقستان وبلىسىنداعى دەپارتامەنت ەنشىلەس كاسىپورىنداردى تارتۋ ارقىلى جەرگە ورنالاستىرۋ جانە جەر كاداسترلىق جۇمىستارىن جۇرگىزۋ بويىنشا قىزمەتتەرگە اقى تولەۋ رەتىندە بولىنگەن 574 ملن تەڭگە بيۋدجەت قاراجاتىن قالتاعا باسقان وبلىس اكىمدىگىنىڭ قارجى باسقارماسى باسشىسىنىڭ ورىنباسارى ا.ز.قاليەۆكە قاتىستى سوتقا دەيىنگى تەرگەۋدى اياقتادى. 2020 جىلى 4 ساۋىردە پەتروپاۆل قالاسى سوتىنىڭ ۇكىمىمەن ا.ز.قاليەۆ 8 جىلعا باس بوستاندىعىنان ايىرىلىپ, ءومىر بويى مەملەكەتتىك قىزمەتتەن الاستاتىلدى. وسى ۇكىممەن د.ب.قاليەۆا 6 جىلعا باس بوستاندىعىنان ايىرىلدى.
سونىمەن قاتار اۋداندىق سوتتىڭ توراعاسىنا قاتىستى قىلمىستىق-پروتسەسسۋالدىق كودەكستىڭ 200-بابىنا سايكەس جاسالعان ۇسىنىستى قاراۋ ناتيجەلەرى شىقتى. بۇعان دەيىن سىبايلاس جەمقورلىققا قارسى قىزمەت قىلمىس جاساۋ تۋرالى جالعان فاكتىسى بويىنشا سوتقا دەيىنگى تەرگەۋ بارىسىندا قىلمىستىق قۇقىقبۇزۋشىلىق پەن باسقا دا زاڭ بۇزۋشىلىققا اكەلىپ سوققان جاعدايلاردى جويۋ بويىنشا ۇسىنىم ەنگىزگەن ەدى.
قازاقستان رەسپۋبليكاسى سۋديالار وداعىنىڭ الماتى فيليالى سۋديالارىنىڭ ەتيكاسى كوميسسياسىنىڭ 2020 جىلعى 3 ساۋىردەگى حاتتامالىق شەشىمىمەن الماتى قالاسىنىڭ المالى اۋداندىق سوتىنىڭ توراعاسى ق.ارىپوۆكە قاتىستى سوت ەتيكاسىنا قايشى كەلەتىن تارتىپتىك تەرىس قىلىق جاساعانى ءۇشىن قوعامدىق ايىپتاۋ شىعارىلدى.
