كوپشىلىكتىڭ ىقىلاسىنا بولەنگەن ايتۋلى جوبانى كەزەكتە رەت جامبىل اتىنداعى مەملەكەتتىك فيلارمونيانىڭ ءسوليسى, ءداستۇرلى ءانشى, حالىقارالىق بايقاۋلاردىڭ لاۋرەاتى ماقپال قازىبەكقىزى جالعاماق. كوڭىل قۇرىشىن قاندىراتىن ماقپال داۋىستىڭ يەسى 22 ءساۋىر كۇنى ساعات 20.00-دە ونەر ورداسىنىڭ رەسمي پاراقشالارىنان تىكەلەي جەلىگە شىعىپ, ونەر سۇيەر قاۋىممەن ديدارلاساتىن بولادى.
ونلاين كونتسەرتتە ءسۇيىنباي ارون ۇلىنان «جاقسى مەن جاماننىڭ ايىرماسى», «اقىن بولدىم جيىرمامدا», ء«بىز سونارشى», جامبىل جاۋھارلارىنان «سارىبايعا», «جيىرما بەس» سەكىلدى تۋىندىلار ورىندالادى. سونداي-اق كەنەننىڭ «ويجايلاۋى», ماناربەك ەرجانوۆتىڭ «سايرا بۇلب ۇلى», حالىق ءانى «بۇلبۇل قۇسىم», يسا بايزاقوۆتىڭ «جەلدىرمەسى», «ابدىعاليدىڭ تەرمەسى» سەكىلدى تانىمال تۋىندىلاردى جاندى داۋىستا تىڭداۋدىڭ تاپتىرماس مۇمكىندىگى تۋىپ وتىر.
دالا جاۋھارلارىنىڭ قاينارىنان قانىپ ءىشىپ, ءداستۇرلى ونەرىمىزدى دارىپتەپ جۇرگەن ءانشى ءوز ويىمەن ءبولىستى.
–جەتىسۋ وڭىرىندەگى جىرشىلىق ءداستۇردى تىلگە تيەك ەتكەن كەزىمىزدە ءسوز زەرگەرى ءسۇيىنباي ارون ۇلىنان اينالىپ وتە الماسىمىز انىق. ەسىمى تۇبەك, قابان جىراۋلارمەن قاتار اتالىپ, دارىپتەلەتىن ءسۇيىنباي اقىن زامانىندا ەل مەن ەلدى, ەر مەن ەردى بىرىكتىرىپ, بىتىستىرۋدە ەلەۋلى ەڭبەك ەتكەن ءسوزى وتكىر, ويى ۇشقىر اقىن بولعان. شىعىستىڭ قۇندى قازىناسى «مىڭ ءبىر ءتۇن», «شاحناما» سياقتى اڭىز-ەرتەگىلەردى وزىنشە جىرلاپ, تىڭداۋشىسىن ءتانتى ەتكەن ەرەكشە تۇلعا. سول سەكىلدى جەتىسۋ مەكتەبىن ءسوز ەتكەندى جىر الىبى جامبىلدى دا اتاماي كەتە المايمىز. كەڭ دالانى اسەم انىمەن تەربەتكەن كەنەن شىعارمالارى دا ۇرپاق ءۇشىن ماڭگى مۇرا. كونتسەرتتە بۇدان باسقا دا ەڭ تاڭداۋلى تۋىندىلاردى كورەرمەنگە تارتۋ ەتپەكپىن, – دەيدى ءداستۇرلى ءانشى ماقپال قازىبەكقىزى.
