ءتۇبى ءبىردىڭ تىلەگى ءبىر

استانادا قالالىق ۇيعىر مادە­نيەت ورتالىعى مەن جاستار بىرلەس­تىگىنىڭ ۇيىمداستىرۋىمەن ىقىلىم زاماننان بەرى بالقان تاۋى مەن ورتالىق ازيا ارالىعىندا تويلا­نىپ كەلە جاتقان ناۋرىز مەيرا­مىنا ارنالعان مەرەكەلىك كەش ءوتتى. ءۇش مىڭ جىلدىق تاريحى بار ناۋ­رىز جىل باسىن, جاڭارۋ كۇنىن عانا ەمەس, ول سونىمەن بىرگە حالىق­تار اراسىنداعى دوستىقتىڭ, ىنتى­ماق­تىڭ, ىرىس-بەرەكەنىڭ, بىرلىك پەن تاتۋلىقتىڭ باستاۋىن بىلدىرەتىن ءاز مەيرام. سوندىقتان دا بۇل مە­رەكەنىڭ ءبىر ۇلتقا عانا ەمەس, جالپىعا بىردەي بولىپ, ۇلىستاردىڭ ۇيىت­قىسىنا اينالۋى عاسىردان عاسىرعا ۇلاسىپ, حالىقتار اراسىندا كەڭىنەن اتالىپ كەلە جاتقانى تابيعي زاڭ­دىلىق. وسى ورايدا ەلىمىزدە بيىلعى ناۋرىز مەيرامى دا قا­لىپتاسقان ءداستۇر بويىنشا كەڭىنەن تويلان­عانىن اتاپ ءوتۋ ءجون. بيىل جىل باسىن بىلدىرەتىن مەرەكە كۇندەرىندە ەلىمىزدە تاتۋ-ءتاتتى, دوستىق پەن ىن­تىماعى جاراسىپ تۇ­رىپ جاتقان ۇلتتار اراسىندا دا ناۋ­رىز مەيرا­مىنا زور كوڭىل ءبولىندى. ماسەلەن, قازاق حالقىمەن تامىرى تەرەڭدەس, ءتۇبى ءبىر ۇيعىر حالقىنىڭ اراسىندا بۇل مەيرام وزدەرى جيناقى تۇراتىن ەلدى مەكەندەرمەن قوسا, ەلىمىزدىڭ باس قالاسىندا دا وتكىزىلگەنىن اتاپ وتۋگە بولادى. استانادا ۇيعىر دياسپو­را­سىنىڭ وتكىزگەن سونداي ءبىر كە­شى “اق شاڭىراق” مەيرامحا­نا­سىندا جايىلعان اق داستارقان باسىندا ۇيىمداستىرىلدى. كەشتە استانا قالالىق ۇي­عىر مادەنيەت ورتالىعىنىڭ جەتەك­شىسى مۇرات توقتىباقيەۆ سياقتى اعا ۇرپاق وكىلدەرى مەن قالالىق ۇي­عىر جاستار بىرلەس­تى­گىنىڭ ءتورايى­مى نارگيز ماح­مۋ­دوۆا باستاعان جاستار جاعى جينالعان قاۋىمعا اق تىلەكتەرىن ايتىپ, ۇيعىر حال­قىنىڭ سالت-ءداس­­تۇر­لەرىنەن قويى­لىم كور­سەتسە, وقۋشىلار ارا­سىنان №40 قازاق ورتا مەكتەبىنىڭ (ديرەك­تورى ەربول ءىسلام ۇلى) 3-سىنىپ وقۋشىسى ارۋجان ارزيدۋنقىزى ەلىمىزدىڭ ءانۇ­را­نىن مەملەكەتتىك تىلدە شىرقاپ, ونىمەن بىرگە مەملەكەتتىك تىلدە, ۇيعىر جانە ورىس تىلدەرىندە ءان ايتىپ, كوپشىلىكتىڭ قوشەمەتىنە ءبو­لەندى. وسىلايشا, ناۋرىز مەيرامىن تويلاعان ۇيعىر دياسپوراسىنىڭ وكىلدەرى باۋىرلاس قازاق حالقىمەن ارقاشاندا جۇرەك­تەرى دە, نيەتتەرى دە ءبىر ەكەنىن كورسەتىپ بەردى. داستان كەنجالين.