كولىك باقىلاۋ دەپارتامەنتى قىزمەتكەرلەرى 30 ناۋرىزعا دەيىن التى توسقاۋىل بەكەتىندە – نۇر-سۇلتان قالاسى جانە جىبەك جولى, قوياندى, يلينكا, تالاپكەر, قوسشى اۋىلدارى ماڭىندا جۇمىس ىستەگەن. بۇگىندە ولار جىبەك جولى بەكەتىندە ساعات 9.00-دەن 1.00-گە دەيىن, قوياندى جانە كوكشەتاۋ بەكەتتەرىندە ساعات 16.00-دەن 1.00-گە دەيىن قىزمەت كورسەتەدى.
اتالعان قىزمەتكەرلەر وزدەرىنىڭ سالاسىنا سايكەس اۆتوبۋس جۇرگىزۋشىلەءرى مەن جولاۋشىلاردى تەكسەرمەيدى, تەك توسقاۋىل بەكەتتەرىنەن ءوتىپ جاتقان ازاماتتارعا كەڭەس بەرەدى. ولاردىڭ جۇمىس كەستەسى – اۋىسىمدى. جۇمىس ۋاقىتى باستالار الدىندا مەدبيكەلەر بارلىق قىزمەتكەرلەردىڭ دەنە قىزۋىن ولشەيدى. بەكەتتەردىڭ وزدەرى ارنايى زالالسىزداندىرۋ قۇرالدارىمەن جابدىقتالعان.
«كوروناۆيرۋستىڭ كەڭ تارالۋىنا جول بەرمەۋ ءۇشىن قولعا الىنعان شارالارعا قۇقىق قورعاۋ ورگاندارىمەن جانە اكىمدىك قىزمەتكەرلەرىمەن بىرلەسىپ ءبىزدىڭ قىزمەتكەرلەر دە اتسالىسىپ جاتىر. كبد قىزمەتكەرلەرى ءارى-بەرى وتكەن ادامداردىڭ مەكەن-جايىن, تىركەلگەن جەرىن, قايدان كەلە جاتقانىن جانە تاعى باسقا سەبەبىن انىقتايدى. جولاۋشىلارمەن قوسا جەڭىل كولىك جانە جۇك تاسىمالدايتىن كولىكتەردى تەكسەرەدى. ولاردىڭ تج كەزەڭىندە ءجۇرىپ-تۇرۋ ءۇشىن رۇقسات قۇجاتتارىنىڭ بولۋىن قاداعالايدى. بارلىق قىزمەتكەر بەتپەردە, قولعاپ جانە انتيسەپتيكالىق قۇرالدارمەن قامتىلدى», – دەيدى كولىك باقىلاۋ دەپارتامەنتىنىڭ ديرەكتورى سامات شايمەردەنوۆ.
