سيقىرلى سازى كۇللى الەمدى مويىنداتقان بەتحوۆەنگە تاس كەرەڭدىگى كەدەرگى بولا الماعانى سەكىلدى, جارىق الەمدى كورمەگەنىمەن, كەنەپ بەتىن كوڭىل كوزىمەن كەستەلەگەن ۋكرايندىق سۋرەتشى دميتري ديدورەنكونىڭ ونەردەگى جولى تالايعا ۇلگى بولعانىن جاقسى بىلەمىز. تالانت يەسى كوڭىلدىڭ ءبىر ساتىندە: ء«وزىڭ سالعان ورنەكتەردى كوزىڭمەن كورە الماۋ ەشتەڭە ەمەس, بارىنەن دە ساناڭ سوقىرلانسا سول جامان» دەپتى. وسى ءسوز تىرشىلىكتەن باز كەشكەن تالاي تاعدىرعا دەمەۋ بولمادى دەپ ايتا المايسىز. ون ەكى مۇشەسى ورنىندا بولسا دا, «تاس-تالاۋىم ساي ەمەس» دەپ تاۋبەسىنەن تايعاناعان پەندەنى دە ءبىر ءسات ورمان ويعا شومدىرعان بولار.
جانارى جارقىراپ تۇرماعانىمەن, ەستۋ مەن كورۋ قابىلەتى ناشار تۇلعالارعا ەرەكشە سەزگىرلىك قابىلەت بەرىلەدى دەگەندى تالاي مارتە ەستىگەنبىز. بۇل دا جاراتىلىستىڭ شەكسىز ادىلدىگىن ايگىلەپ تۇرعانداي. مۇنداي تۇلعالارعا ءبىلىم بەرۋ, ولاردى رۋحاني دامىتۋ تاقىرىبىنىڭ كوكجيەگى كەڭەيە بەرسە دەيسىڭ.
شابىت شاھارى الماتىدا مۇمكىندىگى شەكتەۋلى شىعارماشىلىق ادامدارىن قولدايتىن شارالار تىزبەگى ارا-تۇرا بوي كورسەتىپ تۇرادى. اسىرەسە قالادا سۋرەت ونەرىنە اۋەستەنەتىن جانداردىڭ كوپ ەكەنىن ەسكەرسەك, ولارعا رۋحاني مەدەت بەرۋ اۋاداي قاجەت. كۇنى كەشە وسىنداي يگى باستامانىڭ تاعى ءبىرى قانات قاقتى. قازاق بەينەلەۋ ونەرىندەگى شوقتىعى بيىك دارا دارىن يەلەرىنىڭ قولتاڭباسى ساقتالعان ءا.قاستەەۆ اتىنداعى ونەر مۋزەيى ءوز كورەرمەندەرىن كەزەكتى رەت قۋانتىپ وتىر. ىرگەلى ونەر وشاعىندا كورۋ مەن ەستۋ قابىلەتى ناشار ازاماتتار ءۇشىن ءسۋبتيترى بار ىم-يشارا تىلىندەگى بەينە-ەكسكۋرسيالار جوباسى ىسكە قوسىلدى.
قىلقالامعا ىڭكار جانداردى تانىمال تۋىندىگەرلەردىڭ ايشىقتى شىعارمالارىمەن تانىستىراتىن جاڭا جوبا ن.حلۋدوۆتىڭ «كيىز ۇيدە» تۋىندىسىمەن تۇساۋىن كەستى. الەمدى شارپىعان قاۋىپتى ىندەتكە بايلانىستى قاشىقتان قولعا الىنعان باستاما جۇرت قالىپتى ومىرگە قادام باسقان سوڭ دا ءورىسىن كەڭەيتە بەرمەك. قازىردىڭ وزىندە ەلىمىزدىڭ مىڭداعان تۇرعىنى عالامتور ارقىلى ونەر مۇراجايىنىڭ ۇجىمىنا ريزاشىلىعىن ءبىلدىرىپ جاتىر.
– كەزەكتى جوبامىز مۋزەي بازاسىندا قازاق جانە ورىس تىلىندە جارىق كورەتىن بولادى. ماقساتىمىز ايرىقشا نازار اۋدارۋدى قاجەت ەتەتىن كەلۋشىلەرىمىزگە قولجەتىمدى بەينە-ەكسكۋرسيالار قۇرۋ. ولارعا دا ونەر قولجەتىمدى بولۋى كەرەك. اتالعان ساناتتاعى بالالار مەن جاسوسپىرىمدەرگە مۋزەي كوللەكتسياسىن تانىستىرۋ ارقىلى الەۋمەتتەندىرۋ, سول ارقىلى وتانداستارىمىزدى الەۋمەتتىك-مادەني ومىرگە تارتۋدى كوزدەيمىز. باستاپقىدا «قاستەەۆ شىعارماشىلىعى» جانە «1920-1950 جىلدارداعى قازاقستان بەينەلەۋ ونەرى» زالدارىنداعى ماڭىزدى, بىرەگەي تۋىندىلار نەگىزگە الىنادى. بۇل – مۋزەيدىڭ تۇراقتى ەكسپوزيتسياسىنداعى وتە قۇندى دۇنيەلەر. ويتكەنى ول شىعارمالار ۇلتتىق بەينەلەۋ ونەرىنىڭ قالىپتاسۋى مەن دامۋىنىڭ نەگىزگى كەزەڭدەرىن بەينەلەيدى. بولاشاقتا ىم-يشارا تىلىندەگى بەينە-ەكسكۋرسيالار فورماتىن دامىتۋدى جوسپارلاپ وتىرمىز, – دەيدى كورمە جەتەكشىسى ناتاليا باجەنوۆا.
ءومىردى سۇيۋگە شابىتتاندىراتىن سەرپىلىسى بار جوبا مۋزەيدىڭ تۇراقتى ەكسپوزيتسياسىنا نەگىزدەلگەندىكتەن, بولاشاعىنان مول ءۇمىت كۇتۋگە بولادى. بۇل ءوز كەزەگىندە ينكليۋزيۆتى تەڭ مۇمكىندىكتەر قوعامىنا جاسالعان تاعى ءبىر قادام دەپ ايتار ەدىك.
الماتى
