العاشقى ەكى كۇن بويى پوليتسەيلەر تۇرعىندارعا كارانتين ەرەجەسىن بۇزباۋ تۋرالى ەسكەرتۋ, ءتۇسىندىرۋ جۇمىستارىن اتقارادى. ءتارتىپ بۇزعاندار ءۇشىنشى كۇننەن باستاپ ايىپپۇل تۇرىندەگى اكىمشىلىك جازاعا تارتىلا باستايدى.
ايماققا توتەنشە جاعداي رەجىمى ەنگىزىلگەلى 408 ادام اكىمشىلىك جاۋاپكەرشىلىككە تارتىلىپ, 40 ءتارتىپ بۇزۋشى قاماۋعا الىنعان. بۇل تۋرالى جەرگىلىكتى پوليتسيا باسقارماسىنىڭ باستىعى قۇرمەت ماجىكەنوۆ ايتتى. پاترۋل جاساقتارى كولىك قوزعالىسى مەن تۇرعىنداردىڭ ءجۇرىپ-تۇرۋىنا رۇقسات ەتىلگەن مالىمەتتەر بازاسى قوندىرىلعان پلانشەتتەرمەن قامتاماسىز ەتىلدى.
پوليتسيا ساياباققا بارۋشىلارعا ەرەكشە توقتالىپ, شەكتەۋ تارتىبىنە ساي, 1 مامىرعا دەيىن ساياباققا بارۋعا تىيىم سالىنعانىن قاداپ ەسكەرتتى. الايدا جۇمىس ورنىنا بارۋعا شەكتەۋ جوق. جۇمىسقا جەتىپ الۋ ءۇشىن ازاماتتاردىڭ قولىندا جۇمىس ورنىنان بەرىلگەن انىقتاما بولۋى كەرەك. پاترۋل توقتاتقان جاعدايدا, ازامات ناقتى قايدا بارا جاتقانىن انىقتاپ ايتىپ, ونىڭ قاجەتتىلىگىن نەگىزدەۋى شارت.
سونداي-اق, جۇمىسىن توقتاتپايتىن كاسىپورىندار جەرگىلىكتى اكىمدىكتەردىڭ كاسىپكەرلىكتى قولداۋ بولىمدەرىنە ءوتىنىش جازىپ, كولىك قوزعالىسىنا رۇقسات الا الادى. اكىمدىك بۇل مالىمەتتى پوليتسياعا جىبەرەدى.
تاكسيلەر قالا ىشىندە عانا جۇرە الادى. قالا سىرتىنا شىعۋعا رۇقسات جوق. ال قوعامدىق كولىكتەر مۇلدە توقتايدى. كارانتين رەجىمىندە جۇمىس ىستەيتىن ءىرى كاسىپورىندارعا قالا ىشىندە جۇمىسشىلارىن اۆتوبۋسپەن تاسىمالداۋعا رۇقسات ەتىلۋى مۇمكىن.
بارلىق دۇكەندەر ساعات 10.00-دە اشىلىپ, كەشكى 20.00-گە دەيىن جۇمىسىن توقتاتۋى ءتيىس.
قوستاناي وبلىسى
