بۇل قادام پاندەميادان قورعاۋ جانە جالعان اقپاراتتى تاراتۋعا قارسى كۇرەس ءۇشىن الەمنىڭ بارلىق راديوستانتسيالارىن جۇمىلدىرعان يۋنەسكو باستاماسىن قولداۋعا ارنالادى. COVID-19 تۋرالى جالعان اقپاراتقا قارسى تۇرۋ جانە سالاۋاتتى ءومىر سالتىن ناسيحاتتاۋ ماقساتىندا يۋنەسكو الەمنىڭ تۇكپىر-تۇكپىرىندەگى راديوستانتسيالار ەركىن پايدالانا الاتىن بىرقاتار اۋديو حابارلامالار سەرياسىن شىعاردى, دەپ حابارلايدى kaznu.kz.
يۋنەسكو بۇل رەسۋرستاردى ۆيرۋسپەن بىرگە سەنىمدى ەمەس اقپاراتتىڭ زياندى سالدارىنىڭ الدىن الۋ ءۇشىن ۇسىندى. قىسقا اۋديو حابارلامالار ىندەتتىڭ الدىن الۋ شارالارى تۋرالى پايدالى اقپارات بەرەدى, ۆيرۋس تۋرالى اڭىزداردى تاراتپاۋ, ىنتىماقتاستىقتىڭ ماڭىزدىلىعىن كورسەتەدى. بۇل حابارلامالار تەك اعىلشىن, فرانتسۋز, يسپان جانە اراب تىلدەرىندە تاراتىلاتىن بولسا, قازىر ولار قازاق تىلىندە تىڭدارمانىنا جول تارتتى.
دىبىستىق كليپتى قازاق تىلىنە قازۇۋ پروفەسسورى گۇلميرا سۇلتانباەۆا اۋداردى. اۋديو حابارلامالار كەز-كەلگەن تىڭداۋشىعا قول جەتىمدى. ولار تەگىن جۇكتەلەدى جانە الەمنىڭ ءار تۇكپىرىندەگى مەملەكەتتىك, جەكە جانە قوعامدىق راديوستانتسيالار ەفيرگە تاراتا الادى. «قازاق راديوسى» - شىنايى جانە وبەكتيۆتى اقپارات تاراتۋعا شاقىرادى.
