ءبىر تاۋلىك ىشىندە 1 ميلليون قارالىم جيناپ ۇلگەرگەن ءفيلمنىڭ ءبىرىنشى نۇسقاسىن كوماندا بىلتىرعى جىلدىڭ سوڭىندا جەلىگە جۇكتەگەن ەدى. ءبىرىنشى ءبولىم 6 ميلليوننان استام قارالىم جيناعان.
«بۇل بۇكىل وتباسىعا ارنالعان كينو. قازىرگى تاڭدا بالالارعا ارنالعان ساپالى كونتەنت تەك كينوەكرانداردا عانا ەمەس, سونىمەن قاتار ينتەرنەت كەڭىستىگىندە جانە YouTube جەلىسىندە دە جوقتىڭ قاسى. «كانيكۋلى off-line» ءفيلمىنىڭ ەكى ءبولىمى دە قازاق ءتىلىنىڭ دامۋىنا ۇلكەن ۇلەس قوسادى. بالالارعا ءبىزدىڭ سالت-ءداستۇرىمىز, مادەنيەتىمىز, ۇلتتىق ويىندارىمىز جانە تۇرمىسىمىز تۋرالى قىزىقتى ايتىلعان. سوندىقتان, ءدال كارانتين كەزىندە ۇيدە وتىرۋدىڭ ماڭىزدى بولىپ تابىلاتىن كەزەڭىندە كوماندا بولىپ ءفيلمدى قولجەتىمدى جەلىگە جۇكتەۋدى ءجون كوردىك», - دەيدى ءفيلمنىڭ رەجيسسەرى جانە الماتى قالاسى مادەنيەت باسقارماسىنىڭ باسشىسى ەرنار قۇرماشەۆ.
ءفيلمنىڭ سيۋجەتى بويىنشا, باس كەيىپكەر قايرات ينۆەستورلاردىڭ ۇسىنىسىن قابىلداپ, ءىرى حولدينگكە باسشىلىق قىزمەتىنە وتىرادى. ال «اۋلكەمپ» لاگەرىندە ءوزىنىڭ ەبەدەيسىز دوستارى داستان مەن بولاتتى قالدىرادى, ولار بولسا ءبىرىنشى كۇنى-اق ۇرىسىپ, لاگەردى ەكىگە ءبولىپ, ءبىر-بىرىنە قارسى قويادى. داستان بولات اتتى «ۇلكەن» بالالار اۋىلدا ءبىر كۇن دە بولىپ كورمەگەن قالالىق ەركە بالالاردىڭ جاڭا توبىنا يە بولا الار ما ەكەن؟
ءفيلمنىڭ كومانداسى «اۋلكەمپ» سىندى لاگەردى تەك كينودا عانا ەمەس, ناقتى ومىردە دە اشقانىن اتاپ ءوتۋ كەرەك. الماتى وبلىسىنىڭ ماڭىندا قۇرىلعان وسىنداي لاگەرلەردىڭ ءبىرى وتكەن جازدا العاشقى تۋريستەردى قابىلدادى. لاگەر ىشكى وتباسىلىق جانە بالالار-جاسوسپىرىمدەر ءتۋريزمىن دامىتۋدىڭ اجىراماس بولىگى بولدى. ءۇش اي بويى «اۋلكەمپ» تاربيەلەنۋشىلەرى ارنايى ازىرلەنگەن باعدارلاما بويىنشا قازاق ءتىلىن مەڭگەرىپ, ۇلتتىق مادەنيەتىمىزدى ۇيرەندى. «اۋىلكەمپ» كىشكەنتاي ازاماتتاردىڭ ءپاتريوتيزمى مەن ماقتانىشىنىڭ وسۋىنە ءوز ۇلەسىن قوسا وتىرىپ, ءوزىنىڭ تاربيە جۇمىسىن بولاشاقتا دا جالعاستىرادى.
دەمالىس تۋرالى فيلم كەيىپكەرلەرىنىڭ تاريحى ينتەرنەت پەن الەۋمەتتىك جەلىسىز اياقتالمايدى. كارانتين اياقتالعاننان كەيىن بىردەن ءۇشىنشى ءبولىمىنىڭ ءتۇسىرىلىمى باستالماق.
