جيىن بارىسىندا ول 1 ملن 779 مىڭ ادامعا الەۋمەتتىك تولەم تاعايىندالعانىن اتاپ ءوتتى.
«بۇگىندە ەلىمىزدە 3 ملن 703 مىڭ ادام 42 500 تەڭگە مولشەرىندە الەۋمەتتىك تولەم الۋعا ءوتىنىش بەردى. وتىنىشتەردىڭ سانى 4 ملن 900 مىڭدى قۇرايدى. ونىڭ ىشىندە 1 ملن 779 مىڭ ادامعا الەۋمەتتىك تولەم تاعايىندالدى جانە ەسەپشوتتارىنا 75 ملرد 600 ملن تەڭگە اۋدارىلدى. ەگەر سىزدەر توتەنشە جاعدايعا دەيىن تابىس تاۋىپ جۇرسەڭىز, وندا الەۋمەتتىك تولەم الۋعا قۇقىعىڭىز بار. پورتالدا ءوتىنىش بەرگەن كەزدە تابىسىڭىزدىڭ بولعانىن جانە توتەنشە جاعدايعا بايلانىستى جوعالتقانىڭىزدى راستايسىز. ال ناقتى الەۋمەتتىك تولەمدى كىم الا الادى؟ بىرىنشىدەن – كومپانيادا, مەكەمەدە جۇمىس ىستەپ جۇرگەن جانە جۇمىس بەرۋشى اقىسىز دەمالىسقا جىبەرگەن جالدامالى جۇمىسكەر. ولار: ورتا جانە شاعىن بيزنەس وكىلدەرى, كارانتين جاريالانعان قالالارداعى كاسىپورىندار, كوممەرتسيالىق ەمەس ۇيىمدار, مەملەكەتتىك قىزمەتتەن باسقالارى. بۇل رەتتە, سىزدەرگە ءوتىنىشتى جۇمىس بەرۋشى بەرەدى», دەدى ول.
ب.نۇرىمبەتوۆ 42 500 تەڭگە الەۋمەتتىك تولەمدى تولەۋ نەلىكتەن كەشىكتىرىلىپ جاتقانىن ءتۇسىندىردى.
«الەۋمەتتىك تولەمدەر نەگە كەشىگىپ جاتىر دەگەن سۇراقتار تۋىنداۋدا. «مەن ءبىر اپتا بۇرىن بەرگەنمىن», «4-5 كۇن ءوتىپ كەتتى» دەگەندەر كوپ. بۇل رەتتە مەن سىزدەردىڭ الدارىڭىزدا مينيستر رەتىندە كەشىرىم سۇرايمىن. ءبىز وسى كۇندەرى ۇلگەرمەدىك. ونىڭ بىرنەشە سەبەبىن ءتۇسىندىرىپ كەتەيىن. بىرىنشىدەن, ءبىز وزىمىزگە 3 كۇن بەلگىلەدىك. بىراق, ودان دا كوبىرەك ۋاقىت قاجەت ەدى. 42 500 تەڭگە بيۋدجەتتەن ەمەس, مەملەكەتتىك ساقتاندىرۋ قورىنان تولەنەدى. سول قور اقشا بەرەدى, سول قور تاعايىندايدى. ول بولەك مەكەمە. ەلىمىزدە بۇكىل تولەمدەر «ازاماتتارعا ارنالعان ۇكىمەت» كورپوراتسياسى ارقىلى بانكتەرگە جىبەرىلەدى. ال بانكتەر ازاماتتاردىڭ ەسەپشوتتارىنا اۋدارادى. ال ءوتىنىشتى قابىلداپ جاتقان ءبىزدىڭ مينيسترلىك بولعاندىقتان بارلىق قۇرىلىمدارىمەن ولاردى تەكسەرەدى. سودان كەيىن سىزدەرگە جىبەرەمىز. وسى ءۇش مەكەمە اينالىسىپ جاتىر. باسقاشا بولمايدى. سىزدەرگە ايتارىم, وسى ءۇش مەكەمەنىڭ ازاماتتارى كۇنى-ءتۇنى جۇمىس ىستەپ جاتىر», دەدى مينيستر.
زەينەتكەرلەر مەن الەۋمەتتىك جاردەماقى الاتىندار 42 500 تەڭگە الەۋمەتتىك تولەم الا ما؟ بۇل ساۋالعا مينيستر بىلاي دەدى.
«سىزدەرگە مەملەكەت تاراپىنان, بيۋدجەتتىڭ ەسەبىنەن اي سايىن زەينەتاقى مەن مەملەكەتتىك جاردەماقى تولەنىپ تۇرادى. ولار توتەنشە جاعدايعا بايلانىستى توقتاعان جوق. قايتا ولاردىڭ مولشەرى ارتىپ جاتىر, يندەكساتسيا جاسالدى. ونى مامىر ايىندا ساۋىردە قوسىلعانىمەن بىرگە الاسىزدار. سوندىقتان سىزدەردەن كەشىرىم سۇرايمىز, 42500 تەڭگە سىزدەرگە بەرىلمەيدى. زەينەتكەر نەمەسە مەملەكەتتىك جاردەماقى الىپ جۇرگەن كوپ بالالى انالار, مۇگەدەك جاندار توتەنشە جاعدايعا دەيىن رەسمي تۇردە جۇمىس ىستەگەن بولسا, وندا بۇل ەسكەرىلەدى. ءيا, سىزدەر زەينەتاقى مەن جاردەماقىنىڭ مولشەرى كوپ بولماعاندىقتان قوسىمشا تابىس تابامىز دەپ جۇمىس ىستەگەنسىزدەر. سىزدەرگە بولادى. سىزدەر وتىنىشتەرىڭىزدى بەرەسىزدەر. قوسىمشا ەشتەڭە تولەمەڭىزدەر. توتەنشە جاعدايعا دەيىن تولەگەن بولساڭىزدار, ءبىز ونى كورەمىز. جاسىڭىزعا قاراماي, جاردەماقى العانىڭىزعا جانە باسقالارىنا قاراماي الەۋمەتتىك تولەم بەرەمىز. جانە دە ستۋدەنتتەر الەۋمەتتىك تولەم الا ما دەگەن دە سۇراق كەلىپ جاتىر. بۇل رەتتە ستۋدەنتتەر دەگەن بولەك سانات جوق. سەبەبى ول – ەلىمىزدىڭ كامەلەتتىك جاسقا تولعان ازاماتى. ەڭبەك زاڭىنا سايكەس, 16 جاستان باستاپ جۇمىس ىستەۋگە بولادى. شاكىرتاقى الاتىندىعىنا, المايتىندىعىنا قاراماستان جۇمىس ىستەۋىنە ەش كەدەرگى جوق. ونداي شەكتەۋ دە قويىلمايدى», دەدى ب.نۇرىمبەتوۆ.
شارا بارىسىندا مينيستر توتەنشە جاعداي مەرزىمى سوزىلسا كەلەسى ايعا تولەم اۆتوماتتى تۇردە بەرىلەتىنىن اتاپ ءوتتى.
«جۇرت «توتەنشە جاعداي سوزىلدى, ەكىنشى ايعا الەۋمەتتىك تولەم تولەنە مە جانە وعان تاعى ءوتىنىش بەرەمىز بە؟» دەپ سۇراپ جاتىر. جوق. سىزگە ءبىر رەت تاعايىندالىپ, تولەنسە بولدى. ەكىنشى رەت ءوتىنىش بەرۋ قاجەت ەمەس. ءسىز تىركەلدىڭىز, تولەم بەردىك. ءسىزدى بىلەمىز, تانيمىز. توتەنشە جاعداي مەرزىمى سوزىلسا, كەلەسى ايىنا سىزگە ايتپاستان تولەي بەرەمىز», دەدى مينيستر.
ونىڭ ايتۋىنشا, 16 ناۋرىزدان 15 ساۋىرگە دەيىنگى مەرزىمگە 42 500 تەڭگە الەۋمەتتىك تولەم جاسالدى. ەندى كارانتين مەرزىمى تاعى 15 كۇنگە سوزىلىپ وتىر. سوندىقتان جۇرتشىلىق تاراپىنان 42 500 تەڭگەنىڭ جارتىسى تولەنە مە دەگەن سۇراق ءتۇسىپ جاتىر.
«جوق, بۇل تولەم ەرەكشە. مۇنى سول 29 ءساۋىر كۇنى وتكىزسەڭىز دە ءبىر كۇنگە, جارتى ايعا دەپ بولمەيمىز. ءوتىنىش بەرسەڭىز تولىعىمەن 42 500 تەڭگە تولەنەدى. مىسالى, توتەنشە جاعداي ءبىر اي بولىپ ودان كەيىن 5 كۇنگە سوزىلعان كۇننىڭ وزىندە 42 500 تەڭگە تولەيتىن ەدىك», دەدى ب.نۇرىمبەتوۆ.
