ەلباسى نۇرسۇلتان نازارباەۆ 2017 جىلدىڭ ءساۋىر ايىندا جاريالانعان «بولاشاققا باعدار: رۋحاني جاڭعىرۋ» اتتى ماقالاسىندا ەرلەردىڭ ەسىمىن ەل جادىندا ساقتاۋعا ىقپالىن تيگىزىپ ءھام سەرپىن بەرەتىن ماسەلەنى ورتاعا سالعان-دى. سوندا تۇڭعىش پرەزيدەنت: «ۇلت ماقتانىشى ءبىزدىڭ بۇرىنعى وتكەن باتىر بابالارىمىز, داناگوي بيلەرىمىز بەن جىراۋلارىمىز عانا بولماۋعا ءتيىس. مەن بۇگىنگى زامانداستارىمىزدىڭ جەتىستىكتەرىنىڭ تاريحىنا دا نازار اۋدارۋدى ۇسىنامىن. بۇل يدەيانى «قازاقستانداعى 100 جاڭا ەسىم» جوباسى ارقىلى ىسكە اسىرعان ءجون. «قازاقستانداعى 100 جاڭا ەسىم» جوباسى – تاۋەلسىزدىك جىلدارىندا تابىسقا جەتكەن, ەلىمىزدىڭ ءار وڭىرىندە تۇراتىن ءتۇرلى جاستاعى, سان الۋان ەتنوس وكىلدەرىنىڭ تاريحى» دەگەن بولاتىن. ەلباسى پارمەنىمەن قولعا الىنعان تىڭ جوباعا دا مىنە, بيىل 3 جىل تولىپ وتىر.
قوعامنىڭ ءتۇرلى سالالارىندا جەتىستىككە جەتكەن بەيمالىم تۇلعالاردىڭ كوپ ەكەنىن بايقاپ ءجۇرمىز. «100 جاڭا ەسىم» جوباسىنىڭ دا ەڭ باستى ماقساتى وسىعان سايادى. ياعني, بەلگىسىز ەسىمدەردى كوپشىلىككە تانىستىرۋ. وتكەن 3 جىل ىشىندە اتالعان جوباعا 6000-نان اسا ءوتىنىم كەلىپ تۇسكەن. اتاپ ايتساق, 2017 جىلى – 2112, 2018 جىلى – 2388, 2019 جىلى – 1673. جىبەرىلگەن وتىنىمدەر ءارتۇرلى باعىتتا بولدى: ماسەلەن, جوبانىڭ العاشقى جىلىندا سپورت سالاسىنا قاتىستى 235, عىلىممەن بايلانىستى 210, مادەنيەت پەن رۋحانيات جاعىنان 307, بيزنەس سالاسىنىڭ ۇزدىكتەرىنەن 257, مەديتسينا تۇرعىسىنان 200, قوعامنىڭ جۇيرىك بەلسەندىلەرىنەن 889 ءوتىنىش كەلىپ تۇسكەن.
ىرىكتەۋ ناتيجەسىندە جالپىحالىقتىق ونلاين داۋىس بەرۋ ارقىلى 2017 جىلى – 102, 2018 جىلى – 29, 2019 جىلى – 32 – بارلىعى 163 جەڭىمپاز انىقتالعان. بۇل قازاق حالقىنىڭ اراسىندا ەرەكشە دارىن يەلەرى كوپ ەكەنىنىڭ اينىماس دالەلى. «100 جاڭا ەسىم» جوباسىمەن تانىلعانداردىڭ ءبارى بۇگىندە ەل رۋحانياتىنىڭ قايتا جاڭعىرۋىنا سۇبەلى ۇلەستەرىن قوسىپ ءجۇر.
اتالعان جوبانىڭ 2018 جىلعى ەكىنشى كەزەڭىندە كوپتىڭ اراسىنان وزا شاۋىپ, جەڭىمپاز اتانعان جاس اقىن ماقپال مىسا – جوباداعى ادەبيەت سالاسىنان تاڭدالعان العاشقى ۇزدىك ەدى. ەلدەگى تالانتتى جاستاردى ىرىكتەپ, وزگەگە ۇلگى ەتۋدى ماقسات ەتكەن بىرەگەي جوبانىڭ تاڭداۋى ماقپال مىساعا ءتۇسۋىنىڭ باستى سەبەبى – جاس اقىننىڭ وقىرمان جۇرەگىنە جول تاپقان سىرلى ليريكاسىندا بولسا كەرەك. قاسيەتتى ولەڭ ولكەسىندە وزگەگە ۇلگى بولارلىق سارا جول سالا بىلگەن جاس اقىن «100 جاڭا ەسىم» جوباسىندا جەڭىسكە جەتىپ, ەلباسىمەن ديدارلاسۋ ەرەكشە اسەر ەتكەنىن ايتادى.
«100 جاڭا ەسىم» قاتارىندا اتانعان سوڭ قاتتى قۋاندىم. قۋانىشىما قانات بىتىرگەن نەگىزگى سەبەپ, وسىنداي ءىرى جوبادا العاش رەت ادەبيەت سالاسىنان جەڭىمپاز شىعىپ وتىر. ادەبيەتكە وسىلاي كوڭىل بولىنگەنىنە قۋاندىم. ەلباسىمەن كەزدەسۋدە ءوز قالاۋىمداعى ولەڭدى وقىدىم. «سەن مەنەن الىستاما» ولەڭى ەلباسىنا دا, زامانداستارىما دا ۇنادى», دەدى «100 جاڭا ەسىمنىڭ» ءبىرى ماقپال مىسا.
