الەمدىك ستاتيستيكاعا ۇڭىلسەك, سوڭعى كۇندەرى جاھان جۇرتشىلىعىن ۇرەي قۇشاعىنا العان قاتەرلى پاندەميانىڭ قارقىنى ءسال دە بولسا باسەڭسىدى. جاي كەزدە ويى بىرىگە بەرمەيتىن الەم حالقىنىڭ قازىرگى تىلەگى ءبىر. ول – قاۋىپتى ىندەتتىڭ كەلمەسكە كەتۋى. قاسيەتتى اي قارساڭىندا اسىرەسە, مۇسىلمان قاۋىمى قيىندىقتىڭ بەتى بەرى قاراپ, قالىپتى ومىرگە قايتا قادام باسۋدى ءۇمىت ەتىپ وتىر. مۇنى الەۋمەتتىك جەلىلەردەگى «رامازانعا دەيىن اتى جامان تۇماۋ توقتاسىن» دەگەن سارىندا جازىلعان تىلەكتەر تىزبەسى مەن جاريالانىمداردان انىق بايقاۋعا بولادى.
اۋىز بەكىتسەم دەپ نيەت قىلعان اعايىنعا قازاقستان مۇسىلماندارى ءدىني باسقارماسى رەسمي سايتىنىڭ ىشىنەن قوسىمشاسى ىسكە قوسىلعانىن سۇيىنشىلەپ ايتا كەتكەن ءلازىم. اتالعان سايتتان رامازان ايىنا قاتىستى بۇكىل مالىمەتتەردى تابۋعا بولادى. ازاماتتار كوكەيدە جۇرگەن ساۋالدارىن وسى قوسىمشا ارقىلى بىلىكتى يمامدارعا جولداۋىنا دا مۇمكىندىك اشىلىپ وتىر.
«قۇران ايىن اسىعا كۇتىپ جۇرگەن جاندار بىزگە ءجيى حابارلاسۋدا. كوپشىلىگى سارەسى مەن اۋىزاشار, ورازانى بۇزاتىن جانە بۇزبايتىن نارسەلەر, باسقا دا ءتۇرلى سۇراقتارىن قويىپ جاتادى. ماقساتىمىز – تۇرعىنداردىڭ ءدىني ساۋاتىن اشىپ, دۇرىس باعىت-باعدار بەرۋ», دەيدى قمدب وكىلدەرى.
ال وقىرماندار تاراپىنان باسقا دا قوسىمشا سۇراقتار تۋىنداعان جاعدايدا قمدب ورتالىق اپپاراتى جانىنان اشىلعان ءدىني اقپارات ورتالىعىنا (سall-center) 33-30-30 ءنومىرى بويىنشا حابارلاسۋعا بولادى.
بيىل قاسيەتتى رامازان ايى 25 ساۋىردە باستالادى. ال, 20 مامىردان 21 مامىرعا قاراعان ءتۇنى مۇسىلمان جاماعاتى قادىر ءتۇنىن قارسى السا, ورازا ايت مەيرامى 24 مامىردا.
