جەرگىلىكتى بيلىك دەر كەزىندە شەكتەۋ شارالارىن قولعا الىپ, وبلىس ورتالىعى مەن اۋداندار, كەيبىر ەلدىمەكەندەر كارانتينگە جابىلدى. وبلىس اۋماعىندا كولىك قوزعالىسى شەكتەلدى, تاكسي قىزمەتى توقتاتىلدى, تۇرعىندارعا وزدەرى تۇراتىن ءۇي ماڭايىنان ۇزاپ شىقپاۋ قاجەتتىگى ەسكەرتىلدى. ءتىپتى, وبلىستىڭ باس سانيتارلىق دارىگەرىنىڭ №8 قاۋلىسىمەن بارلىق قۇرىلىس جۇمىستارى توقتاتىلىپ, وبلىس ورتالىعىنداعى قوعامدىق كولىك قىزمەتىنىڭ ءجۇرۋ ۋاقىتى شەكتەلدى. وسىلايشا بيلىك ۆيرۋستىڭ تارالۋىن تەجەۋدىڭ بارلىق امالىن جاسادى, ەندى تەك تۇرعىندار ازاماتتىق جاۋاپكەرشىلىك تانىتۋى كەرەك. سوندا عانا ىندەتتىڭ قۇرىعىنا ىلىنگەندەر قاتارى كۇن سايىن كەمي بەرمەك.
وسىعان بايلانىستى وبلىس اكىمى گۇلشارا ابدىقالىقوۆا ايماق حالقىنا ۇندەۋ جاريالادى. وبلىس باسشىسى پروبلەمانىڭ شىن مانىندە الاپات ەكەنىن ءالى دە بولسا تۇسىنە الماي وتىرعانىمىزدى اتاپ وتكەن.
ايماق بويىنشا ۆيرۋسپەن كۇرەسكە مەديتسينا سالاسىنىڭ 3 مىڭعا جۋىق قىزمەتكەرى جۇمىلدىرىلعان. توسقاۋىل بەكەتتەرىندە 200 پوليتسەي مەن 170 اسكەري قىزمەتكەر ۇزدىكسىز كەزەكشىلىك ەتىپ تۇر.
بىراق, ءومىرىن قاتەرگە تىگىپ, ەلدى قاۋىپتى ىندەتتەن اراشالاپ قالۋدىڭ قامىمەن جۇرگەن وسى ازاماتتاردىڭ ەڭبەگىن ەسكەرىپ جاتقاندار از سياقتى. مىسالى, قازىر كوشەدە جۇرگەن ادام دا, كولىك تە كوپ. بۇل تالاپتىڭ تولىق ورىندالىپ جاتپاعاندىعىن كورسەتەدى. قالا مەن ەلدىمەكەندەردەگى توسقاۋىل بەكەتتەرىن دە اينالىپ وتۋگە تىرىسۋشىلار دا از ەمەس ەكەندىگى بايقالىپ قالادى. وعان مىسال, 11 ءساۋىر كۇنى بولعان جاعداي. وسى كۇنى رەيدكە شىققان «وحوتزووپروم» ءوب» رمقك قىزىلوردا وڭىرلىك فيليالىنىڭ ينسپەكتورلارى قالاعا تاياۋ دوسان اۋىلىنىڭ ماڭىندا كۇدىكتى كورىنگەن ەكى كولىكتىڭ سوڭىنا تۇسەدى. ينسپەكتورلاردان قاشىپ, اۋدارىلعان كولىك ىشىنەن ءمۇيىزى كەسىلگەن 54 كيىك, 224 دانا ءمۇيىز, 25 وعى بار مر-153 ماركالى اڭشى مىلتىعى, ءدۇربى مەن پىشاق تابىلدى. ەكىنشى كولىككە اۋىسىپ مىنگەن براكونەرلەر قۇتىلىپ كەتتى. قازىر كارانتين كەزىندە جان-جاعى قىمتالعان قالادان سىتىلىپ شىعىپ, تالاي جانۋاردى وققا بايلاعان براكونەرلەر ىزدەستىرىلۋدە. كۇنى-ءتۇنى ادام ءومىرىنىڭ ساقشىسى بولىپ جۇرگەن دارىگەردىڭ, تاۋلىك بويى قوعامدىق ءتارتىپتى ساقتايتىن پوليتسەيدىڭ, وبلىس ورتالىعى مەن اۋىل-اۋىلدى ارالاپ, جۇقپالى كەسەل وشاعىن زالالسىزداندىرىپ جۇرگەن اسكەريلەردىڭ ەڭبەگىن باعالاساق, مۇنداي قادامعا بارماس ەدىك-اۋ.
گۇلشارا ناۋشاقىزى ۇندەۋدە جۇرتتىڭ ءوز بەتىنشە وقشاۋلانىپ, ۇيدەن شىقپاي, جاقىندارىمەن جۇزدەسۋدەن ۋاقىتشا باس تارتۋى كوروناۆيرۋسپەن كۇرەسكە قوسقان ۇلكەن ۇلەس ەكەنىن اتاپ وتەدى. ايماق باسشىسىنىڭ الەۋمەتتىك جەلىدەگى پاراقشاسىنا كوپتەگەن ماڭىزدى ءارى مازمۇندى ۇسىنىستار ءتۇسىپ, ولار بويىنشا ءتيىستى ورىندارعا تاپسىرمالار بەرىلىپتى.
تۇرعىندارعا ارناعان ۇندەۋىندە وبلىس اكىمى حالىقپەن كەرى بايلانىستىڭ ماڭىزدىلىعىنا نازار اۋدارىپ, ءاربىر پىكىر ەسكەرۋسىز قالمايتىندىعىن جەتكىزەدى.
بۇل ىندەت ءبىزدىڭ ەلدىگىمىز مەن بىرلىگىمىزدى سىنايتىن ءسات بولىپ تۇر. ال ول ءۇشىن ەڭ الدىمەن ءاربىر تۇرعىن ازاماتتىق جاۋاپكەرشىلىكتى سەزىنە ءبىلۋى كەرەك.
