وسى ماسەلەنىڭ انىق-قانىعىن تەكسەرۋ ماقساتىندا كەشە جامبىل وبلىسى اكىمىنىڭ ورىنباسارى ەرجان جىلقىباەۆ توراعالىق ەتەتىن كوميسسيا قۇرىلعان بولاتىن. وبلىس اكىمى بەردىبەك ساپارباەۆتىڭ تاپسىرماسى بويىنشا قۇرىلعان ارنايى كوميسسيانىڭ قۇرامىندا تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ, پروكۋراتۋرا ورگاندارىنىڭ, وبلىس اكىمى اپپاراتىنىڭ قىزمەتكەرلەرى, قوعام جانە كاسىپوداق ۇيىمدارىنىڭ وكىلدەرى بار.
بۇگىن ەرجان جىلقىباەۆ مەركى اۋداندىق اۋرۋحاناسىنىڭ مەديتسينا قىزمەتكەرلەرىمەن جانە اۋدان تۇرعىندارىمەن كەزدەستى. كەزدەسۋ بارىسىندا مەديتسينالىق مەكەمە قىزمەتكەرلەرىنىڭ شاعىمدارى بويىنشا جۇرگىزىلگەن تەكسەرۋدىڭ قورىتىندىسى بەلگىلى بولدى. «كوميسسيا اۋداندىق اۋرۋحانا جۇمىسىنىڭ, ونىڭ ىشىندە دارىگەرلەر تولقىناي ورداباەۆا مەن قالامقاس تورەقۇلدىڭ وتىنىشتەرىندە كورسەتىلگەن فاكتىلەر بويىنشا تەكسەرۋ شارالارىن جۇرگىزدى. كوپتەگەن مالىمەتتەر راستالدى. ۇجىمدا جاعىمسىز مورالدىق-پسيحولوگيالىق جاعداي قالىپتاسقان دەسەك, وعان ءبىرىنشى كەزەكتە ەمدەۋ مەكەمەسى باسشىلىعىنىڭ ءوز كاسىبي مىندەتتەرىنە جاۋاپسىز قاراعاندىعى سەبەپ بولعان», دەدى ەرجان جىلقىباەۆ.
جول بەرىلگەن زاڭسىزدىقتار ءۇشىن اۋرۋحانانىڭ باس دارىگەرىنىڭ مىندەتىن ۋاقىتشا اتقارۋشى دانيار نۇسىپباەۆ, باس دارىگەردىڭ ەمدەۋ ءىسى جونىندەگى ورىنباسارى جاڭىل شويبەكوۆا جانە باس ەسەپشى زاميرا مۇقاەۆا قىزمەتىنەن بوساتىلدى. ەرجان جىلقىباەۆ ءوز سوزىندە تەكسەرۋ ماتەريالدارى ءتيىستى شارالار قابىلداۋ جانە قاراۋ ءۇشىن قۇقىق قورعاۋ ورگاندارىنا تاپسىرىلاتىنىن اتاپ ءوتتى. سونداي-اق, ول جاڭادان تاعايىندالعان اۋرۋحانانىڭ باس دارىگەرى رايقۇل نۇرجانوۆتى تانىستىرىپ, وعان ورىن العان زاڭبۇزۋشىلىقتاردى جويۋ جانە ۇجىمداعى مورالدىق-پسيحولوگيالىق احۋالدى قالپىنا كەلتىرۋ بويىنشا ماڭىزدى مىندەتتەر جۇكتەدى. وبلىس اكىمىنىڭ ورىنباسارى ءوز سوزىندە مەديتسينا قىزمەتكەرلەرىنىڭ قۇقىقتارىن قورعاۋ ماسەلەلەرى ەرەكشە باقىلاۋدا ەكەنىن جەتكىزدى. الداعى ۋاقىتتا دا ولاردى قاجەتتى قورعانىس قۇرالدارىمەن قامتاماسىز ەتۋ, جۇمىستاعى قاۋىپسىزدىك شارالارىن نىعايتۋ جانە ماتەريالدىق قولداۋ ءۇشىن بارلىق مۇمكىندىكتەر جاسالاتىنىن اتاپ ءوتتى. سونىمەن قاتار, ەرجان جىلقىباەۆ دارىگەرلەر تولقىناي ورداباەۆا مەن قالامقاس تورەقۇلدىڭ قانداي دا ءبىر زاڭسىز ءىس-ارەكەتتەردەن قورقۋىنا نەگىز جوق ەكەنىن, ولاردىڭ وبلىس باسشىلىعىنىڭ تىكەلەي باقىلاۋىندا بولاتىنىن ايتتى. سونىمەن قاتار, وبلىستىق دەنساۋلىق ساقتاۋ باسقارماسى باسشىسىنىڭ جانە اۋدان اكىمىنىڭ دە جەكە جاۋاپكەرشىلىگى تۋرالى ماسەلە قاراستىرىلاتىن بولادى. ەستەرىڭىزگە سالا كەتەيىك, اتالعان ماسەلە بويىنشا اۋەلى اۋداندىق اۋرۋحانا باس دارىگەرىنىڭ مىندەتىن ۋاقىتشا اتقارۋشى دانيار نۇسىپباەۆ پەن وسى سالاعا جەتەكشىلىك جاسايتىن اۋدان اكىمىنىڭ ورىنباسارى مارات قاسىم Nur Otan پارتياسىنىڭ پارتيالىق جاۋاپكەرشىلىگىنە تارتىلعان بولاتىن.
جامبىل وبلىسى
