بىراق مۇنىڭ وبا ەكەنىن ۇقپاۋعا بولمايدى. ازۋىن ايعا بىلەگەن امەريكانىڭ وزىندە بۇگىنگى تاڭدا 18 مىڭنان ارتىق ادام قىرىلدى. 11 ساۋىردەگى دەرەككە قاراعاندا الەمدە 1 ملن 700 مىڭنان ارتىق ادام وسىنىڭ دەرتىنە ۇشىراعان. سونىڭ ىشىندە ولگەندەرى ءجۇز مىڭنان ارتىق.
بۇگىنگى تاڭدا قازاقستاندا 859 ادامنىڭ زاقىمدانعانى بەلگىلى بولىپ وتىر. توقىراۋ جوق, كۇندە ءوسۋ بار. سوڭعى تاۋلىكتەردە عانا ولاردىڭ سانى 47 ادامعا ارتتى. وسى ءبارىمىزدى ويلانتۋى كەرەك. پرەزيدەنت ق.توقاەۆ جاعدايدىڭ وڭالماي تۇرعانىن ەسكەرىپ, كارانتين رەجىمىن تاعى دا ون بەس كۇنگە ۇلعايتۋعا شەشىم قابىلداۋعا ءماجبۇر بولدى. بۇل شەشىمدى دۇرىس دەپ سانايمىز, ويتكەنى ىندەتتى اۋىزدىقتاي الماي وتىرمىز. كەرىسىنشە ول ۇلعايىپ بارادى.
وسىندايدا جەكە ادامداردىڭ, اسىرەسە العا قويىلعان ماقساتتى بۇلتارتپاي ورىنداۋداعى جەرگىلىكتى باسشىلاردىڭ ىسكەرلىگى شەشۋشى فاكتورلاردىڭ ءبىرى ەكەندىگى ءسوزسىز. وسى ورايدا سولتۇستىك قازاقستان وبلىسىنىڭ باسشىلىعى تۋرالى ايتپاي كەتۋگە بولمايدى. وتكەن جولى عانا ءبىز سولتۇستىك قازاقستان وبلىسىنىڭ اكىمى قۇمار اقساقالوۆتى رۋحاني جاڭعىرۋ سالاسىنداعى سىلبىرلىقتارى ءۇشىن سىناعان ەدىك. الايدا ول ءومىردىڭ ءوزى تالاپ ەتكەن مىنا جاعدايدا تاماشا ىسكەرلىك كورسەتىپ وتىر. بارلىق كومانداسىن, سونىڭ ىشىندە قالا اكىمى بولات جۇمابەكوۆتى پرەزيدەنتتىڭ تاپسىرماسىن بۇلجىتپاي ورىنداۋ جولىنا ءجىتى جۇمىلدىرۋىنىڭ ارقاسىندا قازىرگى ساتتەردە كوروناۆيرۋستى قۇرىقتاۋعا ءبىرشاما قول جەتكىزدى. سوڭعى اپتادا ىندەتپەن سولتۇستىك قازاقستاندا بىردە ءبىر ادام تىركەلگەن جوق. بۇرىن تىركەلىپ, ەمدەۋگە الىنعانداردىڭ ىشىنەن بىرەۋى ايىعىپ شىقتى.
ستاتسيونارداعى 24 ناۋقاس بارلىق تالاپتارعا ساي ەم-دومدار قابىلداۋدا جانە ولارمەن قاتىناسۋ قاتتى باقىلاۋعا الىنعان. وكپەنى جاساندى جولمەن تازالايتىن جەتىلدىرىلگەن بەس اپپاراتتى جۋىردا وبلىس اكىمى تاعى دا جەتكىزىپ بەردى. قازىر وسىنداي 10 اپپارات بار.
ينفەكتسيامەن الىسىپ جاتقان ءۇش دارىگەر, ءتورت مەدبيكە, بەس سانيتار ايرىقشا جاعدايدا ساقتالعان. اۋىسىمنان شىققان بريگادانىڭ ءۇستى-باسى تەگىس ديزەنفەكتسيالانىپ, ەشكىممەن بايلانىسقا تۇسپەي وزدەرى عانا تۇراتىن «التىن وردا» قوناقۇيىنىڭ نومىرلەرىنە ارناۋلى كولىكپەن جەتكىزىلەدى. وسى جەردە ىشەتىن اس-اۋقاتى دا سىرتتان بەرىلىپ, ەشكىممەن ارالاستىرىلمايدى. بەلسەندى قوعامدىق ۇيىمداردىڭ ءبىرى ولارعا ءبىر رەتتىك كيىم, تاعى ءبىرى بارىنشا ءدامدى تاعام دايىنداپ بەرۋدى مويىندارىنا العان. ءۇي-ءىشى, بالا-شاعالارىمەن ولار تەك تەلەفون ارقىلى حابارلاسادى. كەيبىر وبلىستاردا قوسىمشا اقى تولەۋ تۋرالى شەشىمنىڭ ەندى عانا قابىلدانىپ جاتقانىن ەستيمىز. ال ءبىزدىڭ دارىگەرلەر ناۋرىز ايىنداعى قوسىمشا اقى – 825 مىڭ تەڭگەنى تەگىس العان. ارينە, ىنتالاندىرۋدىڭ ەڭ زورى وسى ەكەنى ءسوزسىز.
قالا كوشەلەرىنە شىقساڭىز جۇرگىنشى مۇلدە از. انە جەر, مىنا جەردە قاراڭ-قۇراڭ ادامداردى كەزدەستىرەسىز. وبلىس باسشىلىعى ەفيرگە ءجيى شىعىپ, تۇرعىندارعا كارانتين تالابىن ساقتاۋدى ءوتىمدى سوزدەرمەن ءجيى ايتىپ وتىرادى.
ال قالا كوشەلەرىنە شىعى قالعانداردى كوشەدەگى پاترۋل توقتاتىپ جاتادى. «بارلاۋعا» شىققان وسى جولداردىڭ اۆتورىن دا توقتاتىپ, تەرگەۋگە الدى. قالتامدا ءدارى الاتىن رەتسەبىمدى كورسەتىپ, دارىحاناعا باراتىنىمدى ايتىپ قانا امان ءوتتىم. ارينە, جۋرناليست ەدىم دەپ ءجونىمدى ايتسام دا قويا بەرەتىن شىعار, بىراق مەن ينكوگنيتو قالپىمدى ولاردىڭ جۇمىستارىنا ادالدىعىن بىلمەك ءۇشىن ساقتاپ قالدىم.
كوشەلەردى كاماز-دار جارىسىپ, ديزەنفەكتسيالاپ ءجۇر. ارينە, نۇر سۇلتانداعىداي جەتىلدىرىلگەن تەحنيكالارى جوق, سوندىقتان اق تۇسپەن سىرلانعان ەسكى كولىكتەردىڭ وزىمەن-اق جاپپاي ديزەنفەكتسيالاۋدا. قالاي دەسەك تە كارانتيننىڭ تالاپتارى قاتاڭ ساقتالعان. جوعارىداعى جەتىستىك وسىنداي ءجىتى ىستەردىڭ ناتيجەسى. اللا دا «ساقتانساڭ ساقتارمىن» دەگەن عوي. كارانتيننىڭ تالابىن قازاقپايشىل «ۇزىن ارقان, كەڭ تۇساۋعا» سالماي, تىم بولماسا وسى سىناق كۇندەرى قاتاڭ ساقتايتىن بولساق ىندەتتى جەڭەتىن سياقتىمىز. باسقالار دا بىزدەن ۇلگى السا ەكەن دەيمىز.
سولتۇستىك قازاقستان وبلىسى
