«تاجىكستانعا كوروناۆيرۋستىق ينفەكتسيانىڭ ەنۋى مەن تارالۋىنىڭ الدىن الۋ ءۇشىن شەتەل ازاماتتارى مەن ازاماتتىعى جوق ادامدارعا كىرۋگە جانە شىعۋعا ۋاقىتشا شەكتەۋلەر ەنگىزىلدى», دەپ حابارلادى سول ەلدىڭ ءسىم ءباسپاسوز قىزمەتى.
ءباسپاسوز قىزمەتى حابارلاعانداي, شەكتەۋلەر حالىقارالىق جۇك تاسىمالىمەن اينالىساتىن جۇرگىزۋشىلەرگە, اۋە كەمەلەرى ەكيپاجدارى مەن حالىقارالىق تەمىرجول قاتىناسى ەكيپاجدارىنا, سونداي-اق شەت مەملەكەتتەردىڭ ديپلوماتتارىنا جانە حالىقارالىق ۇيىمدار مەن قارجى ينستيتۋتتارىنىڭ وكىلدەرى, ولاردىڭ تاجىكستان رەسپۋبليكاسىندا تىركەلگەن ولاردىڭ وتباسى مۇشەلەرىنە قولدانىلمايدى.
سوڭعى كورسەتىلگەن ساناتقا ادامدار كىرگەن جاعدايدا, ولاردىڭ تۇراقتى تۇرعىلىقتى جەرلەرىندە دەنساۋلىق ساقتاۋ جانە الەۋمەتتىك قورعاۋ مينيسترلىگى قىزمەتكەرلەرىنىڭ باقىلاۋىمەن 14 كۇندىك وقشاۋلاۋ ءراسىمى قاراستىرىلعان.
«ەگەر جوعارىدا اتالعان ساناتتارعا جاتپايتىن شەتەل ازاماتتارىنىڭ تاجىكستان رەسپۋبليكاسىنان كەتۋى قاجەت بولسا, COVID-19-نىڭ ەنۋى مەن تارالۋىن بولدىرماۋ ءۇشىن رەسپۋبليكالىق شتابتا چارتەرلىك رەيستەردى ۇيىمداستىرۋدى قاراۋعا دايىن» دەدى ءسىم.
تاجىكستاندا ءالى كوروناۆيرۋستىڭ بىردە-ءبىر جاعدايى راستالعان جوق. تاجىك ۇكىمەتى بۇل قادامعا ساقتىق ءۇشىن بارىپ وتىر. ءبىز وسىعان دەيىن تاجىكستاننىڭ گەوگرافيالىق ورنالاسۋى پاندەميانىڭ اسەرىنىڭ السىرەتىپ وتىرعانىن, رەسەي, قازاقستان, وزبەكستاننىڭ شەكاراسىن جابۋى تاجىك ەلىنە اسەرىن بەرگەنىن, كورشىلەرى دەرتتەن قورعانۋ ءۇشىن ەسىگىن جاۋىپ ۇلگىرگەنشە, تاجىكتەر ەسىن جيىپ, ساقتىق شارالارىن قاتاڭداتقانىن جازعانبىز.
