پارتيا وكىلى مالىمدەگەندەي, «Almaty Birgemiz» قورى اسا مۇقتاج ازاماتتارعا, اتاپ ايتساق از قامتىلعان كوپ بالالى وتباسىلارعا (اتاۋلى الەۋمەتتىك كومەك الاتىندار), ءبىرىنشى توپ مۇگەدەكتەرىنە, ەرەكشە قاجەتتىلىگى بار بالالاردى تاربيەلەپ وتىرعان وتباسىلارعا, ەڭ تومەنگى نەمەسە بازالىق زەينەتاقى الاتىندارعا (38 686 جانە 16 839 تەنگەدەن تومەن), تۇل جەتىمدەرگە, الماتى قالاسى بويىنشا جالپى سانى 23 مىڭ 472 ادامعا 50 مىڭ تەڭگەدەن قارجى ءبولىپ وتىر.
ازاماتتاردىڭ اتالعان ساناتتار بويىنشا تىزىمدەرى قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەكتەرىنە سايكەس جاسالعان. ەگەر كومەك الۋشى اتالعان ساناتقا كىرەتىن بولسا, وندا ول ادامعا كومەك اۆتوماتتى تۇردە كورسەتىلەدى. ەشقايدا بارۋدىڭ قاجەتى جوق. اقشا جاردەماقى نەمەسە زەينەتاقى ءتۇسىپ جۇرگەن كارتوچكاڭىزعا «Almaty Birgemiz» قورى مەن «Nur Otan» پارتياسىنىڭ اتىنان سمس-حابارلاندىرۋمەن بىرگە تۇسەدى.
– بۇگىنگى كۇنگە 21 مىڭنان استام ادامعا قارجىلاي كومەك كورسەتىلىپ, جۇمىستىڭ 90% اياقتالدى. قالعان ازاماتتارعا اقشالاي كومەك 5 كۇن ىشىندە تۇسەدى. ايتىلعان اقشا ايىپپۇل, نەسيە جانە باسقا دا تولەمدەر ەسەبىنە ۇستالمايدى. قور قارجىسىن ءبولۋدىڭ اشىقتىعىن قاداعالاۋ ماقساتىندا قامقورشىلىق كەڭەس پەن تەكسەرۋ كوميسسياسى قۇرىلعان. قامقورشىلىق كەڭەستىڭ قۇرامىنا كوپبالالى انالاردىڭ, ەرەكشە قاجەتتىلىگى بار ادامداردىڭ, ارداگەرلەر كەڭەسىنىڭ, ەرىكتىلەر ليگاسى مەن باسقا دا وكىلدەر ەنگىزىلدى. سونداي-اق, «Birgemiz» قورى تاراپىنان الماتى قالاسىنا 2 ملن. مەديتسينالىق بەتپەردە جىبەرىلەدى. ول بەتپەردەلەرمەن 40 مىڭ مۇقتاج قامتىلماق – دەيدى ستانيسلاۆ كانكۋروۆ.
