مارقۇم بۇرىن جۇقتىرعاندارمەن بايلانىستا بولعاندار قاتارىنان, ونىڭ ىندەت جۇقتىرعانى 16 ناۋرىزدا انىقتالعان ەدى. بۇل ناۋقاستىڭ باسقا دا كەسەلدەرى, اتاپ ايتقاندا وكپەنىڭ سوزىلمالى وبسترۋكتيۆتى دەرتى, جۇرەكتىڭ سوزىلمالى جەتكىلىكسىزدىگى مەن جۇرەكتىڭ يشەميالىق اۋرۋى, ستەنوكاردياسى, ارتەريالىق گيپەرتەنزياسى بولعاندىقتان, ول 18 ناۋرىزدا جانساقتاۋ بولىمشەسىنە ورنالاستىرىلعان.
ەم-دوم قارقىندى جۇرگىزىلگەنىنە قاراماستان, پوليورگاندىق جەتكىلىكسىزدىكتىڭ – تىنىس الۋ, جۇرەك-قان تامىرلارى كەسەلدەرىنىڭ ورشۋىنەن, جاعدايى ناشارلاي تۇسكەن.
9 ساۋىردە قوسىمشا كەسەلدەرى اسقىنا كەلە, تۇنگى ساعات 23.20-دا قان اينالىمى توقتادى. جارتى ساعات بويى جۇرگىزىلگەن رەانيماتسيالىق ءىس-شارالار ءساتسىز اياقتالىپ, ساعات 23.50-دە كوز جۇمدى.
نەگىزگى دياگنوزى: COVID-19 كوروناۆيرۋستىق ينفەكتسياسىنىڭ راستالعان جاعدايى. ەكى جاقتى پوليسەگمەنتتى پنەۆمونياسى اۋىر وتكەن. ەكى جاقتى پلەۆريت. وكپەنىڭ ءىسىنۋى, لايەللا سيندرومى.
سونداي-اق, بۇگىن الماتىدا تاعى ءبىر ادام ىندەت جۇقتىرعانى انىقتالدى, جالپى بۇل 122-ءشى جاعداي. بۇل ادام بۇرىن جۇقتىرعاندارمەن بولعان 1967 جىلى تۋعان ايەل.
جاعدايى پنەۆمونيا سالدارىنا ورتاشا دارەجەدە اۋىر دەلىنىپ وتىر.
بۇگىنگى كۇنى ينفەكتسيالىق ستاتسيونارلاردا 96 ناۋقاس (1 وبلىستىق), ونىڭ ىشىندە 4 بالا بار. 72 ناۋقاستىڭ جاي-كۇيى قاناعاتتانارلىق. 1 ادامنىڭ جاعدايى وتە اۋىر, 4-ۋىندە – اۋىر, 19 ەرەسەك ادامنىڭ جاعدايى ورتاشا اۋىر (1 وبلىستىق).
26 ادام كوروناۆيرۋستىق ينفەكتسيادان ساۋىقتى.
پروۆيزورلىق ورتالىقتاردا 250 ادام, ونىڭ ىشىندە 29-ى بالا, 384 ازامات كارانتيندىك وقشاۋلاۋدا, 5 306 ادام ۇيدەگى كارانتيندە وتىر.
الماتى
