ماقالا ەلباسىمىزدىڭ, حالىقپەن قاشاندا بىرگە ەكەنىن كورسەتەدى جانە ۇلكەن سەنىم بەرەدى. ەلىمىزدىڭ سىندارلى ساياساتى جانە ونىڭ بۇگىنگى جەمىستەرىنىڭ ءبىرى – قازاقستاننىڭ الەمدىك قاۋىمداستىقتىڭ لايىقتى مۇشەسىنە اينالعانى قاۋىپتى ىندەتپەن كۇرەس بارىسىندا دا كورىنىپ وتىر. بۇگىنگى اسا كۇردەلى
احۋال بۇكىل الەمگە, ءبىزدىڭ حالىقتىڭ باسىنا دا تۇسكەن ۇلكەن سىن. وسىنداي سىن ساعاتتا مەملەكەت بولىپ, حالىق بولىپ بىرلىگىمىزدى تانىتۋىمىز كەرەك.
ەلباسى ماقالاسىندا – ۇلت دەنساۋلىعى مەن مەملەكەت قاۋىپسىزدىگى ءبىر-بىرىمەن ەتەنە, ەگىز ۇعىمدار ەكەنى; مەملەكەت بۇل قيىندىقتان شىعۋ ءۇشىن قولدان كەلگەننىڭ ءبارىن جاسايتىنى جانە ءتيىستى شارانىڭ بارلىعىن اتقاراتىنى ايتىلعان. «بىردە-ءبىر ادام, ەلىمىزدىڭ ەشبىر ازاماتى قامقورلىقسىز قالمايدى» دەدى ەلباسى. بۇل – اسا ىزگى ءسوز. ىندەتپەن كۇرەسۋگە مەملەكەتىمىزدىڭ قاۋقار-قۋاتى جەتكىلىكتى, قارجىلىق جاعدايى, ءتيىستى قورى بار, ەكونوميكامىزدىڭ ورنىقتى ەكەنى ايتىلدى. ال وسىنداي سىن ساعاتتا ۇلكەن رۋحاني كۇش – حالقىمىزدىڭ توزىمدىلىگى, ەرىك-جىگەرى جانە وزىنە دەگەن زور سەنىمى.
ەلباسىنىڭ اعا ۇرپاققا, زيالى قاۋىمعا قاراتا ايتقان سوزدەرى بىزگە ۇلكەن جاۋاپكەرشىلىك جۇكتەيدى. بىزگە بىرلىك كەرەك, «تورتەۋ تۇگەل بولسا توبەدەگى كەلەدى» دەيدى حالقىمىز. بۇل كۇندەر – ءاربىر ازاماتتىڭ جەكە جاۋاپكەرشىلىگىن تالاپ ەتەتىن كۇندەر. «جاقسى ءسوز – جارىم ىرىس» دەيدى حالقىمىز. سوندىقتان دا الىپقاشپا سوزدەردەن, جامان نيەتتى اقپاراتتاردان الىس بولايىق. قاۋىپتى دەرتپەن كۇرەستىڭ الدىڭعى شەبىندە جۇرگەن دارىگەرلەر, ەل قورعاۋشىلار, وزگە دە ءتيىستى جۇمىستارىن اتقارىپ جۇرگەن ازاماتتارعا كۇش-قاجىر, ءتوزىم تىلەيىك. مەملەكەتىمىزدىڭ وسى سىن ساتتە جۇرگىزىپ وتىرعان ساياساتىن ورتالىقتاردا, جەر-جەردە جۇزەگە اسىرىپ وتىرعان باسشى ازاماتتارعا ۇلكەن بىلىكتىلىك, انتتارىنا ادالدىق تىلەيىك. «بىرلەسە بىلگەن ەل ءبارىن جەڭەدى» دەيدى ەلباسى. بۇل اتالى سوزگە مەن دە قوسىلامىن. وسىنداي سىن ساعاتتا ءبارىمىز بىرگە, سابىرلى جانە اسا جاۋاپكەرشىلىكتە بولايىق.
ءسابيت ورازباەۆ,
قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى
