ماڭىزدى تاپسىرما وبلىستىق اكىمدىكتە ارنايى تالقىلانىپ, قوسىمشا جۇمىس ورىندارىن اشۋ ماسەلەسى پىسىقتالدى. ءوڭىر باسشىسىنىڭ ايتۋىنشا, قوستاناي وبلىسىندا «جۇمىسپەن قامتۋدىڭ جول كارتاسى» اياسىندا 13 435 جۇمىس ورنى پايدا بولادى. قازىردىڭ وزىندە جاڭا جۇمىس ورىندارىنا تارتىلاتىن 6 718 ادام بەلگىلى بولىپ وتىر. باعدارلاما بويىنشا شالعايدان كەلىپ جۇمىسقا ورنالاسۋشىلاردىڭ قولىنا بىردەن 85 مىڭ تەڭگە كوتەرمەاقى ۇستاتىلادى.
سونداي-اق ءموبيلدى جۇمىسشى كۇشىن قابىلداۋ ورىندارى قۇرىلادى. جۇمىسقا ورنالاسۋشىلار وسى جەردەن كوروناۆيرۋسكە تەستىلەۋدەن ءوتىپ, ارنايى بولىنگەن كولىكپەن جاڭا جۇمىس ورنىنا جەتكىزىلەدى.
– بۇل باعىتتاعى ءتۇسىندىرۋ جۇمىستارىنا Nur Otan پارتياسى مەن قوعامدىق ۇيىمدار بەلسەنە كىرىسۋى كەرەك. باعدارلاماعا تارتىلعان كاسىپورىندار جۇمىسقا ورنالاسۋشىلارعا جاقسى جاعداي جاساپ, قورعانىش قۇرالدارىمەن قامتۋى كەرەك, – دەدى وبلىس اكىمى.
ارحيمەد مۇحامبەتوۆ بيزنەس سالاسىنا دا ۇلكەن قولداۋ كورسەتىلەتىنىن ايتتى. وبلىستىڭ شاعىن جانە ورتا بيزنەس سالاسىندا 51 494 كاسىپورىن جۇمىس ىستەيدى. بۇل كاسىپورىنداردا 160 مىڭعا جۋىق ادام تۇراقتى ەڭبەك ەتەدى. ولاردىڭ قىسقارتۋعا ءتۇسىپ قالماي, ايلىق جالاقىسىن ۋاقتىلى الىپ وتىرۋىن قامتاماسىز ەتۋ ءۇشىن كوپتەگەن كاسىپورىننىڭ نەسيە تولەمىنىڭ مەرزىمى شەگەرىلىپ, سالىقتان بوساتىلدى. ماسەلەن, ساۋدا ورىندارى مەن ءدامحانالار, ترانسپورت, تۋريزم, قوناق ءۇي بيزنەسىمەن اينالىساتىن كاسىپكەرلەر 1 ساۋىردەن باستاپ قازان ايىنا دەيىن جارتى جىل بويى سالىق تولەۋدەن بوساتىلدى.
قوستاناي وبلىسى
