وسى ماقساتتا ءبىر عانا الماتى وبلىسىندا 22,8 مىڭ ادامعا جۇمىس ىستەۋگە مۇمكىندىك بەرەتىن 977 جوبا جۇزەگە اسپاق. بۇعان 109,2 ملرد تەڭگە بولىنگەن. قازىر مەملەكەتتىك ساراپتاما قورىتىندىسىنان وتكەن جوبالىق-سمەتالىق قۇجاتتاما ارقىلى ءوڭىر تۇرعىندارى تابىستى جۇمىس ورنىنان ءۇمىتتى. جالپى, جۇمىس ورىندارىن اشۋ تەك بيۋدجەت قارجىسى ەسەبىنەن عانا جۇزەگە اسىپ جاتقان جوق. جەكە ينۆەستورلار اشقان ءونىدىرىس ورىندارىندا دا جۇمىس كۇشىنە سۇرانىس بار. مىسالى, جەكەمەنشىك ينۆەستيتسيالار ەسەبىنەن 367,6 ملرد تەڭگە جۇمسالعان 75 نىسان ىسكە قوسىلعان. ناتيجەسىندە, 5 مىڭنان استام جۇمىس ورىنى اشىلادى. اتاپ ايتقاندا, سينگاپۋر مەملەكەتىنىڭ ينۆەستيتسياسىنا سالىنىپ جاتقان Alacem زاۋىتى, بىرىككەن اراب امىرلىگىنىڭ قارجىسىنا اشىلاتىن Phoenix feed mills كومپانياسى, نيدەرلاندتىقتار قولعا العان ستك Sokol جوباسى جانە كورشىلەس قىتاي ينۆەستورلارى ىسكە قوساتىن Mistral energy كومپانياسىنىڭ ءوندىرىس ورىندارى جۇمىس كۇشىنە دەگەن سۇرانىستى وسىرەدى دەگەن بولجام بار.
ايتپاقشى, توتەنشە جاعداي جاريالانعان مەرزىم ارالىعىندا وبلىستاعى 48 ءىرى كاسىپورىن مەن 158 ورتا ءوندىرىس نىساندارىندا ءوندىرىس كولەمى ازايىپ, سونىڭ سالدارىنان قىزمەتكەرلەردى قىسقارتۋ مەن اقىسىز دەمالىسقا جىبەرۋ دەرەگى تىركەلمەپتى. ياعني, بۇل سالادا جۇمىس ىستەپ جۇرگەن
156 مىڭ ادام ءوز مىندەتتەرىن تولىق اتقارىپ, ەڭبەكاقىسىن الىپ وتىر.
– وبلىستا بۇرىن دا جول كارتاسى بويىنشا جۇمىستار اتقارىلدى, بىراق مۇنداي كولەمدە قاراجات العاش رەت ءبولىنىپ وتىر. سوندىقتان ءبىز قاراجاتتى ۋاقىتىندا جانە ساپالى يگەرۋگە جانە تۇرعىنداردى جۇمىسپەن قامتۋ ماسەلەسىن شەشۋگە مىندەتتىمىز. جوسپارعا سايكەس «ەڭبەك» باعدارلاماسى بويىنشا 22 مىڭ ادامدى جۇمىسپەن قامتۋدىڭ بەلسەندى شاراسى جاسالدى, – دەيدى وبلىس اكىمى اماندىق باتالوۆ.
جالپى, الماتى وبلىسىندا «جۇمىسپەن قامتۋدىڭ جول كارتاسى» اياسىندا بولىنگەن قاراجاتتىڭ 54 پايىزى وڭىردەگى الەۋمەتتىك-مادەني سالانىڭ ماسەلەسىن شەشۋگە باعىتتالماق. ماسەلەن, وسى قارجىعا وڭىردەگى مەكتەپ جەتىسپەۋشىلىگىن جويۋدىڭ ءساتتى مۇمكىندىگى تۋاتىن سياقتى. ويتكەنى, ايماق بويىنشا سالىنىپ جاتقان 16 مەكتەپكە قوسىمشا تاعى 7 مەكتەپتىڭ قۇرىلىسى باستالماق. بۇل قوسىمشا 10,2 مىڭ بالانى ورىنمەن قامتىماق. ال «جۇمىسپەن قامتۋدىڭ جول كارتاسى» اياسىندا بولىنگەن قاراجاتتى ءتيىمدى يگەرگەن جاعدايدا بيىل جەتىسۋدا 23 مەكتەپتى ىسكە قوسۋعا بولادى ەكەن. ال بۇل ءۇش اۋىسىمدى مەكتەپ سانىن ازايتۋعا جول اشپاق. قازىر وبلىستا
32 ءۇش اۋىسىمدى مەكتەپ بار.
سونداي-اق بولىنگەن قارجى مەكتەپ قۇرىلىسىنان بولەك جەرگىلىكتى جەردەگى مەديتسينا مەكەمەلەرىن دە جاڭا عيماراتپەن قامتۋعا مۇمكىندىك بەرمەك. بۇگىندە وبلىستاعى 5 اۋىلدا دارىگەرلىك امبۋلاتوريا سالۋ جوسپارلانىپتى. سونداي-اق جۇمىسپەن قامتۋدىڭ جول كارتاسى اياسىندا وڭىردەگى 53 ەلدى مەكەننىڭ سۋمەن جابدىقتاۋ نىساندارى قايتا جاڭارتىلىپ, جوندەلمەك. تاعى 84 ەلدى مەكەندە اباتتاندىرۋ جۇرگىزىپ, 220 ەلدى مەكەننىڭ 500 شاقىرىم جولىن جاساۋ دا وسى قاراجاتتىڭ ەسەبىنەن جوسپارلانعان.
الماتى وبلىسى
