تەحنولوگيا • 09 ءساۋىر، 2020

ىندەت تسيفرلاندىرۋ ماسەلەسىنە قاتىستى قانداي مىندەت جۇكتەدى؟

108 رەتكورسەتىلدى

الەمدى پاندەميا ۇرەيى بيلەپ تۇرعان قازىرگى قىسىلتاياڭ شاقتا تسيفرلاندىرۋدىڭ ماڭىزى ارتا ءتۇستى. كوپتەگەن سالانىڭ جۇمىس قارقىنى باسەڭدەپ، ءتىپتى تەجەلىپ تۇرعان شەتىن جاعداي تسيفرلىق تەحنولوگيالاردىڭ شاما-شارقىن، جالپى ءىت-سالانىڭ دەڭگەيىن باعامداۋعا ىقپال ەتتى.

توتەنشە جاعداي ەلىمىزدە تسيفرلاندىرۋدىڭ قاجەتتى دەڭگەيدە ەمەس ەكەنىن كورسەتتى. وسى ويدى قۇپتاعان «استانا» حالىقارالىق قارجى ورتالىعىنىڭ تسيفرلىق تەحنولوگيالار بويىنشا ديرەكتورى اسەل جاناسوۆا قازاقستانداعى ءىت-سالانىڭ احۋالى جونىندە ايتىپ بەردى.

– قازىر كەيبىر سالالاردا قاشىقتان جۇمىس ىستەۋ مۇمكىن بولماي تۇر. ويتكەنى جۇمىس پروتسەسىنىڭ كوبى قاعازباستىلىققا تاۋەلدى. بۇل – مەملەكەتتىك ورگانداردا دا، بيزنەستە دە كەزدەسىپ وتىرعان جاعداي. ءبىلىم بەرۋ جۇيەسى ونلاين وقىتۋ كەزىندە ينتەرنەتتىڭ قولجەتىمدىلىگىنە قاتىستى ولقىلىققا قوسا، تاعى بىرقاتار قيىندىققا تاپ بولدى. ايتالىق، ءبىراز جۇرتتىڭ ءالى دە كومپيۋتەرلىك ساۋاتتىلىعى تومەن ەكەنى بايقالدى. مۇعالىمدەر مەن وقۋشىلاردىڭ كومپيۋتەردە قاراپايىم بازالىق داعدىسى قالىپتاسپاعان. Word، Powerpoint، ەxcel سياقتى باعدارلامالاردى مەڭگەرمەۋ، ەلەكتروندى پوشتانى پايدالانا الماۋ جۇمىستى تەجەپ جاتىر. سوندىقتان تسيفرلاندىرۋدى جۇزەگە اسىرۋ بارىسىندا وسى ماسەلەلەردى دە شەشىپ الۋ كەرەك. ويتكەنى جاسالعان تسيفرلىق مۇمكىندىكتەردى حالىقتىڭ قولدانا الاتىنداي قابىلەتى بولۋى كەرەك، – دەيدى اسەل جاناسوۆا.

سونىمەن قاتار ءىت-مامان ەلەكتروندى ۇكىمەت جۇيەسىن بارىنشا ۇيلەستىرۋ تۋرالى ءسوز قوزعادى. ول بۇل رەتتە دۋبايدىڭ تاجىريبەسىن مىسال ەتتى. ءباا-ءنىڭ ءىرى قالاسىندا كوروناۆيرۋس پايدا بولعانعا دەيىن قىزمەت كورسەتۋ مەكەمەلەرى اپتاسىنا ءبىر كۇن تولىق قاشىقتان جۇمىس ىستەپ كەلگەن. ال قازىر ەلىمىزدە حالىق جاپپاي ەgov-قا اعىلۋىنان جۇيە سىر بەردى. ياعني، قاشىقتان جۇمىس رەجيمىنە دايىندىق جوق ەكەنى كورىندى.

– بۇل ىندەت ەكونوميكالىق داعدارىس قاۋپىن تۋدىرىپ تۇر. نارىقتا باسەكەگە قابىلەتتى، زامان كوشىنە ىلەسە الاتىنداردىڭ داۋرەنى جۇرەدى. بۇگىندە ءبىراز سالادا ەلەكتروندى تولەم جۇيەسى جولعا قويىلماعان. ءتىپتى بۇعان دايىن ەمەس بانكتەر دە بارشىلىق. دۇنيەجۇزىندە ونلاين رەجيمگە كوشۋگە بايلانىستى ءىرى دۇكەندەر بانكروتقا ءتۇسىپ، جابىلۋى مۇمكىن. كەڭسەلەردى قامتاماسىز ەتىپ، ۇستاپ تۇرۋ وڭايعا سوقپايدى. بىزدە ينتەرنەت-دۇكەندەردىڭ دامىماعانىن، تاپسىرىستاردى ونلاين قابىلداپ، جەتكىزىپ بەرۋ جاعى اقساپ تۇرعانىن كورىپ وتىرمىز. سوندىقتان شاعىن جانە بيزنەس وكىلدەرى وسى جاعدايعا تەز بەيىمدەلىپ، تىعىرىقتان شىعاتىن تىڭ باستامالارعا تاۋەكەل ەتكەنى ءجون، – دەيدى ساراپشى.

ادامداردىڭ ۇيلەرىندە وقشاۋلانۋى كەزىندە Cloud تەحنولوگيالارعا كوشۋدى جەدەلدەتۋدىڭ ماڭىزى ارتتى. سەبەبى قازىرگى جاعدايدا ZOOM، Skype سياقتى باعدارلامالارعا شامادان تىس سالماق ءتۇسىپ، ۆيرتۋالدى جۇمىس جۇرگىزۋ قيىن بولىپ تۇر. وسىنداي تاۋەلدىلىكتەن قۇتىلۋدىڭ ءبىر جولى – ءوزىمىزدىڭ ارنايى قوسىمشالاردى ازىرلەۋ. جالپى تىنىس-تىرشىلىكتى تارىلتقان كوروناۆيرۋس ىندەتى جەدەل تۇردە قولعا الۋ كەرەك جاڭا مىندەتتەر جۇكتەدى.

سوڭعى جاڭالىقتار

ۇقساس جاڭالىقتار