ايماقتار • 09 ءساۋىر، 2020

تويدىڭ سوڭى توپىرلاعان سىرقات

817 رەتكورسەتىلدى

ءساۋىردىڭ 7-ءسى كۇنى وبلىستىڭ باس سانيتاريالىق دارىگەرىنىڭ №7 قاۋلىسى قابىلداندى. وسىعان دەيىنگى كارانتيندىك شارالار كۇشەيتىلىپ، كەيبىر شەكتەۋلەر تالابى قاتايا ءتۇستى. ويتپەسكە تاعى بولماي تۇر – وڭىردە دەرت جۇقتىرعانداردىڭ قاتارى ءسات ساناپ ءوسىپ بارادى.

جاڭا قاۋلىعا بايلانىستى وب­لىستىق تاۋارلار، قىز­مەت­تەر­دىڭ ساپاسى مەن قاۋىپ­سىز­دى­گىن باقىلاۋ دەپارتامەنتى باس­شىسىنىڭ ورىنباسارى، اي­­ماق­تىڭ باس ساني­تاريالىق دا­رىگەرى ءاليا ابدى­قايىموۆا وڭىر­­لىك كوممۋنيكا­تسيالار قىز­مەتىندە ونلاين بري­فينگ وتكىزدى. وبلىستا تىركەل­گەن ناۋقاستاردىڭ شامامەن 60-70 پايىزى جاستار ەكەن. بۇل نەگىزىنەن دارىگەرلەردىڭ ەس­كەر­تۋىنە قۇلاق اسپاي، ساۋىق كەشىن ۇيىمداستىرۋدان بولىپ وتىر.

– ايماقتا ينفەكتسيانىڭ تا­راۋىندا توپتىق جاعدايلار كوپ­تەپ تىركەلىپ جاتىر. مىسالى، جاقىندا عانا نۇر-سۇلتان قالا­سىنان كەلگەن ستۋدەنت بويجەتكەن وقشاۋلانۋ ءتارتىبىن ساقتاماي قۇربىلارىمەن كەزدەسكەن، سىنىپتاستارىمەن ساۋىق كەشىن ۇيىمداستىرعان. وسىلايشا ىندەت ىرگەسىن جايا تۇسكەن، – دەيدى ءاليا ابدىقايىمقىزى.

جاڭا قاۋلى بويىنشا تۇرعىن­دارعا كوشەدە توپتاسىپ جۇرۋگە تىيىم سالىنىپ وتىر. ءولىم-ءجىتىم جاعدايىندا جينالۋعا دا شەكتەۋ قويىلدى. جاسى 55-تەن اسقاندار ءۇي كارانتينىن قاتاڭ ساقتاۋى ءتيىس. ال تەمىر جول، كەن سالاسى ما­ماندارىنىڭ جۇمىس ءتارتىبى جەرىگىلىكتى اتقارۋشى ورگان شە­شىمىنە قاراي رەتتەلەدى.

وسىنىڭ ءبارى اۋرۋدىڭ تارالۋ اياسىن شەكتەپ، ادامداردى قاتەرلى ىندەتتەن امان الىپ قالۋ ءۇشىن جاسالىپ جاتقان امالدار. بىراق ەسكەرتۋدى ەلەمەيتىندەر وتباسىلىق باسقوسۋلاردى توق­تاتپاي، كەرىسىنشە ۇدەتە تۇسكەن جاع­دايلار دا بار. مىسالى، وڭىر­دە بويىنان ەڭ العاش كورونا­ۆيرۋستىق ينفەكتسيا انىقتالعان ادام اۋلەتىندەگى 21 جانعا قاۋىپتى ىندەتتى جۇقتىرىپ ۇلگەرگەن. شيە­­لى اۋدانىنداعى 6 ناۋقاستىڭ دا ءبىر ءۇيدىڭ ادامدارى ەكەندىگى انىقتالىپ وتىر. تاياۋدا وسى اۋدان­نان تىركەلگەن 13 دەرەك تە وسىنداي ويسىزدىقتىڭ سالدارى. «نە بولار دەيسىڭ؟!» دەگەن نەمكەتتىلىكتەن اياداي عانا اۋىلدان 25 سىرقات شىقتى.

قازىرگى جاعداي ەشكىمگە وڭاي ءتيىپ وتىرعان جوق. ىندەت كەسى­رىنەن اعايىننىڭ تويى تۇگىلى توپىراقتى ولىمىنە با­را الماي پۇشايمان بولىپ وتىر­عان­دار كوپ. ويتكەنى، تالاپ سون­داي. ال ول ساقتالماسا ەپي­دە­ميولو­گيالىق احۋال ودان سايىن ءور­شيتىنى انىق. قازىر قى­زىل­وردا ەلىمىز بويىنشا اۋرۋ سانى جونىنەن الدىڭعى ءۇش وبلىس­تىڭ قاتارىندا تۇر. باس دارى­گەر كارانتيندىك تالاپقا ءجۇر­دىم-باردىم قارايتىن بول­ساق، جاعداي بۇدان دا ۋشىعىپ كەتۋى مۇمكىن ەكەندىگىن ەسكەرتتى.

اباي بولايىق، امان بولايىق!

 

قىزىلوردا

 

سوڭعى جاڭالىقتار

Covid-19: تاعى 3 ادام كوز جۇمدى

كوروناۆيرۋس • كەشە

Covid-19: 184 ادام جازىلىپ شىقتى

كوروناۆيرۋس • كەشە

نۇكتە فيلوسوفياسى

رۋحانيات • كەشە

ۇقساس جاڭالىقتار