پارلامەنت • 08 ءساۋىر، 2020

ءماجىلىس ميتينگ تۋرالى زاڭ جوباسىن ەكىنشى وقىلىمدا ماقۇلدادى

52 رەتكورسەتىلدى

پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» زاڭ جوباسى ەكىنشى وقىلىمدا ماقۇلداندى.

زاڭ جوباسىنىڭ ماقساتى – ازاماتتاردىڭ بەيبىت جينالىستار، ميتينگىلەر مەن دەمونستراتسيالار، شەرۋلەر مەن پيكەتتەۋ وتكىزۋىنە قاتىستى كونستيتۋتسيالىق قۇقىعىن ىسكە اسىرۋ.

زاڭ جوباسىندا بەيبىت جينالىستاردى وتكىزۋ ءۇشىن حابارلاما جاساۋ ءتارتىبى ەنگىزىلەدى. بۇل رەتتە جەرگىلىكتى اتقارۋشى ورگاننىڭ جاۋابى بولماعان جاعدايدا، بەيبىت جينالىستى وتكىزۋ ءۇنسىز كەلىسىم بويىنشا كەلىسىلدى دەپ ەسەپتەلەدى.

قۇجاتتا بەيبىت جينالىستاردى مامانداندىرىلعان ورىنداردا عانا وتكىزۋ كوزدەلەدى. ونى جەرگىلىكتى ءماسليحات ايقىندايدى. مامانداندىرىلعان ورىندار ۇيىمداستىرۋ ىڭعايلىلىعىن، كولىك قولجەتىمدىلىگىن، جينالىستاردى ۇيىمداستىرۋشىلار مەن قاتىسۋشىلاردىڭ، باسقا ادامداردىڭ قاۋىپسىزدىگىن، ولاردىڭ ينفراقۇرىلىم وبەكتىلەرىن پايدالانۋ مۇمكىندىگىن قامتاماسىز ەتۋگە ءتيىس. زاڭ جوباسىندا بەيبىت جينالىستاردى وتكىزۋ ءۇشىن بالامالى ورىندى ۇسىنۋ قۇقىعى دا كوزدەلگەن.

بەيبىت جينالىستاردى وتكىزۋ تۋرالى حابارلامانى بەرۋ مەرزىمى – بەس جۇمىس كۇنىنە دەيىن، ال دەمونستراتسيا، شەرۋ نىسانىنداعى جينالىستاردى وتكىزۋ كەلىسىمىن الۋ تۋرالى ءوتىنىشتى بەرۋ مەرزىمى ون جۇمىس كۇنىنە دەيىن قىسقارتىلدى. وسىعان بايلانىستى جەرگىلىكتى اتقارۋشى ورگاندار قۇجاتتاردى تيىسىنشە ءۇش جانە جەتى جۇمىس كۇنى ىشىندە قاراۋعا ءتيىس. مامانداندىرىلعان ورىنداردىڭ بار-جوعى، بوس نەمەسە بوس ەمەستىگى تۋرالى اقپاراتتىڭ اشىق ءارى وبەكتيۆتى بولۋى ماقساتىندا جەرگىلىكتى اتقارۋشى ورگانداردىڭ قۇزىرەتىنە ءوز ينتەرنەت-رەسۋرسىندا بەيبىت جينالىستاردى وتكىزۋگە ارنالعان ورىنداردىڭ ءتىزىمىن جۇكتەيتىن تۇزەتۋ ەنگىزىلدى. بۇل بەيبىت جينالىستاردى ۇيىمداستىرۋشىلارعا ءىس-شارالارىن الدىن الا جوسپارلاۋعا مۇمكىندىك بەرەدى.

سونداي-اق قۇقىقتىق ولقىلىقتارعا جول بەرمەۋ، زاڭ جوباسىنىڭ نورمالارىن ءبىر-بىرىنە جانە باسقا دا زاڭنامالىق اكتىلەرگە سايكەس كەلتىرۋ ماقساتىندا رەداكتسيالىق، ناقتىلاۋشى سيپاتتاعى تۇزەتۋلەر ەنگىزىلدى.

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار