ايماقتار • 08 ءساۋىر، 2020

قوستاناي وبلىسى: بوراننان كەلگەن زيان مولشەرى انىقتالىپ جاتىر

233 رەتكورسەتىلدى

قوستاناي قالاسىنىڭ اكىمدىگى وبلىس ورتالىعىنداعى بارلىق جىلۋ قازاندىقتارى مەن سورعى ستانسالارىن قوسىمشا قۋات كوزدەرىمەن قامتاماسىز ەتۋ جولدارىن قاراستىرۋدا. قالا اكىمىنىڭ ورىنباسارى انۋاربەك قاسىموۆتىڭ ايتۋىنشا، 7 ساۋىردەگى تابيعاتتىڭ توسىن مىنەزىنە بايلانىستى ارنايى شتاب قۇرىلىپ، تاۋلىك بويى الاسۇرعان قارلى بوراننان كەلگەن زيان مولشەرىن ەسەپتەۋ، تىركەۋ جۇمىستارىن جۇرگىزىپ جاتىر.

ماماندار قوستانايدا مۇنداي جويقىن بوران 20 جىلدان بەرى بولماعانىن ايتادى. دۇلەي بوران تالاي تەرەكتى قۇلاتىپ كەتتى. وبلىس ورتالىعىنىڭ وزىندە عانا 21 بيللبورد جىرتىلىپ، 48 باعدارشام قيراعان. ىستەن شىققان باعدارشامدار اپتانىڭ سوڭىنا دەيىن قالپىنا كەلتىرىلۋى ءتيىس. ال پوليتسيا بەرگەن مالىمەت بويىنشا، كەشە وبلىستا 106 جول كولىك وقيعاسى بولعان.  ايماقتىڭ باس شاھارىنىڭ وزىندە ءبىر كۇننىڭ ىشىندە  48 كولىك سوقتىعىسى تىركەلىپ وتىر.

«قوستاناي ەنەرگيا ورتالىعى» سەرىكتەستىگىنىڭ مالىمەتىنشە، الاپات بوران كەشە  09 ساعات 46 مينۋتتا «KEGOG» كومپانياسىنا تيەسىلى كەرنەۋى 500كۆ  بولاتىن 6 ەلەكتر جەلىسىن ىستەن شىعارعان. ودان كەيىن كۇنى بويى كەرنەۋى 220 كۆ بولاتىن تاعى 8 ەلەكتر جەلىسى ءۇزىلىپ، سالدارىنان قوستاناي وبلىسىنداعى جۇزدەگەن ەلدى مەكەن جارىقسىز قالعان. مۇنىڭ سىرتىندا، كومپانيانىڭ جوعارى ۆولتتى جەلىلەرىن ۇستاپ تۇرعان 42 تىرەۋىش قۇلاپ، توق سىمدارى ءۇزىلىپ كەتكەن.  

«KEGOG» ماماندارى اۋا رايىنىڭ قولايسىزدىعىنا قاراماستان، ىستەن شىققان 14 ەلەكتر جەلىسىن تولىقتاي جوندەپ، قايتا جانداندىرعان. سونداي-اق،  220 كۆ كەرنەۋلى سوكول – زارەچنىي – ورتالىق – قوستاناي ەلەكتر جەلىلەرى دە قالپىنا كەلتىرىلدى.

قازىر وبلىس ورتالىعىندا تىرشىلىك قايتا جاندانىپ، تۇرعىن ۇيلەرگە بىرتىندەپ ەلەكتر قۋاتى بەرىلە باستادى. بۇگىن جۇمىس كۇنىنىڭ اياعىنا دەيىن بارلىق ءۇي جارىق، جىلۋ جانە سۋمەن تولىق قامتاماسىز ەتىلۋى ءتيىس.

 

قوستاناي وبلىسى

سوڭعى جاڭالىقتار

پاۆلوداردا ەكوبازار اشىلدى

ايماقتار • بۇگىن، 17:09

ۇقساس جاڭالىقتار