پارلامەنت • 08 ءساۋىر، 2020

سەناتورلار بىرقاتار زاڭ جوبالارىن قاشىقتان تالقىلادى

9 رەتكورسەتىلدى

پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى قاشىقتان وتىرىس وتكىزدى، دەپ حابارلادى سەناتتىڭ ءباسپاسوز قىزمەتى.

وندا بىرقاتار ماسەلەلەر تالقىلاندى. ولاردىڭ ىشىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كوشى-قون پروتسەستەرىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بولدى. بۇل قۇجات بويىنشا ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى اقمادي سارباسوۆ پەن سەناتور ءالىمجان قۇرتاەۆ بايانداما جاسادى.

وسى ماسەلەنى قاراۋ بارىسىندا دەپۋتاتتار قازاقستاننىڭ بارلىق وڭىرلەرىنىڭ اۋماعىندا شەتەلدىك جۇمىس كۇشىن تارتۋعا ارنالعان كۆوتانى قولدانۋدى، ورالمانداردى ۋاقىتشا ورنالاستىرۋ ورتالىقتارى مەن بەيىمدەۋ جانە كىرىكتىرۋ ورتالىقتارىنىڭ جۇمىس ىستەۋىن، ورالمانداردى وقىتۋ، قايتا وقىتۋ جانە جۇمىسقا ورنالاستىرۋ ماسەلەلەرىن تالقىلادى. دەپۋتاتتار سونداي-اق زاڭ جوباسىن ازىرلەۋشىلەرگە ورالمان تۇراقتى تۇرۋعا ارنالعان قۇجاتتاردى العان كەزدە مەملەكەتتىك باج سالىعىن تولەۋگە، «ورالمان» ۇعىمىن پايدالانۋعا، سونداي-اق «قانداس» جانە «رەپاتريانت» انىقتامالارىن ەنگىزۋگە قاتىستى سۇراقتار قويدى.

ودان كەيىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتوم ەنەرگياسىن پايدالانۋ سالاسىنداعى ازاماتتىق-قۇقىقتىق جاۋاپتىلىق ماسەلەلەرى بويىنشا وزگەرىس پەن تولىقتىرۋلار ەنگىزۋ تۋرالى» زاڭ جوباسى تالقىلاندى. بۇل ماسەلە بويىنشا ەلىمىزدىڭ ەنەرگەتيكا ءمينيسترىنىڭ ورىنباسارى قايرات راحيموۆ مەن سەناتور ميحايل بورتنيك بايانداما جاسادى.

كۇن تارتىبىندەگى ەكىنشى ماسەلەنى قاراۋ بارىسىندا سەناتورلار يادرولىق زالالدار ءۇشىن يادرولىق قوندىرعى وپەراتورىمەن نەمەسە يادرولىق قوندىرعىلاردىڭ بىرىڭعاي وپەراتورىمەن جاسالعان ازاماتتىق-قۇقىقتىق جاۋاپكەرشىلىكتى ساقتاندىرۋ شارتى بويىنشا ساقتاندىرۋ سوماسىن تولەۋ كوزدەرىن تالقىلادى.

زاڭ جوبالارىن تالقىلاۋ ناتيجەسى بويىنشا كوميتەتتىڭ قورىتىندىلارى باس كوميتەتتەرگە جىبەرىلدى.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار