ايماقتار • 08 ءساۋىر، 2020

تاسقىنعا مونيتورينگ جۇرگىزىلدى

13 رەتكورسەتىلدى

ەكىنشى جانە ءۇشىنشى ساۋىردە سولتۇستىك قازاقستانداعى سۋ تاسقىنى جاعدايىن موني­تورينگتەۋ ماقساتىندا قاۋىپتى ايماقتارعا اۋەدەن باقىلاۋ جۇرگىزىلدى. بورتىندا ىشكى ىستەر ءمينيسترىنىڭ ورىنباسارى يۋري يلين، وبلىس اكىمىنىڭ ورىنباسارى انتون فەدياەۆ، ءىىم تجك سقو تج دەپارتامەنتىنىڭ باستىعى، ازاماتتىق قورعاۋ پولكوۆنيگى راميل كامالوۆ بار تىكۇشاق ايىرتاۋ، ع.مۇسىرەپوۆ، شال اقىن، ەسىل جانە قىزىل­جار اۋداندارى مەن پەتروپاۆل قالا­سىنىڭ اۋماعىن ارالاپ، ۇشىپ ءوتتى.

تىكۇشاقتاعى توپ يمانتاۋ، كىشى تورانعۇل جانە ۇلكەن تورانعۇل كولدە­رىندەگى مۇز جاعدايىنىڭ قاۋ­پىن باعالادى. وبلىستىڭ باس­تى سۋ ارتەرياسى – ەسىل وزەنى مەن ونىڭ – شارىق، اقانبۇرلىق، بابىق­بۇر­لىق، يمانبۇرلىق، جەمباراق، قامىقساقتى سياقتى ساعالارىنا ەرەكشە نازار اۋدارىلدى. سونداي-اق سەرگەەۆ سۋ قويماسىنىڭ بوگەتى تەكسەرىلدى.

باسشىلار سۋ تاسقىنى جاع­دا­يىن مۇقيات قاراپ جانە جاعداي شيە­لەنىسكەن بولسا حالىقتى قالاي قور­عاۋ شارالارىن جوسپارلادى. مۇنداي جوسپارلار بۇرىننان بار بولاتىن. ۇشۋ بارىسىندا كوكتەمگى سۋ تاسقىنى قاۋپى مەن قاتەرلەرىنەن حالىقتى قورعاۋ بويىنشا جۇزەگە اسىرىلاتىن جانە جوسپارلانعان بۇرىنعى ءىس-شارالارعا تۇزەتۋلەر ەنگىزىلدى.

جالپى، بيىلعى ىلعال قورى وبلىس­تىڭ وڭتۇستىك وڭىرىندە – ايىرتاۋ، ع. مۇسىرەپوۆ، تيميريازەۆ اۋدان­دارىندا جىل­دا­عى شا­ما­دا­عىداي. ال وبلىستىڭ ورتالىق، سولتۇستىك جانە سولتۇستىك-شىعىس بو­لىك­تەرىندە قار جامىلعىسى تۇ­گەل­­دەي دەرلىك جۇقارىپ، قاۋىپتى جاع­­دايدى سەيىلتتى.

سۋ تاسقىنى قاۋپىنە قارسى جەدەل ارەكەت ەتۋ ءۇشىن قۇرامىندا 484 ادام، 155 بىرلىك تەحنيكا، 8 بىرلىك ءجۇزۋ قۇرالى جانە 72 بىرلىك موتو­پومپا بار تجد كۇشتەرى مەن قۇرالدارى بار توپ دايىندىق ساپىندا تۇر.

سونىمەن قاتار سۋ تاسقىنى جاعدايىنا مونيتورينگ جۇرگىزۋ جانە الدىن الۋ ءىس-شارالارىن ورىنداۋ ماقساتىندا ع.مۇسىرەپوۆ، ءۋاليحانوۆ جانە ايىرتاۋ اۋدان­دار­ىنا تج دەپارتامەنتى ۆە­دوم­­ستۆولىق باعىنىستاعى بولىم­شەلەرىنەن 9 بىرلىك تەحنيكا، جەكە قۇرامىنان 40 ادام، 5 بىرلىك ءجۇزۋ قۇرالى جانە 7 موتوپومپا كۇشتەرى مەن قۇرال­دا­رىن توپتاستىرعان. بۇگىنگى كۇنگە دەيىن وڭىردەگى كوكتەمگى قادامدار سات­تى­لىكپەن باستالدى. كۇن جار­قى­راپ، اۋا رايى كۇننەن-كۇنگە جى­لى­لىق­قا بەت بۇرۋدا. ەندى تەك قارعىن اساۋ مىنەز تانىتپاسا بولعانى. ار جا­عىندا ەگىس جۇمىستارىنا دايىندىق تا باستالىپ كەتەدى.

 

سولتۇستىك قازاقستان وبلىسى

 

سوڭعى جاڭالىقتار

ۇقساس جاڭالىقتار