پارلامەنت • 08 ءساۋىر، 2020

جۇمىسسىزدار قولداۋعا مۇقتاج

23 رەتكورسەتىلدى

داريعا نازارباەۆانىڭ توراعالىق ەتۋىمەن پارلامەنت سەناتى بيۋروسىنىڭ وتىرىسى ءوتىپ، وندا ماجىلىستە ماقۇلدانعان زاڭ جوبالارىن كوميتەتتەر اراسىندا ءبولۋ ماسەلەلەرى قارالدى.

القالى جيىندا 9 ساۋىرگە جوس­­پار­لانعان سەناتتىڭ كەزەكتى وتى­رى­سىنىڭ كۇن ءتارتىبى ماقۇل­دان­دى. كوميتەت توراعالارى وندا قارا­لاتىن ماسەلەلەردەن حاباردار ەتتى.

بيۋرو وتىرىسىندا ءسوز باس­تا­عان سەنات توراعاسى داريعا نازارباەۆا پرەزيدەنت پەن توتەنشە جاعداي ءتارتىبىن قام­تاما­سىز ەتۋ جونىندەگى مەم­لەكەت­تىك كوميسسيا كورونوۆيرۋس ين­فەك­تسياسىنىڭ تارالۋىنا قارسى قاجەتتى بارلىق شارانى شۇعىل جانە الدىن الا قابىلداپ جاتقانىن اتاپ ءوتتى.

– ەندى ەڭ باستىسى – ءىس-شارا­لار­دىڭ جەرگىلىكتى جەرلەردە جۇ­زەگە اسىرىلىپ، ناقتى ورىندالۋى. وكىنىشكە قاراي، كوبىنە تاپ­سىر­­مالاردىڭ جەرگىلىكتى جەرلەردە ورىندالۋى كوپ سۇراقتى تۋىنداتىپ جاتادى. قازىرگى كەزدە ەلدىڭ ەكونوميكاسىنا دا،  ادامدارعا دا كۇردەلى كەزەڭنىڭ سالدارىن اۋىر سەزىنبەي شىعۋ ءۇشىن مەملەكەتتىك ورگاندار­دىڭ، دەپۋتاتتىق كورپۋس­تىڭ جانە بارلىق دەڭگەيدەگى اكىمدەردىڭ، سونداي-اق بيزنەس-قۇرىلىمداردىڭ بىرلەسىپ كۇش جۇمساعانى دۇرىس، –  دەدى سەنات باسشىسى.

داريعا نازارباەۆا سەنات كومي­تەتتەرىنە 2020 جىلعا ارنال­عان بيۋدجەتكە ەنگىزىلەتىن ناقتى­لاۋلاردى مۇقيات زەرتتەۋدى جانە ءوز باعىتتارى بويىنشا ونىڭ ورىندالۋىنا مونيتورينگ جۇرگىزۋدى پىسىقتاۋدى تاپسىردى. اتاپ ايتقاندا، 1 ترلن تەڭگە بولىنەتىن جۇمىسپەن قامتۋدىڭ جول كارتاسى باعدارلاماسىنا نازار اۋدارۋ قاجەت ەكەنى ايتىلدى.

– وڭىرلەردەن سايلانعان دەپۋ­تاتتار ءوز ايماقتارىندا جۇ­مىس­پەن قامتۋدىڭ جول كار­تاسى­­نىڭ قاراجاتىن قانداي ماق­سات­­تارعا جانە وبەكتىلەرگە جۇمساۋ جوس­پارلانىپ وتىرعانىن مۇ­قيات زەردەلەۋى ءتيىس. بۇرىنعى الەۋ­مەتتىك باعدارلامالاردى ىسكە اسىرۋ كەزىندە كوپتەگەن بۇرمالاۋ­شىلىققا جول بەرىلگەنىن ءبىز جاق­سى بىلەمىز. قالالاردىڭ كارانتينگە جابىلۋىنا بايلانىستى جۇمىسسىز قالعان ادامدارعا كوڭىل ءبولۋ كەرەك. ولار ەرەكشە قولداۋعا مۇقتاج، – دەدى داريعا
نازارباەۆا.

سەنات توراعاسى وتىرىس سو­ڭىن­دا ەلباسى مەن «Birgemiz» قوعام­­دىق قورىنىڭ ايماقتارداعى تۇر­عىندارعا كومەك كورسەتۋ جو­نىن­­دەگى باستاماسىن قولداۋدا ءماس­لي­حات دەپۋتاتتارىنىڭ جۇمى­سىن ۇيىمداستىرعانى ءۇشىن پار­­لامەنت سەناتى جانىنداعى جەر­گىلىكتى وكىلدى ورگاندارمەن (ماسلي­حات­تارمەن) ءوزارا ءىس-قيمىل جاساۋ جونىندەگى كەڭەس توراعاسىنىڭ ورىن­باسارى تولەۋبەك مۇقاشەۆقا جانە رەسپۋبليكالىق ءماسليحات دە­پۋتاتتارىنىڭ بىرلەستىگىنە العىس ءبىلدىردى.

سوڭعى جاڭالىقتار

ەلدىك نىشاندار تاريحى

قازاقستان • كەشە

ۇقساس جاڭالىقتار