ءبىلىم • 07 ءساۋىر، 2020

يۋنيسەف پەن دۇنيەجۇزىلىك بانك قازاقستاننىڭ قاشىقتان وقىتۋعا كوشۋ تاسىلىنە قولداۋ بىلدىرەدى

861 رەتكورسەتىلدى

دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتو مەن يۋنيسەف وكىلى ارتۋر ۆان ديزەن قازاقستاندا قاشىقتان وقىتۋ ءۇشىن تاڭدالعان تەتىكتەر تۋرالى ءوز پىكىرلەرىن ءبىلدىردى. بۇل تۋرالى ءبىلىم جانە عىلىم مينيسترلىگىنىڭ ءباسپاسوز قىزمەتى حابارلادى. 

قازىرگى تاڭدا ەلدە 3،2 ملن وقۋشى قاشىقتان وقىتۋ فورماتىنا كوشتى. نەگىزىنەن تەلەساباقتار مەن ارنايى مامانداندىرىلعان ءبىلىم بەرەتىن ينتەرنەت-پلاتفورمالار قولدانىلۋدا. وقۋشىلارمەن كەرى بايلانىس «كۇندەلىك»، «Mektep.edu.kz» جانە «Bilimal.kz» ەلەكتروندى جۋرنالدارى، سونداي-اق، «Google Classroom»، مەسسەندجەرلەر، ەلەكتروندىق پوشتا جانە پوشتا قىزمەتى ارقىلى جاسالادى. بارلىق تەلەساباقتار ينتەرنەتتە قولجەتىمدى. بۇل، قاجەت بولعان جاعدايدا، ۆيدەوساباقتاردى قايتا كورۋگە مۇمكىندىك بەرەدى. قوسىمشا رەتىندە تەلەساباقتاردىڭ راديو نۇسقاسى دا ۇسىنىلعان.
دۇنيەجۇزىلىك بانك وكىلى اتاپ وتكەندەي، بۇگىنگى كۇنى بارلىق ەلدەر جاڭا جاعدايلارعا بەيىمدەلۋگە تىرىسۋدا جانە ءبىلىم بەرۋدە ينتەرنەتكە قوسىلۋ دەڭگەيىنە بايلانىستى ءتۇرلى تەتىكتەردى قاراستىرۋدا.
دۇنيەجۇزىلىك بانك كوپتەگەن ەلگە ۇزدىكسىز ءبىلىم بەرۋ پروتسەسىن قامتاماسىز ەتۋ ماقساتىندا قىسقا مەرزىمدى جانە ۇزاق مەرزىمدى شارالار بويىنشا ۇسىنىستار بەردى.

«جالپى، قازاقستاننىڭ تاڭداعان تاسىلدەرى، تەلە جانە راديوساباقتاردى پايدالانۋدى قوسا العاندا، ءبىزدىڭ ۇسىنىستارىمىزبەن سايكەس كەلەدى، ويتكەنى، ەڭ ماڭىزدىسى – قيىن جاعدايلاردا بارلىق وقۋشىلاردىڭ بىلىمگە قول جەتكىزۋىن قامتاماسىز ەتۋ. سول سەبەپتى سىزدەر بارلىعىن دۇرىس ىستەپ جاتىرسىزدار. بارلىعى دا باسىنان باستاپ 100% جۇمىس ىستەپ كەتەدى دەپ كۇتۋگە بولمايدى، سەبەبى بارلىعىنىڭ وسى جاعدايعا بەيىمدەلۋى قاجەت»، – دەپ اتاپ ءوتتى دۇنيەجۇزىلىك بانكتىڭ قازاقستانداعى تۇراقتى وكىلى جان-فرانسۋا مارتو.

سونىمەن قاتار ول قازىرگى ۋاقىتتا سينگاپۋردا جۇرگەن تۋىستارىنىڭ ونلاين-وقۋعا كوشكەنىن جانە ولاردىڭ دا قيىندىقتارعا تاپ بولىپ جاتقانىن ايتتى.

يۋنيسەف-ءتىڭ قازاقستانداعى وكىلدىگى وكىل ارتۋر ۆان ديزەننىڭ اتىنان قازاقستان رەسپۋبليكاسىنىڭ ءبىلىم جانە عىلىم مينيسترلىگىنە رەسمي حات جولداپ، وندا COVID-19 پاندەمياسىنا بايلانىستى توتەنشە جاعداي كەزەڭىندەگى تابىستى ىنتىماقتاستىعى ءۇشىن العىس ءبىلدىردى.

حاتتا «يۋنيسەف قازاقستان رەسپۋبليكاسى ءبىلىم جانە عىلىم مينيسترلىگىنىڭ كارانتين مەن قاشىقتان جۇمىس ىستەۋ رەجيمىنە قاراماستان، وقۋ پروتسەسىن قامتاماسىز ەتۋ بويىنشا باسقا مەملەكەتتىك ورگاندارمەن ارىپتەستىكتە تانىتقان كۇش-جىگەرىن قۇپتايدى. سونداي-اق مينيسترلىك ۇيدە بولعان كەزەڭدە بالالاردىڭ ءبىلىم الۋىن قيىنداتاتىن، مىسالى، ينتەرنەت جىلدامدىعىنىڭ تومەندىگى، كومپيۋتەرلىك جابدىقتىڭ جوقتىعى، مەكتەپتەردىڭ دايىندىعى، پسيحوالەۋمەتتىك جاعداي سياقتى كەيبىر كەدەرگىلەر مەن شەكتەۋلەردى ەسكەرۋدە جانە قالىپتاسقان احۋالدى نازارعا الا وتىرىپ، قابىلداناتىن شەشىمدەرىن جاعدايعا قاراي بەيىمدەۋ ءۇشىن قاجەتتى قادامدار جاساۋدا، ادىستەمەلىك جانە تەحنيكالىق ماسەلەلەر، قولدا بار وقىتۋ پلاتفورمالارى مەن ارنالاردى جانداندىرۋ بويىنشا جۇمىستاردى جالعاستىرۋدا» دەلىنگەن.

ەكى حالىقارالىق ۇيىم دا توتەنشە جاعداي كەزىندە ءبىلىم جانە عىلىم مينيسترلىگىنە قاشىقتان وقىتۋ ماسەلەلەرىندە قولداۋ كورسەتۋدى جالعاستىرۋعا دايىن ەكەنىن مالىمدەدى.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار