قازاقستان • 07 ءساۋىر، 2020

كونە تاريحىمىزدىڭ كومبەسىن ۇيىڭىزدە وتىرىپ-اق ارالاي الاسىز

105 رەتكورسەتىلدى

قىم-قۋىت تىرشىلىكپەن قاربالاسىپ ءجۇرىپ جايشىلىقتا مادەنيەت وشاقتارىنا باس سۇعىپ، جان سارايىمىزدى جاڭعىرتۋعا ءجيى ۋاقىت تابا بەرمەۋشى ەدىك. ءتورت قابىرعاعا قاماپ، تەلەفون مەن تەلەديدارعا تەلمىرتىپ قويعان قازىرگى جاعداي ءبىر ءسات تەرەڭ ويلانۋعا مۇرشا بەرگەندەي. جەلىدەگى جەڭىل دۇنيەلەردەن جالىققان جۇرت كونە تاريحتىڭ كومبەسى سانالاتىن مۇراجايلارداعى تانىمدىق مۇرالارعا ۇڭىلە باستادى.

ماسەلەن، مەملەكەتتىك ورتالىق مۋزەيدە 3D فورماتىندا ءجۇرىپ جاتقان ۆيرتۋالدى تۋرلاردى سوڭعى اپتانىڭ وزىندە توقسان مىڭ ادام تاماشالاعان.

زەيىن قويىپ، زەر سالساڭ زامانالار بەدەرىنە بويلاتاتىن تاڭعاجايىپ تۋىندىلار تانىمىڭدى تەرەڭدەتپەۋى مۇمكىن ەمەس. مۋزەي  قورىنان 300 مىڭعا جۋىق ماتەريالدىق جانە رۋحاني مادەنيەت قۇندىلىقتارىن تابۋعا بولادى. ەجەلگى  داۋىرلەردەن قازىرگى زامانعا دەيىنگى قازاقستاننىڭ تاريحى مەن مادەنيەتىنە ساپار شەكتىرەتىن جەتى تۇراقتى زالدىڭ جۇمىسىن قاشىقتان-اق تاماشالاي الاسىز. ارحەولوگيالىق  التىندار توپتاماسى،  قازاقستان تاريحىنىڭ ەتنوراسوگەنەتيكالىق دامۋىن كورسەتەتىن انتروپولوگيا مۇرالارى، ەتنوگرافيا زالىن تولتىرعان بىرەگەي  جادىگەرلەر – تۇنىپ تۇرعان تاريح.

مىڭ جىلدىق تاريحى بار الماتىنىڭ وتكەنى مەن بۇگىنىنەن حابار بەرەتىن شاعىن فيلمدەر توپتاماسى شاھاردىڭ ءبىز بىلمەيتىن تىلسىم سىرىنا ۇڭىلتەدى. تۋىندىدان تاۋ قورشاعان تاس قالا تۇرعىندارىنىڭ باسى دا سوڭى ءبىز ەمەس ەكەنىمىزدى ساناڭىزعا سالماق سالىپ، وي ەلەگىنەن وتكىزەسىز. ازان-قازان تىرشىلىگىنەن ارىلىپ، ءبىر ءسات تىنىم العان تۋعان قالاڭىزدىڭ تىنىسى اشىلعانىنا قۋانىپ، تابيعات انامەن تىلدەسكەندەي اسەرگە بولەنەسىز.

1

–مادەنيەت وشاعىنىڭ الەۋمەتتىك جەلىدەگى پاراقشالارىندا بىلتىر قىركۇيەك ايىندا چەحيالىق كورەرمەندەردىڭ نازارىنا ۇسىنىلعان  « ۇلى دالانىڭ تاريحي-مادەني كەلبەتى» اتتى جىلجىمالى كورمە تۋرالى بەينەوروليكتى وقىرماندار جىلى قابىلدادى. قازاقتىڭ تاريحي ەتنوگرافياسىنىڭ مۋزەيدەگى دەرەكتىك نەگىزى ءھام نەگىزدەمەسى تۇرعىسىندا مۋزەي ديرەكتورى، پروفەسسور نۇرسان ءالىمباي ارنايى ونلاين-ءدارىس وتكىزدى. ارحەولوگيا ءبولىمىنىڭ جەتەكشىسى ايتقۇل حاميت كورەرمەندى  «اقتەرەك شاتقالىنىڭ ارحەولوگيالىق ەسكەرتكىشتەرى»  تاقىرىبىندا مول اقپاراتقا قانىقتىردى. ارىپتەسىمىز نابيرا تورەجانوۆا مۋزەيدىڭ  ايگىلى ەرميتاجبەن بىرلەسە جاساعان ارحەولوگيالىق ەكسپەديتسيالىق جوباسى جامبىل وبلىسى، بايزاق اۋدانىندا ورنالاسقان «باقا توبە» ەسكەرتكىشىندە جۇرگىزگەن قازبا جۇمىستارىنا شولۋ جاسادى. كوڭىل قۋانتارلىعى، پاراقشالارىمىزعا پىكىر قالدىرىپ، قىزىقتى دەرەكتەرگە، كەيبىر جادىگەرلەرگە قاتىستى ساۋالدارىن جولداپ جاتقان وقىرماندار كوپ. مۇنداي كەرى بايلانىس ورناتۋعا نيەت بىلدىرگەن زەردەلى  ازاماتتارعا دا ايرىقشا كوڭىل ءبولىنىپ وتىر. سونداي-اق «مەملەكەتتىك ورتالىق مۋزەي قورىنداعى سيرەك كەزدەسەتىن قولجازبالار مەن باسىلىمدار حاقىندا بىرەر ءسوز» اتتى  تانىمدىق ءدارىس كوپشىلىك ءۇشىن تاپتىرماس دۇنيە بولادى دەن سەنەمىز، – دەيدى مەملەكەتتىك ورتالىق مۋزەيىنىڭ  ءباسپاسوز حاتشىسى اقمارال ايدىمباەۆا.

سوڭعى جاڭالىقتار

عاسىر زۇلماتى

قوعام • كەشە

قۇردىم (تورتتاعان)

ادەبيەت • كەشە

جاڭا فورماتتاعى جىر كەشى

رۋحانيات • كەشە

ۇقساس جاڭالىقتار