وبلىستىق كاسىپكەرلىك پالاتاسىنىڭ ءباسپاسوز قىزمەتى ءبىزدىڭ بۇل ساۋالىمىزعا بىردەن جاۋاپ قاتتى. پالاتادا كۇن سايىن مونيتورينگ جاسالىپ, سالانىڭ جاي-كۇيى ۇدايى باقىلانىپ وتىرادى. بۇلار دا قاشىقتىقتان جۇمىس ىستەۋ تارتىبىنە كوشكەن. بىراق, ىسكەرلەرگە قولداۋ كورسەتۋ, داعدارىس زارداپتارىن بولدىرماۋ ءۇشىن مەملەكەت تاراپىنان اتقارىلىپ جاتقان جۇمىستاردى ناسيحاتتاۋ ءبىر ءسات تە ۇزىلگەن ەمەس.
توتەنشە جاعداي باستالعالى بەرى تەڭگەنىڭ قۇنسىزدانۋى مەن ينفەكتسيانىڭ ورشۋىنە بايلانىستى جاسالىپ جاتقان شەكتەۋدەن جۇمىسى كىدىرگەن 233 كاسىپ يەسى حابارلاسىپتى. قازىر وسىلاردىڭ 52-ءسى وڭ شەشىم تاپتى. قالعاندارى بويىنشا دا جۇمىستار جاسالۋدا.
شەشىلگەن شارۋالاردىڭ قاتارىندا «سۇيەنىش ساعي قومشاباي» جك مەن «ابزال جانە ك» كومپانياسىنىڭ وتىنىشتەرىن ايتۋعا بولادى. العاشقىسى نەسيەنىڭ ءۇشىنشى ترانشىن الۋ جايلى حابارلاسسا, «ابزال جانە ك» سەرىكتەستىگى رەسەي فەدەراتسياسىنان ساتىپ العان اۋىلشارۋاشىلىعى تەحنيكاسىن جەتكىزۋ جونىندە كومەك سۇراعان.
كاسىپ يەلەرىنە توتەنشە جاعدايعا بايلانىستى نەسيەنىڭ نەگىزگى قارىزى مەن سىياقى مولشەرلەمەسىن شەگەرۋ مۇمكىندىگى جايلى تۇسىندىرمە جاسالدى. وسى باعىتتا ءتۇرلى قارجى ۇيىمدارى مەن ەكىنشى دەڭگەيلى بانكتەرگە 664 كاسىپكەر حابارلاسقان. قازىر ولاردىڭ 553-ءىنىڭ ءوتىنىشى قاناعاتتاندىرىلدى.
پالاتا وكىلدەرى ساۋالداما وتكىزىپ, وعان شاعىن جانە ورتا كاسىپكەرلىك سالاسىنداعى 301 كاسىپورىندا جۇمىس ىستەيتىن 9219 ادام قاتىستى. ساۋالداما وبلىستا وسى سالاداعى 1415 ادام اقىسىز ەڭبەك دەمالىسىنا شىققاندىعىن, 48 جۇمىس ورنىنىڭ قىسقارىپ كەتكەندىگىن انىقتادى.
ساۋدا ورىندارى مەن بازارلاردى جالعا الىپ وتىرعان كاسىپكەرلەر ءۇشىن جالداۋ اقىسىن ارزانداتۋ وسى قيىن كەزەڭدە ۇلكەن كومەك بولماق. وسى باعىتتا پالاتا مەن جەرگىلىكتى بيلىك وكىلدەرى بىرىگىپ, كاسىپكەرلەرمەن كەزدەسۋلەر وتكىزدى. ونىڭ ناتيجەسىندە «سىباعا» جشس باسشىلىعى «قورقىت» ساۋدا ءۇيىنىڭ جالدىق اقىسىن 50 پايىزعا قىسقارتسا, «جىبەك جولى» كەشەنى كاسىپكەرلەردەن جالداۋ قۇنىن الۋدى ۋاقىتشا توقتاتتى.
پالاتاعا حابارلاسىپ, قازىرگى قالىپتاسقان جاعدايعا بايلانىستى ەلگە كومەكتەسۋگە دايىن ەكەنىن ءبىلدىرىپ جاتقان كاسىپكەرلەر دە بار. مىسالى, وڭىرگە بەلگىلى ىسكەر ازامات قايرات بورانباەۆ ء وزىنىڭ يەلىگىندەگى «قىزىلوردا» قوناق ءۇيىن ۋاقىتشا مەديتسينالىق نىسان رەتىندە تەگىن بەرۋگە بەل بايلاپتى. كۇرىش وسىرەتىن «اباي داۋلەت» جشس باسشىسى, بيزنەسمەن مۇرات سارسەنباەۆ تا پالاتا باسشىلىعىنا وسىنداي ۇسىنىس ايتىپ وتىر. بۇل ازاماتتاردىڭ باستاماسىن قولداپ جاتقان كاسىپ يەلەرى از ەمەس.
