ەندىگى ماسەلە, ەل تۇرعىندارىنىڭ سانالىلىق تانىتىپ, پرەزيدەنتتىڭ مالىمدەمەسىنە ءۇن قوسا بىلۋىندە, سونداي-اق ءار ازاماتتىڭ قيىن كەزەڭنەن امان-ەسەن وتۋگە ءوزىنىڭ ۇلەسىن قوسۋعا دەگەن ۇمتىلىسىندا.
جاسىراتىن نەسى بار, قازىر ەلىمىزدە اتىشۋلى ىندەت ءورشىپ بارادى. جۇقتىرعاندار سانى كۇن ساناپ وسۋدە. جيىرما شاقتى كۇننىڭ ىشىندە عانا ەلىمىزدە ۆيرۋستى نۇر-Cۇلتان, الماتى, شىمكەنت قالالارى مەن ەلىمىزدىڭ كوپتەگەن ايماعىندا 600-دەن استام وتانداسىمىزدىڭ جۇقتىرعانى انىقتالىپ وتىر. التى ادام كوز جۇمدى. قىسقاسى, باۋىرلار, ەل باسىنا تاعدىر تالقىسى تۇسكەن سىن ساعاتقا ءدوپ كەلىپ وتىرمىز.
بۇل دەرت جالعىز ءبىز عانا ەمەس, تۇتاس ادامزات بالاسىن الاڭداتىپ وتىر. قىتايدان باستاۋ العان COVID-19 ۆيرۋسى جاڭا جىلدان بەرى, اسىرەسە سوڭعى ەكى ايدىڭ جۇزىندە الەمنىڭ كوپتەگەن ەلىنە تارالىپ, بۇگىنگە دەيىن 70 مىڭنان استام ادامنىڭ جانىن جالماپ كەتتى. سوڭعى دەرەكتەرگە قاراعاندا, ءدال قازىر قحر اتالعان دەرتتىڭ ەكىنشى تولقىنىنا ءدوپ كەلىپ وتىر.
دەگەنمەن, قازاق ەلىنىڭ داتكە قۋات ەتەرلىگى, اتى جامان دەرتتىڭ كورشى ەلدەردە دىڭعىرى شىعا باستاعان كۇننەن باستاپ پرەزيدەنت ق.توقاەۆ ساقتىق شارالارىن كۇشەيتۋ جۇمىستارىنا باسا ءمان بەرىپ, بيلىك بۇتاقتارى مەن ەل تۇرعىندارىنا دابىل قاعىپ, قاتەرلى دەرتپەن كۇرەسۋدىڭ دايىندىق جۇمىسىنا ەرتە باستان كىرىستى. اتاپ ايتقاندا, ۆيرۋس وشاعى بولعان قحر-مەن شەكارا اقپان ايىنىڭ باسىندا-اق جابىلدى. ساقتانۋ, الدىن الۋ, ەمدەۋ ىستەرىنىڭ دايىندىعى كۇن ىلگەرى جاسالدى. ازىق-ت ۇلىكتىڭ, ءدارى-دارمەكتىڭ جەتكىلىكتى قورى جاساقتالۋمەن بىرگە, ەمحانالارىمىزدان مىڭداعان ورىن ازىرلەندى. مەديتسينا, دەنساۋلىق ساقتاۋ سالاسى مەن قۇقىق قورعاۋ ورگاندارىنىڭ قىزمەتكەرلەرى الدىن الا ازىرلىك جۇمىستارىنا كىرىسىپ كەتتى. وسىنىڭ ارقاسىندا ناۋرىز ايىنىڭ ورتاسىنا دەيىن قازاقستان جەر بەتىندەگى «جاسىل ايماق – جۇماق مەكەن» بولىپ كەلدى. الايدا ءبىزدىڭ ەلىمىز دە جەردىڭ بەتىن وزگە جۇرتپەن بىرگە ورتاق مەكەندەپ وتىرعاندىقتان, قالاي ساقتانسا دا ماڭايىندا قاۋلاپ ءورىپ, ساۋلاپ توگىلىپ جاتقان, تەز تارالاتىن, جىلدام جۇعاتىن دەرتتەن اۋلاق بولا المادى. اتى جامان دەرت اقىرى قازاق جەرىنە دە كەلدى. پرەزيدەنت جارلىعىمەن ەلدە كارانتين جاريالاندى. نۇر-سۇلتان مەن الماتى, شىمكەنت قالالارى وقشاۋلاندى. سونىمەن بىرگە مەملەكەت باسشىسى ق.توقاەۆ تەلەارنا ارقىلى تۇتاس ەل حالقىنا قايتا-قايتا ۇندەۋ جاريالاپ, جالپى حالىقتان جانە ۇكىمەتتەن ساقتىق شارالارىن بوساڭسىتپاۋدى تالاپ ەتتى.
وكىنىشكە قاراي بۇل ماسەلەگە ءبىزدىڭ كوپتەگەن وتانداسىمىزدىڭ ءالى دە بولسا جەتكىلىكتى ءمان بەرمەي وتىرعانىن نەسىن جاسىرايىق. ادام شىعىنى كوپ بولعان قىتاي, وڭتۇستىك كورەيا, يتاليا, يران, اقش, ت.ب. ەلدەردىڭ جاعدايىنا نازار اۋدارساق, بۇل ەلدەردىڭ و باستا اتالعان دەرتكە باسا ءمان بەرمەگەنىن, كەرىسىنشە, تىم ءجۇردىم-باردىم, وتە بەيجاي قاراعانىن اڭعارۋ قيىن ەمەس. سوندىقتان, قادىرلى اعايىندار, ەلىمىز بەن جەرىمىزدىڭ تاعدىرى ءۇشىن, ءسىز بەن ءبىزدىڭ جانە ۇرپاعىڭىزدىڭ اماندىق-ساۋلىعى ءۇشىن ەل باسشىلارى جان ۇشىرىپ, شىر-پىر بولىپ جاتقاندا, نەمكەتتىلىكپەن جۇرگەندەردىكى سىپايىلاپ ايتقاندا ساناسىزدىق, تۇپتەپ كەلگەندە قىلمىس! كەيبىر ەلدەردە ونداي ءتارتىپ بۇزۋشىلار وتە اۋىر قىلمىستىق جاۋاپكەرشىلىككە تارتىلۋدا.
سوندىقتان ۇلت باسىنا وسىنداي قيىن سىناق ءتۇسىپ تۇرعاندا ءوزىمىز سايلاعان مەملەكەت باسشىسىنىڭ ءۋاجى مەن تالابىنا قۇلاق اسىپ, تارتىپكە سانالى تۇردە بويۇسىنىپ, ءبىر جاعادان باس, ءبىر جەڭنەن قول شىعارىپ, دەرت-دەربەزدى امان-ەسەن ەڭسەرۋدى ويلايىق, اعايىن!
اقىن سابىر اداي ء«ار قازاق مەنىڭ جالعىزىم» دەپ جىرلاعانداي, ات توبەلىندەي عانا, ءبىر شوكىم جۇرتپىز! بالشىقتان قازاق جاساي الماي دىلگىر بولىپ وتىرعان از-اق حالىقپىز!
وسىندايدا بىرىمىزگە-ءبىرىمىز كومەكتەسىپ, بىرىمىزگە-ءبىرىمىز جانكۇيەر بولىپ, جۇدىرىقتاي جۇمىلىپ قيىندىقپەن بىرگە كۇرەسەيىك باۋىرلار! كۇرەستىڭ ەڭ ءتيىمدى ءارى توتە جولى – ۇيدەن شىقپاۋ!
اۋلەتىمىزدىڭ, وتباسىمىزدىڭ, ۇرپاعىمىزدىڭ, اتا-انامىزدىڭ, ءوزىمىزدىڭ – ەل-جۇرتىمىزدىڭ اماندىق-ساۋلىعى ءۇشىن, تارتىپكە سانالى باعىنىپ, ۇيدە وتىرايىق باۋىرلار!
قۇداي دا «ساقتانساڭ-ساقتايدى».
ء«بىز بىرگەمىز! ءبىز ۇيدەمىز!» دەگەن ءسوز ۇرانىمىز بولسىن, اعايىن!
دۇكەن ماسىمحان ۇلى,
اقىن, اۋدارماشى,
قازاقستاننىڭ ەڭبەك سىڭىرگەن قايراتكەرى
