اقپان ايىنىڭ اياعىندا كورەياعا كەتكەن سول قىز تەلەفون شالدى. العاشىندا +82 10 343... دەگەن سانداردان باستالاتىن ۇزىن ءنومىردى تانىماي, تۇتقانى كوتەرمەي قويعان بولاتىنمىن. ارتىنشا سول نومىردەن WhatsApp-ىما داۋىستىق حابارلاما كەپ ءتۇستى. سويتسەم ءبىزدىڭ اۋىلدىڭ قىزى ەكەن. قانشا دەگەنمەن قىز بالا باۋىرمال ەمەس پە؟ سالەمدەسە سالا اۋىلدىڭ, ەلدىڭ اماندىعىن سۇراپ جاتىر. ارينە قازىرگىدەي ينتەرنەت زامانىندا ايشىلىق الىس جەردە تۇرساڭ دا تۋعان ەلىڭنىڭ جاڭالىقتارىن ءبىلىپ وتىرۋ ەش قيىن ەمەس. دەگەنمەن دە جات جەردەگى قازاقتار وزدەرى ەستىگەن اڭگىمەلەرىن مىڭ قۇبىلتىپ, ول اۋىزدان-اۋىزعا كوشىپ, اقىرىندا «سامارقاندى سۋ الىپتى» دەپ اياقتالاتىنى بەلگىلى عوي.
– وڭتۇستىك كورەياعا كەلگەنىمە وسى جىلدىڭ ءساۋىر ايىندا ەكى جىل بولادى. بۇل جاقتا كوروناۆيرۋسقا بايلانىستى جاعداي قيىن بولدى. كارانتين جاريالاندى. بىراق شىنىمدى ايتسام, قالادا اناۋ ايتقانداي دۇرلىگىپ, ۇرەيلەنىپ جۇرگەن حالىقتى كورمەدىم. ءبارى وتە سابىرلى. كورەي حالقى وتە تازا, ءتارتىپتى حالىق قوي. بۇرىننان كوشەدە بەتتەرىنە ماسكا تاعىپ جۇرەتىن. ويتكەنى بۇل جاقتا جەل كوپ. مەن سەۋلدەن 128 شاقىرىم قاشىقتا ورنالاسقان چحوندجۋ́ دەگەن قالادا جۇمىس ىستەدىم. مىنا جاقتاعى ادامداردان نەبىر سۇمدىقتاردى ەستيسىڭ... ودان يۋتۋبتان قازاقستان تۋرالى ءار ءتۇرلى اقپاراتتاردى كوردىم.
كوشەدە كورگەنىم – ءار باعدارشامنىڭ تۇبىندە اق جەلەڭدى جاندار تۇردى. ءوتىپ بارا جاتقان كەي ادامداردى توقتاتىپ, دەنە قىزۋىن ولشەيدى. ءوزىڭىز بارىپ, ولشەتىپ الساڭىز دا بولادى. قاي مەكەمەگە كىرسەڭىز دە, قول شاياتىن سپيرت, ماسكا, ءبارى دايىن تۇر. مەديتسيناسى دامىعان ەل عوي. ادامدارى دا وتە جاقسى. حالىققا بارلىق جاعداي جاسالعان. العاش كەلگەندە اۋىل شارۋاشىلىعى سالاسىندا ەڭبەك ەتتىم. كەيىن كىر جۋدىم. كورەيلەر ءۇشىن ۇلۋ قابىرشاعى وتە جەڭسىك اس. تەڭىزدىڭ استىنان شىعاتىن قابىرشاقتى دا تەردىك. تامىز ايىنان باستاپ مەيرامحانادا جۇمىس ىستەي باستادىم. كارانتين كەزىندە كليەنتتەر وتە از بولدى. ەندى ەلگە قايتسام دەيمىن. ارينە بۇل جاقتا جاقسى تابىس تاباسىڭ. بىراق ءبارىبىر تۋعان ەلدە جۇرگەنگە نە جەتسىن؟ – دەدى ول.
ارادا ءۇش اپتا وتكەندە اۋىلدىڭ قىزى ەلورداعا ۇشىپ كەلدى. باستاپقىدا نۇر-سۇلتان قالاسىندا توتەنشە جاعداي جاريالانۋىنا بايلانىستى ەلگە كىرگىزبەي قويا ما دەپ قاۋىپتەنگەن. جوق, ەشقانداي كەدەرگى بولمادى. شىعار كەزدە «اعا, ەلوردادا جاقىن اعايىن-تۋىسىم, تانىسىم جوق. بارعان سوڭ قايدا بارامىن, قايدا قونامىن؟» دەگەن بولاتىن. شىنىمدى ايتسام, ءوزىم دە ساسىپ قالدىم. قانشا دەگەنمەن ىندەت ءورشىپ تۇرعان ەلدەن كەلە جاتقان ادامدى تانىسى تۇگىلى جاقىن اعايىنى ۇيىنە كىرگىزە مە؟ دەگەنمەن دە «كەلە بەر... ءبىر ءجونى بولار» دەدىم سابىر ساقتاپ. ەكى كۇننەن كەيىن WhatsApp ارقىلى «كەلدىم, ءبىزدى ارنايى اۆتوبۋسقا مىنگىزىپ, «تۋريست» قوناق ۇيىنە اپارىپ ورنالاستىردى. قان سىناماسىن تاپسىردىق, وسى جەردە ءبىراز كۇن بولاتىن سياقتىمىز», دەپ جازدى.
ەندى ءارى قاراي نە بولادى؟ جولىقسام, اۋرۋ جۇعىپ كەتەتىندەي وزىمنەن-ءوزىم قۋىستانىپ جۇرگەندە «قان سىناماسى دۇرىس شىقتى. ءبىزدى اۆتوبۋسپەن قاراعاندىعا الىپ بارا جاتىر. سول جەردەن شىمكەنتكە قاراي پويىزعا سالىپ جىبەرەتىن بولدى» دەپ حابارلاستى. ء«ويبۇي, ەڭ بولماعاندا ۇيگە كىرىپ, ءدام اۋىز ءتيىپ شىقپادىڭ با؟» دەپ مەن دە سىپايىلىق تانىتىپ جاتىرمىن.
«ەكى جىلدا ەلدىڭ جاعدايى اجەپتەۋىر وزگەرىپتى. ۇشاقتان تۇسكەننەن, ودان قوناق ۇيدە دە دارىگەرلەر تىك تۇرىپ قىزمەت ەتتى. بارلىق جاعداي جاسالعان. بەس مەزگىل تاماق بەردى. توسەك ورىندارى دا تاپ-تازا. ەلدىڭ جاعدايىن كورىپ قۋانىپ قالدىم» دەدى اۆتوبۋستا كەتىپ بارا جاتقان قىز.
«جولىڭ بولسىن! اۋىلعا امان-ەسەن جەتىپ ال!», دەدىم اۋىلداسىما. ارينە ەلىمىزدە ىندەتتى جەڭۋ ءۇشىن وراسان ەڭبەك اتقارىلىپ جاتىر. الايدا, كورەياداعىداي ءبىزدىڭ ەلدە كەز كەلگەن ءدارىحانادان ماسكا مەن قول جۋاتىن ءسپيرتتى تابا المايتىنىمىزدى اۋىلداس قىزعا ايتپادىم. «ەلگە بارعان سوڭ ءوزى دە بىلەدى عوي...».
