وبلىستىق توتەنشە جاعدايلار دەپارتامەنتىنىڭ مالىمەتىنشە, وزەن جاعالاۋىنداعى ەلدى مەكەندەر تۇگەلدەي باقىلاۋعا الىنعان. ايماقتاعى سۋ باسۋ قاۋپى بار 99 اۋىلدىڭ ماڭىندا ارنايى قۇتقارۋشىلار جاساعى كەزەكشىلىكتە تۇر. توتەنشە جاعدايلار قىزمەتى جەرگىلىكتى اتقارۋشى ورگاندارمەن بىرلەسىپ, ەگىستىكتەردەن اققان قىزىل سۋدىڭ الدىن توسۋ, ارناسىن بۇرۋ جۇمىستارىمەن اينالىسىپ جاتىر. ازىرشە قارعىن سۋ جوق, وزەن كەمەرى ءبۇتىن.
وبلىستا قاراتومار جانە جوعارعى-توبىل دەپ اتالاتىن جالپى سىيىمدىلىعى 546 ملن تەكشە مەترلىك ەكى نەگىزگى سۋ قويماسى بار. كوكتەم ماۋسىمىندا بولجانعان قىزىل سۋ وسى ەكى قويماعا قۇيىلادى.
كۇن رايىنىڭ كۇرت جىلىنۋى مەن ەگىستىك القاپتارىندا ەرىگەن قاردىڭ مولدىعىنا بايلانىستى تاياۋدا قاراسۋ اۋدانىنداعى سۋ قويمالارىندا مۇز جارۋ جۇمىستارى جۇرگىزىلدى.
– وتكەن دەمالىس كۇندەرى يليچەۆ اۋىلدىق وكرۋگىنە قاراستى نوۆوسەلوۆ
اۋىلىنىڭ ماڭىنداعى قۇندىزدى وزەنىندە 6 جارىلىس بولدى. قاردىڭ جاپپاي ەرۋى كەزىندە قىزىل سۋدىڭ باسىم بولىگى ءدال وسى جەرگە كەلەدى دەپ كۇتىلۋدە. جارىلىس جۇمىستارىنىڭ ناتيجەسىندە وزەندەگى سۋ دەڭگەيى ەداۋىر تومەندەدى, – دەدى تجد ءباسپاسوز قىزمەتىنىڭ جەتەكشىسى ءۋاليحان دوسانوۆ.
وبلىستا كوكتەمگى سۋ تاسقىنىنىڭ الدىن الۋ شارالارىنا 506,6 ملن تەڭگە بولىنگەن. قۇتقارۋ قىزمەتتەرى وزەن-سۋ ارنالارى مەن سۋ باسۋ قاۋپى بار ەلدى مەكەندەردى كۇن سايىن اۋەدەن باقىلاپ وتىر. سۋ تاسقىنىنان قاۋىپ تونە قالعان جاعدايدا ارنايى دايىندىقتان وتكەن 2659 ادام قۇتقارۋ ىسىنە كىرىسەدى. ولارعا كومەككە كەلەتىن 1168 تەحنيكا, 142 قايىق, 312 سۋ سورعىش قۇرىلعى دا ساقاداي-ساي.
قوستاناي وبلىسى
