كوروناۆيرۋس • 06 ءساۋىر، 2020

الەمدە العاش رەت جولبارىستان COVID-19 ۆيرۋسى انىقتالدى

97 رەتكورسەتىلدى

نيۋ-يورك قالاسىنداعى برونكس حايۋاناتتار باعىنداعى جولبارىستان COVID-19 ۆيرۋسى انىقتالدى. بۇل تۋرالى nationalgeographic.com سايتى حابارلادى.

اقش اۋىل شارۋاشىلىعى مينيسترلىگىنىڭ مالىمەتىنە سۇيەنىپ دايىندالعان اقپاراتتا اتالعان حايۋاناتتار باعىنداعى جەتى جولبارىستان كوروناۆيرۋس ىندەتىنىڭ سيمپتومدارى بايقالعان. سونىڭ بىرەۋىنەن تەست الىنىپ، ونىسى وڭ ناتيجە كورسەتكەن. بۇل – الەمدە كوروناۆيرۋستىڭ جولبارىستان عانا ەمەس، جابايى جانۋارلاردان تابىلعان العاشقى جاعداي.

حايۋاناتتار باعىنىڭ باس ۆەتەرينارى پول كاللەنىڭ ايتۋىنشا، جابايى جانۋارعا ۆيرۋس ادامنان جۇققان. ناديا ەسىمدى ءتورت جاسار مالاي جولبارىسىندا ناۋرىزدىڭ سوڭىندا قۇرعاق جوتەل كۇشەيگەن سوڭ، 2 ساۋىردە ۆيرۋستىڭ بار-جوعى تەكسەرىلگەن. بۇل اڭنىڭ بىرگە تۋعان ۇيالاسىنا قوسا ءالى تەكسەرىلمەگەن ەكى ءسىبىر جولبارىسىن جانە ءۇش افريكالىق ارىستاندى جوتەل قىسىپ، تابەتتەرى قاشقان. جالپى جەتى جىرتقىشتىڭ جاعدايىن باقىلاۋدا ۇستاپ وتىرعانمەن، ۆيرۋستىڭ جانۋارلار اراسىندا قالاي ءورشيتىنى بەلگىسىز بولىپ تۇر.

برونكس حايۋاناتتار باعى 16 ناۋرىزدان باستاپ كەلۋشىلەر ءۇشىن جابىلعان.

قازىرگى ۋاقىتتا ءۇي نەمەسە جابايى جانۋارلاردىڭ ادامدار اراسىندا جاڭا كوروناۆيرۋستى تاراتا الاتىنىنا دالەل جوق. دەگەنمەن بۇعان دەيىن بىرنەشە ءۇي جانۋارىنان، سونىڭ ىشىندە گونكونگتان پومور جانە نەمىس وۆچاركالارىنان جانە بەلگيادا مىسىقتان SARS-CoV-2 كوروناۆيرۋسى انىقتالعان. بۇل جاڭا Covid-19 كوروناۆيرۋسىنا جەتەلەيدى.

سوڭعى جاڭالىقتار

ۇقساس جاڭالىقتار